ഉറ്റവരുടെ മൃതദേഹം പോസ്റ്റുമോർട്ടം ചെയ്യാൻ വെളളം കോരിക്കൊടുക്കേണ്ട ഗതികേടിൽ കായംകുളം താലൂക്ക് ആശുപത്രിയിൽ മരിച്ചവരുടെ ബന്ധുക്കൾ. പോസ്റ്റ്മോർട്ടം നടത്തുന്നതിന് ടാങ്കില് വെള്ളം ഇല്ലാതെ വന്നതിനെ തുടർന്നാണ് ദാരുണ സംഭവം അരങ്ങേറിയത്. ആംബുലൻസ് ഡ്രൈവർമാരെയും മൃതദേഹം കൊണ്ടുവന്ന ബന്ധുക്കളെയും കൊണ്ടാണ് വെള്ളം കോരിച്ചത്. ഉച്ചയായിട്ടും പോസ്റ്റ്മോർട്ടം നടത്തി മൃതദേഹങ്ങൾ വിട്ടു നൽകാതാത്തതിനെ തുടര്ന്ന് ബന്ധുക്കൾ അന്വേഷിച്ചപ്പോഴാണ് വെള്ളമില്ലാത്തതിനാൽ പോസ്റ്റ്മോർട്ടം നടത്താന് കഴിയുന്നില്ലെന്ന് അറിയുന്നത്. ടാങ്കിലേക്ക് വെള്ളം എത്തിക്കുന്ന പമ്പിങ് മോട്ടർ തകരാറിലായതാണ് കാരണമെന്നായിരുന്നു ആശുപത്രി അധികൃതരുടെ വിശദീകരണം. മണിക്കൂറുകൾ കഴിഞ്ഞിട്ടും പരിഹാരം ഇല്ലാതായതോടെ ബന്ധുക്കളോടും ആംബുലൻസ് ഡ്രൈവർമാരോടും വെള്ളം കോരിക്കൊണ്ട് വരാന് അധികൃതര് നിര്ദേശിച്ചു.
പ്രിയപ്പെട്ടവരുടെ മൃതദേഹം വിട്ടു കിട്ടാന് വേറെ മാര്ഗമില്ലാതെ വന്നതോടെ പലരും സമീപത്തെ കിണറ്റിൽ നിന്നും വെള്ളം കോരാന് തയ്യാറായി. ഇതിനിടെ ചിലര് പ്രതിഷേധവുമായി രംഗത്തെത്തി. ഒടുവിൽ മോർച്ചറിക്ക് സമീപം മറ്റൊരു ടാങ്ക് വച്ച് ആശുപത്രിയിലെ നിർമ്മാണം നടക്കുന്ന കെട്ടിടത്തിന് സമീപത്തുനിന്നും ഹോസ് ഇട്ട് വെള്ളം ശേഖരിച്ചാണ് പോസ്റ്റ്മോര്ട്ടം നടത്തിയത്. ഇതിൽ നിന്ന് ബക്കറ്റിൽ വെള്ളമെടുത്ത് ജീവനക്കാർ മോർച്ചറിക്കുള്ളിലേക്ക് എത്തിച്ച ശേഷമാണ് അഞ്ച് മൃതദേഹങ്ങളുടെ പോസ്റ്റുമോർട്ടം പൂർത്തീകരിച്ചത്. ആവശ്യത്തിന് വെള്ളം ഇല്ലാത്തത് മൂലം കഴിഞ്ഞ ഒരാഴ്ചയായി ഇവിടെ പോസ്റ്റ്മോര്ട്ടം നടപടികള് വൈകുകയാണ്.
Read Also: കറിയിൽ ഗ്രേവി കുറഞ്ഞതിന്റെ പേരിൽ പിറവത്ത് കൂട്ടയടി; ദമ്പതികൾക്ക് പരിക്കേറ്റു; 8 പേർ കസ്റ്റഡിയിൽ
