രാഹുലിനായി ക്ഷേത്രത്തിൽ പൂജയും പള്ളിയിൽ കുർബാനയും
ബലാത്സംഗ കേസിൽ അറസ്റ്റിലായി റിമാൻഡിൽ കഴിയുന്ന പാലക്കാട് എംഎൽഎ രാഹുൽ മാങ്കൂട്ടത്തിലിന്റെ നിയമപരവും രാഷ്ട്രീയവുമായ പ്രതിസന്ധികൾ മാറുന്നതിനായി പ്രത്യേക പൂജകളും പ്രാർത്ഥനകളും നടത്തിയതായി റിപ്പോർട്ട്.
യൂത്ത് കോൺഗ്രസ് പത്തനംതിട്ട ജില്ലാ ജനറൽ സെക്രട്ടറി റെജോ വള്ളംകുളമാണ് ക്ഷേത്രത്തിലും പള്ളിയിലും വഴിപാടുകൾ നടത്തിയത്. സംഭവത്തെ തുടർന്ന് രാഷ്ട്രീയ വൃത്തങ്ങളിൽ ചർച്ചകൾ ശക്തമായിരിക്കുകയാണ്.
റെജോ വള്ളംകുളം നന്നൂർ ദേവി ക്ഷേത്രത്തിലെത്തി ശത്രുസംഹാര പൂജയും ഭാഗ്യസൂക്താർച്ചനയും നടത്തിയതായി വ്യക്തമാക്കുന്നു. തുടർന്ന് പുതുപ്പള്ളി പള്ളിയിൽ മൂന്ന് കുർബാനകളും അർപ്പിച്ചുവെന്നും അദ്ദേഹം അറിയിച്ചു.
രാഹുൽ മാങ്കൂട്ടത്തിൽ നിലവിൽ നേരിടുന്ന തിരിച്ചടികളും പ്രതിസന്ധികളും മാറുന്നതിനായാണ് ഈ പ്രാർത്ഥനകളും വഴിപാടുകളും നടത്തിയതെന്നാണ് റെജോയുടെ വിശദീകരണം.
പാർട്ടിയുമായി ഇപ്പോൾ തനിക്ക് ഔദ്യോഗിക ബന്ധമില്ലെന്നും, എന്നാൽ ഒരു യുവനേതാവിനെതിരെ നടക്കുന്ന വ്യക്തിഹത്യയ്ക്ക് എതിരായ വ്യക്തിപരമായ നിലപാടിന്റെ ഭാഗമായാണ് താൻ ഇത്തരമൊരു നടപടി സ്വീകരിച്ചതെന്നും റെജോ പറഞ്ഞു.
രാഹുൽ മാങ്കൂട്ടത്തിൽ വളർന്നു വരുന്ന ഒരു നേതാവാണെന്നും, അദ്ദേഹത്തെ രാഷ്ട്രീയമായി ഇല്ലാതാക്കാനുള്ള ശ്രമങ്ങളാണ് നടക്കുന്നതെന്നുമാണ് അനുയായിയുടെ വാദം.
അതേസമയം, മൂന്നാമത്തെ ബലാത്സംഗ കേസിലും പ്രതിയായതോടെ രാഹുൽ മാങ്കൂട്ടത്തിലിന്റെ എംഎൽഎ സ്ഥാനം നഷ്ടമാകുമോയെന്ന ചർച്ചകൾ വീണ്ടും സജീവമായിരിക്കുകയാണ്.
എന്നാൽ അയോഗ്യതാ നടപടികൾ അത്ര ലളിതമല്ലെന്നാണ് നിയമവിദഗ്ധർ ചൂണ്ടിക്കാട്ടുന്നത്. ബന്ധപ്പെട്ട നിയമോപദേശങ്ങൾ പരിശോധിച്ച ശേഷം മാത്രമേ നിയമസഭാ സെക്രട്ടേറിയറ്റ് ഇക്കാര്യത്തിൽ അന്തിമ തീരുമാനമെടുക്കുകയുള്ളൂവെന്നാണ് സൂചന.
ഇതിനിടെ, രാഹുൽ മാങ്കൂട്ടത്തിലിനെ പാർട്ടിയിൽ നിന്ന് പുറത്താക്കിയതായും നിലവിൽ അദ്ദേഹവുമായി കോൺഗ്രസിന് യാതൊരു ബന്ധവുമില്ലെന്നുമാണ് കോൺഗ്രസ് നേതൃത്വത്തിന്റെ ഔദ്യോഗിക നിലപാട്.
കേസുമായി ബന്ധപ്പെട്ട് പാർട്ടി നേരത്തെ തന്നെ കടുത്ത നിലപാട് സ്വീകരിച്ചിട്ടുണ്ടെന്നും നേതൃത്വം ആവർത്തിച്ച് വ്യക്തമാക്കിയിട്ടുണ്ട്.
ഇക്കാര്യങ്ങൾക്കിടയിലാണ് അതിജീവിതയെ ഭീഷണിപ്പെടുത്തുന്ന തരത്തിലുള്ള വാട്സാപ്പ് സന്ദേശങ്ങൾ രാഹുൽ മാങ്കൂട്ടത്തിലിന്റേതെന്ന പേരിൽ പുറത്തുവന്നത്.
തനിക്കെതിരെ നിൽക്കുന്നവർക്ക് അതേ രീതിയിൽ തിരിച്ചടി നൽകുമെന്നും, ആരെയും ഭയപ്പെടില്ലെന്നും സന്ദേശങ്ങളിൽ പറയുന്നുണ്ട്.
താൻ മാത്രമാകില്ല കുറ്റക്കാരനെന്നും, യഥാർത്ഥ സത്യം പുറത്തുകൊണ്ടുവരുമെന്നും സൂചിപ്പിക്കുന്ന തരത്തിലുള്ള സംഭാഷണങ്ങളാണ് പുറത്തുവന്നിരിക്കുന്നത്.
ഈ സന്ദേശങ്ങൾ കേസിൽ നിർണായക തെളിവുകളാകുമോയെന്ന കാര്യവും പൊലീസ് പരിശോധിച്ചുവരികയാണ്. സംഭവവികാസങ്ങൾ കേരള രാഷ്ട്രീയത്തിൽ വലിയ വിവാദങ്ങൾ സൃഷ്ടിച്ചിരിക്കുകയാണ്.
