കൊല്ലം: ലോക്സഭാ തെരഞ്ഞെടുപ്പിൽ കൊല്ലം മണ്ഡലം എന്ഡിഎ സ്ഥാനാര്ത്ഥി കൃഷ്ണകുമാറിന് പരിക്കേറ്റ സംഭവത്തില് വിശദീകരണവുമായി അറസ്റ്റിലായ ബിജെപി പ്രവര്ത്തകൻ. പൊലീസ് കള്ളക്കേസില് കുടുക്കുകയായിരുന്നുവെന്ന് അറസ്റ്റിലായ സനല് ആരോപിച്ചു. കൃഷ്ണകുമാറിനെ ആക്രമിച്ചിട്ടില്ല, താൻ നിരപരാധിയാണ്. എല്ഡിഎഫ് പ്രവര്ത്തകരുടെ കള്ളമൊഴിയുടെ അടിസ്ഥാനത്തിലാണ് പൊലീസ് നടപടിയെന്നും സനല് ആരോപിച്ചു.
സ്ഥാനാർഥിയെ സ്വീകരിച്ചെങ്കിലും കണ്ണിൽ കൊണ്ടില്ലെന്നും മനപൂര്വം കെട്ടിചമച്ച കേസാണെന്നും ആണ് സനൽ പറയുന്നത്. കൃഷ്ണകുമാറിന് പരിക്കേറ്റ സംഭവത്തില് കഴിഞ്ഞ ദിവസമാണ് ബിജെപി പ്രവര്ത്തകനായ സനലിനെ പൊലീസ് അറസ്റ്റ് ചെയ്തത്. പിന്നീട് സ്റ്റേഷൻ ജാമ്യത്തില് വിട്ടു. കൃഷ്ണകുമാറിനെ സ്വീകരിക്കാനെത്തിയപ്പോൾ അബദ്ധത്തിൽ താക്കോൽ കൊണ്ടതാണെന്ന് സനല് പൊലീസിന് മൊഴി നൽകിയിരുന്നു.
എന്നാല്, തൃശൂർ പൂരം വിവാദത്തിൽ സിപിഎമ്മിനെതിരെ പ്രസംഗിച്ചതിന് ബോധപൂർവം ആക്രമിച്ചെന്നായിരുന്നു സ്ഥാനാർത്ഥിയുടെ പരാതി. ആയുധം ഉപയോഗിച്ച് ആക്രമിച്ചെന്ന കുറ്റമാണ് പൊലീസ് ചുമത്തിയത്. മുളവന ചന്തമുക്കിൽ വച്ചാണ് പ്രചാരണത്തിനിടെ കൃഷ്ണകുമാറിന് കണ്ണിന് പരിക്കേറ്റത്.
