ബ്രോഡ്കാസ്റ്റ് ലൈസൻസ് ഇല്ല; സാറ്റലൈറ്റ് ചാനലുകളുടെ അപ്ലിങ്കിംഗ്–ഡൗൺലിങ്കിംഗ് ചട്ടങ്ങൾ ലംഘിച്ചാണ് റിപ്പോർട്ടർ ടിവി പ്രവർത്തിക്കുന്നതെന്ന് ഹർജി
കൊച്ചി: ബ്രോഡ്കാസ്റ്റ് ലൈസൻസ് ഇല്ലാതെ ‘റിപ്പോർട്ടർ ടിവി’ പ്രവർത്തിക്കുന്നുവെന്നാരോപിച്ച് ചാനലിന്റെ ലൈസൻസ് റദ്ദാക്കണമെന്ന് ആവശ്യപ്പെട്ട് കിറ്റെക്സ് ഗാർമെന്റ്സ് മാനേജിംഗ് ഡയറക്ടർ സാബു എം. ജേക്കബ് കേരള ഹൈക്കോടതിയിൽ റിറ്റ് ഹർജി നൽകി.
ഇതുസംബന്ധിച്ച് കേന്ദ്ര ആഭ്യന്തര മന്ത്രാലയത്തിന് നൽകിയ പരാതിയിൽ നടപടി ഉണ്ടായില്ലെന്നാരോപിച്ചാണ് കോടതിയെ സമീപിച്ചത്.
ഹർജി ഫയലിൽ സ്വീകരിച്ച ഹൈക്കോടതി, റിപ്പോർട്ടർ ടിവിയുടെ ബ്രോഡ്കാസ്റ്റ് അനുമതിയുമായി ബന്ധപ്പെട്ട രേഖകൾ ഹാജരാക്കാൻ കേന്ദ്ര സർക്കാരിനോട് ആവശ്യപ്പെട്ടു.
റിപ്പോർട്ടർ ബ്രോഡ്കാസ്റ്റിംഗ് കമ്പനി പ്രൈവറ്റ് ലിമിറ്റഡ്, അതിന്റെ ഭാരവാഹികൾ, കൂടാതെ ഇൻഡോ ഏഷ്യൻ ന്യൂസ് ചാനൽ പ്രൈവറ്റ് ലിമിറ്റഡും ഡയറക്ടർമാരും ഹർജിയിൽ പ്രതികളായി ചേർത്തിട്ടുണ്ട്.
രാജ്യത്തെ സാറ്റലൈറ്റ് ചാനലുകളുടെ അപ്ലിങ്കിംഗ്–ഡൗൺലിങ്കിംഗ് ചട്ടങ്ങൾ ലംഘിച്ചാണ് ചാനലിന്റെ ഉടമസ്ഥതയും പ്രവർത്തനവും നടക്കുന്നതെന്നാണ് പ്രധാന ആരോപണം.
ഹർജിയിൽ പറയുന്നതനുസരിച്ച്, ഇൻഡോ ഏഷ്യൻ ന്യൂസ് ചാനൽ പ്രൈവറ്റ് ലിമിറ്റഡിനാണ് ആദ്യം ബ്രോഡ്കാസ്റ്റ് ലൈസൻസ് അനുവദിച്ചിരുന്നത്.
കമ്പനിയുടെ ഓഹരി ഘടനയിൽ മാറ്റം വരുത്തി ചാനലിന്റെ നിയന്ത്രണം ഏറ്റെടുക്കാനുള്ള അപേക്ഷയ്ക്ക് ദേശീയ സുരക്ഷാ കാരണങ്ങൾ ചൂണ്ടിക്കാട്ടി അനുമതി നിഷേധിച്ചുവെന്നും ഹർജിയിൽ പറയുന്നു.
അതേസമയം, ചാനലിന്റെ ഔദ്യോഗിക വെബ്സൈറ്റിലും സോഷ്യൽ മീഡിയ അക്കൗണ്ടുകളിലും റിപ്പോർട്ടർ ബ്രോഡ്കാസ്റ്റിംഗ് കമ്പനി പ്രൈവറ്റ് ലിമിറ്റഡാണ് ഉടമസ്ഥരെന്ന വിവരം രേഖപ്പെടുത്തിയിരിക്കുന്നതായും ഹർജിയിൽ ചൂണ്ടിക്കാണിക്കുന്നു.
കിറ്റെക്സ് ഗാർമെന്റ്സിനും സാബു എം. ജേക്കബിനുമെതിരെ വ്യാജ വാർത്തകൾ സംപ്രേഷണം ചെയ്തുവെന്നാരോപിച്ച് മുമ്പ് പെരുമ്പാവൂർ സബ് കോടതിയിൽ മാനനഷ്ടക്കേസും നൽകിയിരുന്നു.
ആ കേസിൽ ബന്ധപ്പെട്ട വാർത്തകൾ സംപ്രേഷണം ചെയ്യുന്നതിൽ നിന്ന് ചാനലിനെ കോടതി താൽക്കാലികമായി വിലക്കിയതായും അറിയുന്നു.
ലൈസൻസ് സംബന്ധമായ വിഷയത്തിൽ കേന്ദ്ര സർക്കാർ അടിയന്തര നടപടി സ്വീകരിക്കാത്തതിനാലാണ് ഹൈക്കോടതിയെ സമീപിച്ചതെന്നും അന്തിമ വിജയം വരെ നിയമ പോരാട്ടം തുടരുമെന്നും സാബു എം. ജേക്കബ് പ്രതികരിച്ചു.
English Summary
Kitex Garments Managing Director Sabu M. Jacob has filed a writ petition in the Kerala High Court seeking cancellation of Reporter TV’s license, alleging the channel operates without valid broadcast authorization. He claims the Union Home Ministry failed to act on his complaint. The High Court has sought relevant broadcast permission documents from the central government. The petition also names company officials and related entities, alleging violations of satellite uplinking and downlinking rules. Jacob stated he will continue the legal battle until a final decision is reached.
sabu-jacob-petition-high-court-reporter-tv-license
Reporter TV, Kerala High Court, Sabu M Jacob, Broadcast License, Media Case, Legal News
