മലപ്പുറം: തിരൂരങ്ങാടിയിൽ അനധികൃതമായി പ്രവർത്തിച്ചുവരുകയായിരുന്ന മൂലക്കുരു ക്ലിനിക്, അക്യുപങ്ചർ ചികിത്സ കേന്ദ്രം എന്നിവ അടച്ചുപൂട്ടി.Moolakuru Clinic and Acupuncture Treatment Center which were operating illegally in Thirurangadi were closed down
നഗരസഭ പരിധിയിലാണ് നിയമാനുസൃതമല്ലാത്ത ഈ സ്ഥാപനങ്ങൾ പ്രവർത്തിച്ചിരുന്നത്. ആരോഗ്യ വകുപ്പ്, ആയുർവേദ, പൊലീസ് എന്നിവരുടെ സംയുക്ത പരിശോധനയിലാണ് സ്ഥാപനങ്ങൾ അടച്ചുപൂട്ടിയത്.
മലപ്പുറം അസിസ്റ്റന്റ് കളക്ടർ വി.എം. ആര്യയുടെ അധ്യക്ഷതയിൽ കൂടിയ താലൂക്ക് വികസന സമിതി തീരുമാനപ്രകാരമാണ് നടപടി.
പൊതുജനാരോഗ്യ നിയമ പ്രകാരം നോട്ടീസ് നൽകിയിട്ടും തുടർന്ന് പ്രവർത്തിച്ചതിനും അനധികൃതമായി സ്ഥാപിച്ച ബോർഡുകൾ നീക്കം ചെയ്യാത്തതുമായ സ്ഥാപനങ്ങളിലാണ് വിവിധ വകുപ്പുകളുടെ സംയുക്ത പരിശോധനയിൽ അടച്ചുപൂട്ടിയത്.
ഈ സ്ഥാപനങ്ങളുടെ പരസ്യ ബോർഡുകൾ മൂന്ന് ദിവസത്തിനുള്ളിൽ മാറ്റാൻ നിർദേശം നൽകിയിട്ടുണ്ട്. ക്ലിനിക്കൽ എസ്റ്റാബ്ലിഷ്മൻറ് ആക്ട് പ്രകാരം നഗരസഭാ പരിധിയിൽ നിയമാനുസൃതമല്ലാത്ത ക്ലിനിക്കുകൾ നടത്താൻ പാടില്ല എന്ന് ലോക്കൽ പബ്ലിക് ഹെൽത്ത് ഓഫീസർ അറിയിച്ചു.
