5 ദിവസം കൊണ്ട് രേണു സുധി സമ്പാദിച്ചത് ₹1.25 ലക്ഷം
കൊച്ചി: സോഷ്യൽ മീഡിയ വിമർശനങ്ങൾക്കിടയിലും ഇൻസ്റ്റഗ്രാം സബ്സ്ക്രിപ്ഷൻ ഫീച്ചറിലൂടെ വൻ വരുമാനം നേടി കൊല്ലം സുധിയുടെ ഭാര്യ രേണു സുധി. വെറും അഞ്ച് ദിവസത്തിനുള്ളിൽ ലക്ഷത്തിന് മുകളിൽ വരുമാനം നേടിയതാണ് ശ്രദ്ധേയമാകുന്നത്.
സോഷ്യൽ മീഡിയയിലെ വിമർശനങ്ങളെയും വിവാദങ്ങളെയും നേരിട്ട് മറികടന്ന് മുന്നേറുകയാണ് കൊല്ലം സുധിയുടെ ഭാര്യയും വൈറൽ താരവുമായ രേണു സുധി. അടുത്തിടെ ഇൻസ്റ്റഗ്രാമിൽ ആരംഭിച്ച സബ്സ്ക്രിപ്ഷൻ സേവനത്തിലൂടെ വലിയ സാമ്പത്തിക നേട്ടമാണ് രേണു സ്വന്തമാക്കിയിരിക്കുന്നത്.
സബ്സ്ക്രിപ്ഷൻ സംവിധാനം ആരംഭിച്ച് വെറും അഞ്ച് ദിവസത്തിനുള്ളിൽ 1,25,100 രൂപയാണ് രേണുവിന് ലഭിച്ചത്. നിലവിൽ 180 രൂപ നിരക്കിൽ ഏകദേശം 695 പേർ സബ്സ്ക്രൈബ് ചെയ്തിട്ടുണ്ട്. സബ്സ്ക്രൈബർമാർക്കായി ഒരു റീലും 11 സ്റ്റോറികളുമാണ് ഇതിനകം പങ്കുവെച്ചിരിക്കുന്നത്.
ബിഗ് ബോസ് ഷോയ്ക്ക് ശേഷമേ ഈ സംവിധാനം ആരംഭിക്കണമെന്ന് ആലോചിച്ചിരുന്നുവെങ്കിലും ചില കാരണങ്ങളാൽ വൈകിയതാണെന്ന് രേണു വ്യക്തമാക്കി. തുടക്കത്തിൽ 45 രൂപയായിരുന്ന സബ്സ്ക്രിപ്ഷൻ നിരക്ക് പിന്നീട് 180 രൂപയാക്കി ഉയർത്തുകയും ചെയ്തു.
ഇതിനിടെ ഇൻസ്റ്റഗ്രാം പ്രൊഫൈൽ ചിത്രം മാറ്റിയതും വലിയ വിവാദങ്ങൾക്ക് വഴിവെച്ചിരുന്നു. കൊല്ലം സുധിയുടെ ചിത്രം മാറ്റി സ്വന്തം ചിത്രം വെച്ചതിനെതിരെ കടുത്ത വിമർശനങ്ങൾ ഉയർന്നു. എന്നാൽ ‘ബ്ലൂ ടിക്ക്’ വെരിഫിക്കേഷൻ നേടുന്നതിനായി മെറ്റയുടെ നിർദ്ദേശപ്രകാരമാണ് ഇത് ചെയ്തതെന്ന് രേണു വിശദീകരിച്ചു.
“ഫോട്ടോ മാറ്റിയതുകൊണ്ട് സുധി ചേട്ടൻ എന്റെ മനസിൽ നിന്ന് ഒരിക്കലും മാറില്ല,” എന്ന് രേണു വികാരപൂർവ്വം പ്രതികരിച്ചു. താൻ വീണ്ടും വിവാഹം കഴിക്കാനോ മറ്റൊരു ബന്ധത്തിലേക്കോ പോകുന്നില്ലെന്നും, ആരെയും പേടിച്ചല്ല ഇത്തരം തീരുമാനങ്ങളെടുത്തതെന്നും അവർ വ്യക്തമാക്കി.
സബ്സ്ക്രിപ്ഷൻ സംവിധാനം ആരംഭിച്ചതിനെതിരെ ഉയരുന്ന വിമർശനങ്ങൾ തനിക്ക് ബാധകമല്ലെന്നും, പിന്തുണക്കുന്നവരാണ് തന്റെ ശക്തിയെന്നും രേണു കൂട്ടിച്ചേർത്തു. ഇന്ന് ലോകമെമ്പാടുമുള്ള സെലിബ്രിറ്റികൾ തന്നെ പ്രത്യേക കണ്ടന്റുകൾക്ക് സബ്സ്ക്രിപ്ഷൻ മോഡൽ സ്വീകരിക്കുന്ന സാഹചര്യത്തിലാണ് ഈ നീക്കം.
English Summary
Renu Sudhi, wife of late actor Kollam Sudhi, has earned ₹1.25 lakh in just five days through Instagram subscriptions despite facing criticism. She clarified that changing her profile picture was for verification purposes and reaffirmed her emotional connection with her late husband. Her success highlights the growing trend of subscription-based content among influencers.
