കര്ണാടകയില് ബിജെപി എംഎല്എ രാഷ്ട്രീയ എതിരാളികളെ എയ്ഡ്സ് ബാധിതരാക്കാനും ഹണിട്രാപ്പില് കുടുക്കാനും ശ്രമിച്ചെന്ന് പോലീസിൻ്റെ കുറ്റപത്രം. രാജരാജേശ്വരി നഗര് എംഎല്എയായ ബിജെപി നേതാവ് മുനിരത്നയ്ക്കെതിരെ കര്ണാടക പൊലീസ് സമര്പ്പിച്ച കുറ്റപത്രത്തിലാണ് അതിനിര്ണായക വിവരങ്ങളുള്ളത്.
എംഎല്എ പല തവണ മാനഭംഗപ്പെടുത്തിയെന്ന് സാമൂഹ്യ പ്രവര്ത്തകയായ 40കാരി പരാതി നല്കിയതിനെ തുടര്ന്ന് സര്ക്കാര് പ്രത്യേക അന്വേഷണ സംഘത്തെ നിയോഗിക്കുകയായിരുന്നു. തുടര്ന്ന് നടത്തിയ അന്വേഷണത്തിലാണ് പൊലീസ് കുറ്റപത്രം സമര്പ്പിച്ചത്. പ്രതിപക്ഷ നേതാവ് ആര് അശോകയെ എച്ച്ഐവി സാന്നിധ്യമുള്ള രക്തം കുത്തിവയ്ക്കാന് ശ്രമിച്ചെന്നാണ് പോലീസ്അന്വേഷണത്തില് കണ്ടെത്തിയിട്ടുള്ളത്.
ബിജെപി ഭരണത്തില് മുനിരത്ന റവന്യു മന്ത്രിയായിരിക്കെയാണ് പ്രതിപക്ഷ നേതാവിനെതിരെ നീചമായ നീക്കം നടത്തിയതെന്ന് കുറ്റപത്രത്തിൽ പറയുന്നു. ഇതിനായി പൊലീസ് ഉദ്യോഗസ്ഥനായ ഇയാന് റെഡ്ഡിയുമായി ചേര്ന്ന് മുനിരത്ന ഗൂഢാലോചന നടത്തി. എന്നാല് പദ്ധതി പരാജയപ്പെട്ടെന്നും കുറ്റപത്രത്തില് ഉണ്ട്.
2481 പേജുള്ള കുറ്റപത്രത്തില് 146 സാക്ഷി മൊഴികളുണ്ട്. തെളിവുകളായി 850 രേഖകളും ഹാജരാക്കി. രാഷ്ട്രീയ എതിരാളികളെ ഹണിട്രാപ്പിലൂടെ കുടുക്കാന് ശ്രമിച്ചെന്നും പോലീസ് കണ്ടെത്തി. തന്നെ ഹണിട്രാപ്പിനായി ഉപയോഗിക്കാന് ശ്രമിച്ചെന്ന പരാതിക്കാരിയുടെ വാദത്തിന് തെളിവുണ്ടെന്നും കുറ്റപത്രത്തില് പറയുന്നു
