പന്തീരാങ്കാവ് ഗാര്ഹിക പീഡനക്കേസ് റദ്ദാക്കണമെന്ന് ആവശ്യപ്പെട്ട് പ്രതി രാഹുല് ഹൈക്കോടതിയില്. ഭാര്യയുമായുള്ള എല്ലാ തെറ്റിദ്ധാരണകളും മാറിയെന്നും ഭാര്യയോടൊപ്പം ഒരുമിച്ചു പോകാന് തീരുമാനിച്ചെന്നും രാഹുൽ പറഞ്ഞു. ഭാര്യയുടെ സത്യവാങ്മൂലം മാനിച്ച് തനിക്കെതിരായ കേസ് റദ്ദാക്കണമെന്ന് രാഹുല് ഹൈക്കോടതിയില് നല്കിയ ഹര്ജിയില് ആവശ്യപ്പെട്ടു. ഹര്ജി ഹൈകോടതി ഇന്ന് പരിഗണിക്കും. (Another twist in Pantheerankavu Domestic Violence case)
താനും ഭാര്യയുമായുള്ള എല്ലാ പ്രശ്നങ്ങളും ഒത്തുതീര്പ്പായി. തെറ്റിദ്ധാരണകളെല്ലാം മാറി. ഒരുമിച്ച് ജീവിക്കാനാണ് താല്പ്പര്യം. കേസ് പിന്വലിക്കുകയാണെന്ന് കാണിച്ച് യുവതി സത്യവാങ്മൂലത്തില് ഒപ്പിട്ടു നല്കിയിട്ടുണ്ട്. ഈ സത്യവാങ്മൂലം പരിഗണിച്ച് കേസ് റദ്ദാക്കണണെന്നാണ് രാഹുല് ആവശ്യപ്പെടുന്നത്.
പന്തീരാങ്കാവ് ഗാര്ഹിക പീഡനക്കേസില് ഇതിനോടകം നിരവധി വഴിത്തിരിവുകളാണ് ഉണ്ടായത്. ഭര്തൃവീട്ടില് വെച്ച് മര്ദ്ദനമേറ്റതായി യുവതിയും കുടുംബവും പരാതി നല്കുന്നതോടെയാണ് കേസിന് തുടക്കം. മര്ദ്ദനമേറ്റതിന്റെ പാടുകളും യുവതി മാധ്യമങ്ങള്ക്ക് മുന്നില് കാണിച്ചിരുന്നു. യുവതിയുടെ രഹസ്യമൊഴി രേഖപ്പെടുത്തുകയും ചെയ്തിരുന്നു.
എന്നാല് പിന്നീട് യുവതിയെ കാണാനില്ലെന്ന് വീട്ടുകാര് വെളിപ്പെടുത്തിയതിന് പിന്നാലെ, യൂട്യൂബ് വീഡിയോയിലൂടെ രാഹുല് നിരപരാധിയാണെന്ന് പറഞ്ഞ് യുവതി പ്രത്യക്ഷപ്പെട്ടു. രാഹുല് മര്ദ്ദിച്ചിട്ടുണ്ട്. എന്നാല് അത് സ്ത്രീധനവുമായി ബന്ധപ്പെട്ടുള്ള പീഡനമായിരുന്നില്ല. വീട്ടുകാരുടെ സമ്മര്ദ്ദത്തിന് വഴങ്ങിയാണ് രാഹുലിനെതിരെ പരാതി നല്കിയതെന്നും യുവതി പറഞ്ഞു രംഗത്ത് എത്തുകയായിരുന്നു.
Read More: രാഹുൽ പാലക്കാട്ടേക്ക്, ചേലക്കരയിൽ പരിഗണന രമ്യാ ഹരിദാസിന്; സ്ഥാനാർത്ഥി ചർച്ചകൾ സജീവമാക്കി കോൺഗ്രസ്
