ബ്രാൻഡഡ് കള്ള് വിൽക്കാം: ടോഡി പാർലർ തുടങ്ങാം
കൊച്ചി: കുപ്പിയിലാക്കി കള്ള് ബ്രാൻഡ് ചെയ്തുവിൽക്കാനും പ്രധാന ടൂറിസം കേന്ദ്രങ്ങളിൽ നക്ഷത്ര പദവിയുള്ള കള്ള് ഷാപ്പുകൾ ടോഡി പാർലറെന്ന പേരിൽ ആരംഭിക്കാനും അനുമതിയായി.
കള്ള് വ്യവസായം നവീകരിക്കുന്നതിനുള്ള കേരള കള്ള് വ്യവസായ വികസന ബോർഡിന്റെ 15 ശുപാർശകളിൽ അഞ്ചെണ്ണത്തിനാണ് അനുമതി ആയത്. അനുമതി നൽകി നികുതി വകുപ്പിന്റെ ഉത്തരവിറങ്ങി. ഇതിന്റെ മേൽനോട്ടം ടോഡി ബോർഡിനാണ്.
റസ്റ്റോറന്റ് കം ടോഡി പാർലറുകൾ ആരംഭിക്കുന്നതിനുള്ള താത്പര്യപത്രം അടുത്തയാഴ്ച ക്ഷണിക്കുമെന്നാണ് റിപ്പോർട്ട്. കുപ്പിയിലാക്കി കള്ള് വിപണിയിലിറക്കുന്നതിനുള്ള സാങ്കേതികവിദ്യ സമർപ്പിക്കാൻ ദേശീയ തലത്തിൽ താത്പര്യ പത്രം ക്ഷണിക്കുമെന്നാണ് വിവരം. ടോഡി ബോർഡ് സമിതിയാണ് ഇത്തരത്തിൽ പാർലറുകളുടെ നക്ഷത്ര പദവി നിർണയിക്കുക.
എന്നാൽ നടപ്പാക്കാൻ പറ്റാത്ത വ്യവസ്ഥകളാണ് ഇവയെന്ന് കള്ള് ഷാപ്പ് കരാറുകാരുടെ സംഘടന ആരോപിക്കുന്നു. ബാർ ഹോട്ടലുകൾക്ക് 200 മീറ്റർ ദൂരപരിധിയുള്ളപ്പോൾ വീര്യം കുറഞ്ഞ കള്ള് വിൽക്കുന്ന ഷാപ്പുകൾക്ക് 400 മീറ്ററാണ് ദുരപരിധി .
ഇത് കുറയ്ക്കാതെയുള്ളപരിഷ്കാരങ്ങൾ പ്രായോഗികമല്ലെന്നാണ് ഇപ്പോഴുമുള്ള നിലപാട്.
അംഗീകരിച്ചശുപാർശകൾ
കളള് ഷാപ്പുകൾക്ക് സ്റ്റാർ പദവി നൽകി നിലവാരം ഉയർത്തുക
ടൂറിസം കേന്ദ്രങ്ങളിൽ സ്റ്റാർ പദവിയിൽ ടോഡി പാർലറുകൾ
കള്ളുഷാപ്പുകളെ പൊതുബ്രാൻഡിലാക്കി ഏകീകൃത ഡിസൈൻ
കേരള ടോഡി ബ്രാൻഡിൽ ബോട്ടിൽ ചെയ്ത് കുപ്പിയിൽ കള്ള്
അധിക കള്ള് കുടുംബശ്രീയുമായി ചേർന്ന് വിനാഗിരിയാക്കി വിൽക്കുക
ബിയറിന് സമാനമായി കള്ള് കുപ്പിയിലാക്കി വിപണിയിലിലേക്ക്…വിപ്ളവകരമായ മാറ്റത്തിനൊരുങ്ങി ടോഡി ബോർഡ്
കൊച്ചി: സംസ്ഥാനത്ത് കള്ള് വ്യവസായത്തിൽ വിപ്ളവകരമായ മാറ്റത്തിനൊരുങ്ങി ടോഡി ബോർഡ്. ബിയറിന് സമാനമായി കള്ള് കുപ്പിയിലാക്കി വിപണിയിലിറക്കാനുള്ള സാദ്ധ്യതയാണ് തേടുന്നത്.
കള്ളിന്റെ തനത് രുചി നിലനിറുത്തി, കൂടുതൽ പുളിക്കാതെയും ആൾക്കഹോൾ അനുപാതം മാറാതെയും ഒരു വർഷത്തിലേറെ ഇത് സാധാരണ അന്തരീക്ഷത്തിൽ സൂക്ഷിക്കാം എന്നതാണ് പ്രത്യേകത.
കളമശേരി കിൻഫ്ര ബയോടെക്നോളജി ഇൻകുബേഷൻ സെന്ററിൽ പ്രവർത്തിക്കുന്ന സ്കോപ്ഫുൾ ബയോ റിസർച്ച് കുപ്പിയിലടച്ച കള്ള് അവതരിപ്പിച്ചിരുന്നു.
ബയോടെക്നോളജി പാർക്കിൽ ടോഡി ബോർഡ് ചെയർമാൻ യു.പി.ജോസഫ്, സി.ഇ.ഒ ജി.അനിൽകുമാർ തുടങ്ങിയവർ ഇത് കണ്ടും രുചിച്ചും പരിശോധിച്ചിരുന്നു.
2000 ലിറ്റർ കള്ള് ദിവസവും ജൈവരീതിയിൽ സംസ്കരിക്കാനുള്ള ബോട്ടിലിംഗ് യൂണിറ്റ് സ്ഥാപിക്കാൻ 30 ലക്ഷംരൂപ ചെലവുവരുമെന്ന് ബയോ റിസർച്ച് സി.ഇ.ഒ ഡോ.മോഹൻകുമാർ അറിയിച്ചു. 25 ചെത്തുതൊഴിലാളികളും ആറ് ജീവനക്കാരും അടങ്ങുന്നതാകും യൂണിറ്റ്.
ബയോറിസർച്ച് ഡയറക്ടർ ഡോ.ശാലിനി ഭാസ്കർ, ടോഡി ബോർഡ് അംഗങ്ങളായ കിഷോർകുമാർ, ഡി.പി.മധു, എം.സി.പവിത്രൻ, എ.പ്രദീപ്, ഡോ.ഗീതാലക്ഷ്മി, എക്സൈസ് ജോ.കമ്മിഷണർ ജെ.താജുദീൻകുട്ടി എന്നിവരും സംഘത്തിലുണ്ടായിരുന്നു
English Summary :
Permission has been granted to bottle and brand toddy for sale, and to open star-rated toddy shops under the name “Toddy Parlours” in major tourist destinations.
