തിരുവനന്തപുരം: സംസ്ഥാനത്ത് ലഹരിവ്യാപാരവും കടത്തും നടക്കുന്ന 1,377 ബ്ലാക്ക്സ്പോട്ടുകൾ കണ്ടെത്തി പൊലീസ്. 472പൊലീസ് സ്റ്റേഷൻ പരിധിയിലാണിവയുള്ളത്.
ഏറ്റവും കൂടുതൽ തിരുവനന്തപുരം സിറ്റിയിലാണ്.235 എണ്ണം, തിരുവനന്തപുരം റൂറലിൽ 118, മലപ്പുറത്ത്92. ഇത്തരത്തിൽ കണ്ടെത്തിയ ബ്ലാക്ക്സ്പോട്ടുകളിൽ തുടർച്ചയായി ഡ്രോൺപരിശോധന നടത്തി ലഹരിയിടപാടുകാരെയും ഉപയോഗിക്കുന്നവരെയും പിടികൂടുമെന്ന് എ.ഡി.ജി.പി മനോജ് എബ്രഹാം പറഞ്ഞു.
ഡ്രോൺ ദൃശ്യങ്ങൾ പരിശോധിച്ച് പരിശോധനകൾ നടത്തും. സംഭരണ-വിതരണ കേന്ദ്രങ്ങളും ലഹരിയെത്തിക്കുന്ന വാഹനങ്ങളും കണ്ടെത്തി പിടികൂടും. കാരിയർമാരായ സ്ത്രീകളെയടക്കം തിരിച്ചറിയാനുമാവും. ഇതിനായി 472സ്റ്റേഷനുകളിൽ പ്രത്യേക സ്ക്വാഡുകൾ രൂപീകരിച്ചു.
ബ്ലാക്ക്സ്പോട്ടുകളിലെ സ്കൂളുകൾക്കും കോളേജുകൾക്കുമടുത്തുള്ള തട്ടുകടകളിൽ ലഹരി വ്യാപാരമുണ്ടെന്നും കണ്ടെത്തിയിട്ടുണ്ട്. എം.ഡി.എം.എ അടക്കമുള്ള രാസലഹരിയാണ് കൂടുതലും വിൽക്കുന്നത്.
ലഹരിയൊഴുക്ക് തടയാൻ വിവിധ ഏജൻസികളെ ഏകോപിപ്പിക്കും. ഇതിനായി സംസ്ഥാനതലത്തിൽ ചീഫ്സെക്രട്ടറിയും ജില്ലാതലത്തിൽ കളക്ടറും തലവനായി നാർകോ- കോഓർഡിനേഷൻ സെന്ററും സജ്ജമാക്കിയിട്ടുണ്ട്.
ലഹരിയിടപാടുകാരുടെ ചിത്രങ്ങളടക്കമുള്ള വിവരങ്ങൾ ദേശീയ ഡേറ്റാബേസായ നിദാനിലേക്ക് (നാഷണൽ ഇന്റഗ്രേറ്റഡ് ഡേറ്റാബേസ് ഓൺ അറസ്റ്റഡ് നാർക്കോ ഒഫൻഡേഴ്സ്) നൽകും. കേസന്വേഷണത്തിന് സഹായകരമാണിത്.
ബ്ലാക്ക്സ്പോട്ടുകൾക്ക് മുകളിൽ ഡ്രോൺപറത്തി പൊലീസ് ദൃശ്യങ്ങളെടുക്കുന്നതാണ് ആദ്യഘട്ടം.ഇവ സ്റ്രേഷനുകളിലും കൺട്രോൾറൂമുകളിലും തത്സമയം പരിശോധിക്കും. ലഹരിവില്പനക്കാരെയും ഉപയോഗിക്കുന്നവരെയും ഉടനടി അറസ്റ്റിലാക്കും.
ലഹരിവില്പന കേന്ദ്രങ്ങളിൽ ദൃശ്യങ്ങളുടെ അടിസ്ഥാനത്തിൽ റെയ്ഡു നടത്താം.വളരെ ഉയരത്തിൽ നിന്ന് രഹസ്യമായി ദൃശ്യങ്ങൾ പകർത്താനാവും. ഇതിനായി സ്റ്റേഷനുകൾക്ക് ഡ്രോൺ വാടകയ്ക്കെടുക്കാം, വാങ്ങാം.
ബ്ലാക്ക്സ്പോട്ടുകൾ
(ജില്ല, പൊലീസ് സ്റ്റേഷൻ,
ബ്ലാക്ക് സ്പോട്ടുകൾ ക്രമത്തിൽ)
തിരുവനന്തപുരം………………..59,353
കൊല്ലം……………………………….35,95
പത്തനംതിട്ട……………………….14,34
ആലപ്പുഴ…………………………….30,56
കോട്ടയം……………………………..45,70
ഇടുക്കി……………………………….22, 52
എറണാകുളം……………………..57,133
തൃശൂർ……………………………….39,117
പാലക്കാട്…………………………..35,82
മലപ്പുറം……………………………..34,92
കോഴിക്കോട്………………………34,112
വയനാട്……………………………..17,26
കണ്ണൂർ……………………………….33,66
കാസർകോട്……………………..18,83
ലഹരി കേസ്, അറസ്റ്റ്
(പൊലീസിന്റെ കണക്ക്)
2022…………26565, 29514
2023…………30555,33062
2024…………27415,29706
10,829.88 കിലോ
3 വർഷത്തിനിടെ
പിടികൂടിയ കഞ്ചാവ്
ലഹരിവിവരങ്ങൾ
അറിയിക്കാം
9497927797, 9497979794
(ആന്റിനാർക്കോട്ടിക് സെൽ)
പിടികൂടിയ എം.ഡി.എം.എ
2022ൽ———14.03കിലോ
2023ൽ———-14.97കിലോ
2024ൽ———–24.71കിലോ
2025ൽ————1.7കിലോ
തീരെചെറിയ അളവിൽ ഉപയോഗിച്ചാലും മണിക്കൂറുകളോളം ഉന്മാദത്തിലാക്കുന്ന മയക്കുമരുന്നാണ് എംഡിഎംഎ.
