കാസര്‍ഗോഡ്: പുലികളുടെ മുന്നില്‍ നിന്നും ബ്ലോക്ക് പഞ്ചായത്ത് ഓഫീസിലെ താത്കാലിക ജീവനക്കാരി രക്ഷപ്പെട്ടത് അത്ഭുതകരമായി. കഴിഞ്ഞദിവസം ഉച്ചയോടെ കൊട്ടംകുഴിയിലാണ് സംഭവം.
പഞ്ചായത്തിലെ ജോലി കഴിഞ്ഞ് വീട്ടിലേക്ക് മടങ്ങുകയായിരുന്നു കെ ശാരദ. കൊട്ടംകുഴിയില്‍ എത്തുന്നതിന് തൊട്ടു മുമ്പ് കാട്ടില്‍ നിന്നും രണ്ട് പുലികളോടി റോഡില്‍ കുറുകെ കടന്നുപോവുകയായിരുന്നു.
രണ്ടുപുലികളിലൊന്ന് ചെറുതായിരുന്നു. വലിയ പുലി തന്നെയൊന്നു നോക്കി പതിയെയാണ് നടന്നുപോയതെന്നും ശാരദ പറഞ്ഞു. പുലിയെ കണ്ട് പേടിച്ച ശാരദ അലറിക്കരഞ്ഞ് ഓടി രക്ഷപ്പെട്ടു. തൊട്ടടുത്തുള്ള വീട്ടില്‍ കയറിയാണ് രക്ഷപ്പെട്ടത്.
കൊട്ടംകുഴിയിലെ ഭൂരിഭാഗം ജനങ്ങളും ആശ്രയിക്കുന്ന റോഡിലാണ് പുലികള കണ്ടത്. മുമ്പ് രാത്രി കാലങ്ങളില്‍ ഇവിടെ പുലിയെ കണ്ടിട്ടുണ്ട്. ഇരിയണ്ണിയില്‍ ഹോട്ടല്‍ ജീവനക്കാരിക്കു മുന്‍പിലും പുലി ചാടി വീണിരുന്നു.
മുളിയാര്‍ പഞ്ചായത്തിലെ കാലിപ്പള്ളത്തും കഴിഞ്ഞ ദിവസം രാത്രി പുലിയുടെ ആക്രമണമുണ്ടായതായി റിപ്പോർട്ടുണ്ട്. ഇവിടെ സ്ഥിരമായി ഉണ്ടാകാറുള്ള ഒരു നായയെ കാണാതായി. റോഡില്‍ പുലിയുടെ കാല്‍പാടുകളും നായയെ കടിച്ചുവലിച്ചതിന്റെ പാടുകളും നാട്ടുകാര്‍ കണ്ടെത്തിയിരുന്നു.
