അതുകൊണ്ടാണ് ഐറ്റം ഡാൻസ് ചെയ്യാൻ പോലും തയ്യാറായത്…6 മാസം കൊണ്ട് 15 കിലോ കുറച്ചു, എന്റെ ശരീരത്തിൽ ഞാൻ ഹാപ്പി: രജീഷ വിജയൻ
‘വണ്ണം ഉണ്ടായിരുന്ന സമയത്തും എന്റെ ശരീരത്തെ കുറിച്ച് എനിക്ക് ഒരു അസന്തോഷവും ഉണ്ടായിരുന്നില്ല. ഞാൻ അപ്പോൾ പോലും ഹാപ്പിയായിരുന്നു.
പക്ഷേ ആറുമാസത്തിനിടെ 15 കിലോ വരെ കുറച്ചത് “മസ്തിഷ്ക മരണം” എന്ന സിനിമ ആവശ്യപ്പെട്ട മാറ്റം കൊണ്ടാണ്’ — അടുത്തകാലത്ത് പ്രേക്ഷകരിൽ വലിയ കൗതുകം സൃഷ്ടിച്ച തന്റെ ശരീരമാറ്റത്തെ കുറിച്ച് തുറന്നു സംസാരിക്കുകയാണ് നടി രജീഷ വിജയൻ.
മലയാളം, തമിഴ്, തെലുങ്ക് ഭാഷകളിലായി അഭിനയജീവിതത്തിന്റെ പത്ത് വർഷം പൂർത്തിയാക്കുന്ന വേളയിലാണ് രജീഷയുടെ തുറന്നുപറച്ചിൽ.
ആറ് മാസം മുഴുവൻ ജിമ്മിൽ ചെലവഴിച്ച അനുഭവമാണ് രജീഷ പങ്കുവെക്കുന്നത്. ‘ശാരീരികമായി ഏറെ അധ്വാനം ആവശ്യപ്പെടുന്ന സിനിമയായിരുന്നു മസ്തിഷ്ക മരണം.
പല രംഗങ്ങളിലും ശക്തിയും കരുത്തും അനിവാര്യമായിരുന്നു. ഒരു സിനിമക്ക് ആവശ്യമായി വന്നാൽ ശരീരപ്രകൃതി മാറ്റാൻ എനിക്ക് എപ്പോഴും സന്തോഷമാണ്. “ജൂൺ” സിനിമയ്ക്കായി മാറ്റം വരുത്തിയപ്പോഴും അതുപോലെ തന്നെയായിരുന്നു’ — രജീഷ പറഞ്ഞു.
‘അനുരാഗ കരിക്കിൻ വെള്ളം’ എന്ന ആദ്യ സിനിമയിലൂടെ തന്നെ മികച്ച നടിക്കുള്ള സംസ്ഥാന ചലച്ചിത്ര അവാർഡ് നേടിയ രജീഷയുടെ ഏറ്റവും പുതിയ ചിത്രമാണ് ‘മസ്തിഷ്ക മരണം’.
ഏറെ ശ്രദ്ധ നേടിയ ‘ആവാസവ്യൂഹം’ എന്ന സിനിമയിലൂടെ ദേശീയ-സംസ്ഥാന അവാർഡുകൾ നേടിയ കൃഷാന്താണ് ഈ ചിത്രം സംവിധാനം ചെയ്യുന്നത്.
സ്വകാര്യത ഏറെ പ്രിയമുള്ള വ്യക്തിയാണ് താനെന്ന് രജീഷ പറയുന്നു. കുടുംബത്തിനും യാത്രകൾക്കും വലിയ പ്രാധാന്യമുണ്ട്. യാത്രകൾക്ക് പോകുമ്പോൾ അത് തനിക്ക് ഒരു മെഡിറ്റേറ്റീവ് അനുഭവം പോലെ തോന്നാറുണ്ടെന്നും രജീഷ പറയുന്നു.
‘മസ്തിഷ്ക മരണത്തിന്റെ’ ആശയം ആദ്യമായി കൃഷാന്തിൽ നിന്ന് കേട്ടപ്പോൾ ഉണ്ടായ അതിശയം രജീഷ ഇങ്ങനെ വിവരിക്കുന്നു: ‘ഈ അടുത്ത കാലത്ത് കേട്ടതിൽ ഏറ്റവും വ്യത്യസ്തമായ ഒരു ആശയമായിരുന്നു അത്.
2046-ൽ നടക്കുന്ന ഒരു കഥ, അതിൽ സിനിമാ നടിയായൊരു കഥാപാത്രം — അങ്ങേയറ്റം വേറിട്ട ചിന്ത. അദ്ദേഹം മുമ്പേ തന്റെ കഴിവ് തെളിയിച്ച സംവിധായകനാണ്. ആ സിനിമയുടെ ഭാഗമാകണം എന്നതായിരുന്നു എന്റെ ഏക ആഗ്രഹം.’
സിനിമയ്ക്ക് ആവശ്യമായതെല്ലാം ചെയ്യാൻ മനസുറപ്പിച്ചാണ് മുന്നോട്ടുപോയതെന്ന് രജീഷ പറയുന്നു. ‘അതുകൊണ്ടാണ് ഐറ്റം ഡാൻസ് ചെയ്യാൻ പോലും തയ്യാറായത്. സാധാരണയായി ഐറ്റം ഡാൻസ് ചെയ്യില്ലെന്ന് തീരുമാനിച്ച ഒരാളാണ് ഞാൻ.
പക്ഷേ അതിന്റെ പ്രാധാന്യം സംവിധായകൻ വ്യക്തമായി വിശദീകരിച്ചപ്പോൾ, ഇതുവരെ പരീക്ഷിക്കാത്ത ഒരു വഴിയിലേക്ക് കടക്കാൻ തയ്യാറായി. ഈ സിനിമ സംഭവിക്കണം, ആ കഥാപാത്രം ഞാൻ തന്നെ ചെയ്യണം എന്നൊരു ആഗ്രഹം ഉണ്ടായിരുന്നു.
മനുഷ്യനല്ലേ, മാറാനും പുതിയതായി ചിന്തിക്കാനും അവസരം ഉണ്ടാകണം. അത്തരം ഒരു മാറ്റത്തിന് ശക്തമായ കാരണമാണ് ഈ സിനിമ.’
‘മസ്തിഷ്ക മരണത്തിലെ ഓരോ ലുക്കും പരസ്പരം വ്യത്യസ്തമാണ്. ഒരു ഫോട്ടോഷൂട്ടിനായി പോലും ഞാൻ പരീക്ഷിക്കാത്ത തരത്തിലുള്ള ലുക്കുകളാണ് ഇതിൽ ചെയ്തത്. അങ്ങനെയൊരു അവസരം ഒരു നടിക്ക് ജീവിതത്തിൽ ഒരിക്കൽ മാത്രമേ ലഭിക്കൂ.
ആ ഭാഗ്യം എനിക്ക് കിട്ടിയതാണ്. എനിക്ക് കഴിയുന്ന പരമാവധി ഞാൻ ഈ സിനിമക്ക് നൽകിയിട്ടുണ്ട്. തിയേറ്ററിൽ തന്നെ അനുഭവിക്കേണ്ട സിനിമയാണ് മസ്തിഷ്ക മരണം’ — രജീഷ വിജയൻ ആത്മവിശ്വാസത്തോടെ പറയുന്നു.
English Summary
Actor Rajisha Vijayan opened up about her dramatic physical transformation for the film Masthishka Maranam, revealing that she lost 15 kg in six months solely for the role. Despite being comfortable with her body earlier, she embraced the change as the film demanded intense physical effort. Speaking during Manorama Online’s Soul Side interview series marking her 10-year journey across Malayalam, Tamil, and Telugu cinema, Rajisha described the project as one of the most unique experiences of her career. Directed by National Award-winning filmmaker Krishand, the film features unconventional looks and even an item dance — something Rajisha had never attempted before. She calls Masthishka Maranam a once-in-a-lifetime role and urges audiences to experience it on the big screen.
rajisha-vijayan-weight-loss-masthishka-maranam-interview
Rajisha Vijayan, Masthishka Maranam, Malayalam Cinema, Actor Transformation, Weight Loss for Film, Krishand Director, Soul Side Interview, Women in Cinema
