കൊച്ചി: സ്കോച്ച് വിസ്കി ആരാധകർക്കൊരു സന്തോഷവാർത്ത. രാജ്യത്ത് സ്കോച്ച് വിസ്കിയുടെ വില വരും മാസങ്ങളിൽ കുത്തനെ ഇടിയുമെന്നാണ് റിപ്പോർട്ട്. ഇന്ത്യ-യു.കെ ഫ്രീ ട്രേഡ് കരാറിൽ ഒപ്പിട്ടതോടെയാണ് വില കുറയുന്നത്. സ്കോട്ലൻഡ്, അയർലൻഡ് യു.കെ എന്നിവിടങ്ങളിൽ നിന്ന് ഇറക്കുമതി ചെയ്യുന്ന വിസ്കിയുടെ ഇറക്കുമതി ചുങ്കം നേരത്തെ 150 ശതമാനമായിരുന്നു.
പുതിയ കരാറ് പ്രകാരം ഇത് 75 ശതമാനമായും പിന്നീട് 40 ശതമാനമായും കുറയും. നികുതിയിൽ വലിയ കുറവുണ്ടാകുന്നതോടെ വിലയും ഇടിയാനുള്ള സാധ്യത കൂടുതലാണ്. 5,000 രൂപയ്ക്ക് മുകളിൽ വിലയുണ്ടായിരുന്നവ 3,500-4000 നിരക്കിലേക്ക് വില കുറയുമെന്നാണ് പ്രതീക്ഷിക്കുന്നത്. രണ്ടു വർഷത്തിനുള്ളിൽ ഈ നിരക്കിലും താഴെ സ്കോച്ച് വിസ്കി ലഭിക്കുമെന്നും ഈ രംഗത്തെ വിദഗ്ധർ പറയുന്നു.
നികുതി കുത്തനെ കുറയുന്നതോടെ ഇന്ത്യയിലേക്കുള്ള സ്കോച്ച് വിസ്കി കയറ്റുമതി അടുത്ത അഞ്ച് വർഷത്തിനുള്ളിൽ ഒരു ബില്യൺ ഡോളറാകുമെന്ന് യു.കെയിലെ സ്കോച്ച് വിസ്കി അസോസിയേഷൻ ചീഫ് എക്സിക്യൂട്ടീവ് ഓഫീസർ മാർക് കെന്റ് പറഞ്ഞു. വിസ്കി വില കുറയുന്നത് യു.കെയിൽ നിന്നുള്ള കൂടുതൽ ബ്രാൻഡുകൾ ഇന്ത്യയിലേക്ക് വരുന്നതിന് കാരണമാകും.
അടുത്തിടെ ഇന്ത്യ യു.എസിൽ നിന്നുള്ള വിസ്കി ഇറക്കുമതിക്കുള്ള നികുതി കുത്തനെ വെട്ടിക്കുറച്ചിരുന്നു. ജനപ്രിയ ബ്രാൻഡുകളായ ജാക് ഡാനിയേൽസ്, ജിം ബീം എന്നിവയുടെ വില കുറയാൻ ഇത് വഴിയൊരുക്കിയിരുന്നു. 150 ശതമാനത്തിൽ നിന്ന് 50 ശതമാനമായിട്ടായിരുന്നു നികുതി കുറച്ചത്.
