കൗണ്ടറിൽ പണം അടച്ച് ശീട്ടെടുക്കണ്ടാ, വിലപിടിപ്പുള്ള വഴിപാടുകൾ വേണ്ട; ഒരുപിടി കല്ലുപ്പ് നിവേദിച്ച് മനസ്സുരുകി പ്രാർത്ഥിച്ചാൽ അനുഗ്രഹിക്കുന്ന ദേവൻ

കൗണ്ടറിൽ പണം അടച്ച് ശീട്ടെടുക്കണ്ടാ, വിലപിടിപ്പുള്ള വഴിപാടുകൾ വേണ്ട; ഒരുപിടി കല്ലുപ്പ് നിവേദിച്ച് മനസ്സുരുകി പ്രാർത്ഥിച്ചാൽ അനുഗ്രഹിക്കുന്ന ദേവൻ

കൊച്ചി: കൗണ്ടറിൽ പണം അടച്ച് ശീട്ടെടുക്കുകയോ വിലപിടിപ്പുള്ള വഴിപാടുകൾ സമർപ്പിക്കുകയോ വേണ്ട. ഒരുപിടി കല്ലുപ്പ് നിവേദിച്ച് പ്രാർത്ഥിച്ചാൽ മനസ്സുരുകി അനുഗ്രഹിക്കുന്ന ദേവനാണ് വടക്കൻ പറവൂരിലെ മന്നം ശ്രീ സുബ്രഹ്മണ്യ സ്വാമി! 

ക്ഷേത്രത്തിലെ പ്രധാന വഴിപാടും അത്ഭുതവിശ്വാസത്തിന്റെ കേന്ദ്രവും കല്ലുപ്പാണ്.

അരിമ്പാറ, ശമിക്കാത്ത വടുക്കൾ, വിവിധ ത്വക്ക് രോഗങ്ങൾ എന്നിവയാൽ ബുദ്ധിമുട്ടുന്നവർ കല്ലുപ്പ് നിവേദിച്ച് പ്രാർത്ഥിച്ചാൽ രോഗശാന്തി ലഭിക്കുമെന്നാണ് ഭക്തരുടെ വിശ്വാസം.

 കല്ലുപ്പ് പ്രധാന നിവേദ്യമായുള്ള കേരളത്തിലെ ഏക ക്ഷേത്രമെന്ന പ്രത്യേകതയും മന്നം ക്ഷേത്രത്തിനുണ്ട്.

തൈപ്പൂയവും മഹാസ്കന്ദ ഷഷ്ഠിയും ക്ഷേത്രത്തിലെ പ്രധാന വിശേഷദിവസങ്ങളാണ്. 

ഉത്സവകാലത്ത് ക്ഷേത്രമണ്ഡപം ലോഡ് കണക്കിന് ഉപ്പുകൊണ്ട് നിറയുന്ന കാഴ്ചയാണ് കാണാനാകുന്നത്. നാരദമഹർഷി മഹാദേവന് സമ്മാനിച്ച പഴം പങ്കുവയ്ക്കുന്നതുമായി ബന്ധപ്പെട്ട തർക്കത്തെ തുടർന്ന് പാർവതീ–പരമേശ്വരന്മാരോട് കലഹിച്ച് കൈലാസം വിട്ട ബാലമുരുകൻ മന്നം ദേശത്ത് കുടിയേറിയതായാണ് ക്ഷേത്ര ഐതിഹ്യം.

മന്നത്തിൽ നിന്ന് ഏകദേശം ഒന്നര കിലോമീറ്റർ അകലെയായി ഒറ്റ ശ്രീകോവിലിൽ അനഭിമുഖമായി ശിവനെയും പാർവതിയെയും പ്രതിഷ്ഠിച്ചിരിക്കുന്ന നൂറ്റാണ്ടുകൾ പഴക്കമുള്ള പെരുവാരം മഹാദേവ ക്ഷേത്രവും സ്ഥിതിചെയ്യുന്നു.

 മന്നം ക്ഷേത്രത്തിൽ മകരമാസത്തിലെ തൈപ്പൂയവും, പെരുവാരം ക്ഷേത്രത്തിൽ മേടമാസത്തിലെ തിരുവാതിരയുമാണ് പ്രധാന ഉത്സവങ്ങൾ.

പെരുവാരം മഹാദേവ ക്ഷേത്രത്തിലെ ഒമ്പതാം ഉത്സവദിവസമായ വലിയവിളക്കിനാണ് പ്രത്യേക ചടങ്ങുകൾ നടക്കുന്നത്. വാദ്യമേളങ്ങൾ, തെയ്യം, കാവടി, താലപ്പൊലി എന്നിവയുടെ അകമ്പടിയോടെ ബാലമുരുകൻ പിതാവായ മഹാദേവനെ ദർശിക്കാൻ ആഘോഷപൂർവം എത്തും.

 അന്ന് ആ വർഷം പെരുവാരം ക്ഷേത്രത്തിൽ നടന്ന എല്ലാ ഉത്സവചടങ്ങുകളും ഒരിക്കൽ കൂടി ആവർത്തിക്കപ്പെടും.

പിറ്റേന്ന് മഹാദേവൻ മകന്റെ അടുത്തേക്ക് എഴുന്നള്ളി, സുബ്രഹ്മണ്യനൊപ്പം മന്നം ക്ഷേത്രക്കുളത്തിൽ ആറാടി മടങ്ങുന്നതോടെ ഉത്സവത്തിന് കൊടിയിറങ്ങും. 

തുടർന്ന് അടുത്ത ഉത്സവകാലംവരെ അച്ഛനും മകനും തമ്മിൽ അകൽച്ചയിലായിരിക്കുമെന്നാണ് വിശ്വാസം.

ഉപ്പ് വഴിപാടിന് ഭക്തർക്ക് പണമൊന്നും നൽകേണ്ടതില്ല. 

രാവിലെ 5 മുതൽ 11 വരെയും വൈകിട്ട് 5 മുതൽ 7.30 വരെയും ക്ഷേത്രത്തിലെത്തി വഴിപാട് നടത്താം. 

ശ്രീകോവിലിന് മുന്നിലുള്ള മണ്ഡപത്തിലാണ് ഉപ്പ് സമർപ്പിക്കേണ്ടത്. ദൂരദേശങ്ങളിൽ നിന്നുപോലും ദിവസേന നിരവധി ഭക്തർ ഉപ്പുനിവേദിക്കാനെത്തുന്നുണ്ടെന്ന് ക്ഷേത്ര ഭാരവാഹികൾ അറിയിച്ചു.

English Summary

At Mannam Sree Subrahmanya Swamy Temple in North Paravur, devotees need not offer money or expensive items. A handful of rock salt is the main offering, believed to cure skin diseases and chronic wounds. This is the only temple in Kerala where rock salt is the primary offering. Thaipooyam and Skanda Shashti are major festivals, closely linked with rituals involving the nearby Peruvaaram Mahadeva Temple.

mannam-subrahmanya-swamy-temple-rock-salt-offering

Mannam Temple, Subrahmanya Swamy, Rock salt offering, Kerala temples, Thaipooyam, Skanda Shashti, Peruvaaram Mahadeva Temple, Temple traditions, Devotional news