നിലമ്പൂര്: നിലമ്പൂര് ഉപതിരഞ്ഞെടുപ്പിലെ തൃണമൂല് കോണ്ഗ്രസ് സ്ഥാനാര്ഥി പി.വി.അന്വറിന്റെ സ്വത്തുവിവരങ്ങൾ പുറത്ത്. അന്വറിന്റെ സ്ഥാവര- ജംഗമ ആസ്തികളുടെ മൊത്തം മൂല്യം 34.07 കോടി രൂപയാണ്. 20.60 കോടി രൂപയുടെ ബാധ്യതയും അന്വറിനുണ്ട്.
തിരഞ്ഞെടുപ്പ് നാമനിര്ദേശത്തോടൊപ്പം സമര്പ്പിച്ച സത്യവാങ്മൂലത്തിലാണ് അന്വര് ഇക്കാര്യം വെളിപ്പെടുത്തിയത്. കൈവശമുള്ള പണം 25000 രൂപയാണെന്നും അന്വര് സത്യവാങ്മൂലത്തില് വ്യക്തമാക്കി.
രണ്ട് ഭാര്യമാരുടെ കൈവശവും 10000 രൂപ വീതമുണ്ട്. 1.06 കോടി രൂപ വിലമതിക്കുന്ന 150 പവന് ആഭരണം ഓരോ ഭാര്യമാരുടെയും പക്കലുണ്ട്. 18.14 കോടി രൂപയുടെ ജംഗമ ആസ്തിയാണ് അന്വറിനുള്ളത്. ബാങ്ക് വായ്പയും മറ്റുമായി 20 കോടിയുടെ ബാധ്യതയും ഉണ്ട്.
2021-ല് മത്സരിച്ചപ്പോള് 18.57 കോടി രൂപയായിരുന്നു അന്വറിന്റെ ജംഗമ ആസ്തി. 16.94 കോടി രൂപയുടെ ബാധ്യതയും ഉണ്ടായിരുന്നു. അതേസമയം പണമില്ലാത്തതിനാല് മത്സരിക്കാനില്ലെന്ന് അന്വര് നേരത്തെ പറഞ്ഞിരുന്നു.
‘എല്ലാവരും തകര്ത്തു തരിപ്പണമാക്കി, ഞാന് കടക്കാരനായി, ഉടനെ ജപ്തി വരും. ഒരിഞ്ചുഭൂമി പോലും വില്ക്കാന് പറ്റാതാക്കി’ എന്നാണ് അന്വര് കഴിഞ്ഞ ദിവസം പറഞ്ഞിരുന്നത്. എന്നാല് തൊട്ടടുത്ത ദിവസം തന്നെയാണ് അന്വര് തൃണമൂല് കോണ്ഗ്രസ് സ്ഥാനാര്ഥിയായി മത്സരിക്കുമെന്ന് പ്രഖ്യാപിച്ചത്.
