ഇളയമകള്‍ മഹാലക്ഷ്മിയെക്കുറിച്ചുള്ള വിശേഷങ്ങള്‍ തുറന്നു പറഞ്ഞ് നടന്‍ ദിലീപ്. മഹാലക്ഷ്മി യുകെജിയില്‍ ചേര്‍ന്നെന്നും ചെന്നൈയില്‍ ആണ് പഠനമെന്നും ദിലീപ് പറഞ്ഞു. ‘വോയ്സ് ഓഫ് സത്യനാഥന്‍’ എന്ന ഏറ്റവും പുതിയ ചിത്രത്തിന്റെ വിശേഷങ്ങള്‍ പങ്കുവയ്ക്കവേയാണ് ഒരു യൂട്യൂബ് ചാനലില്‍ മക്കളുടെ വിശേഷങ്ങള്‍ ദിലീപ് തുറന്നു പറഞ്ഞത്.
”മഹാലക്ഷ്മി ഭയങ്കര കാന്താരി ആണ്. രണ്ടു ദിവസം ഷൂട്ട് ഒക്കെ കഴിഞ്ഞ് ലേറ്റ് ആയിട്ടാണ് ഞാന്‍ ഉറങ്ങിയത്. അവള്‍ യുകെജിയില്‍ ആണ് പഠിക്കുന്നത്. സ്‌കൂളില്‍ പോകുന്നതിനു മുന്‍പേ വിളിച്ചിട്ടുണ്ടാരുന്നു ഞാന്‍ ഫോണ്‍ എടുത്തിട്ടില്ല. ഞാന്‍ ഫോണില്‍ നോക്കുമ്പോ ഒരു വോയ്സ് നോട്ട് അയച്ചേക്കുന്നു. ”അച്ഛനെ ഞാന്‍ ഇന്നലെ വിളിച്ചു, അച്ഛനെ ഞാന്‍ ഇന്നും വിളിച്ചു, ഫോണ്‍ എടുത്തില്ല, ഞാന്‍ പോവാ.” അത് കഴിഞ്ഞു കാവ്യയോട് പറഞ്ഞത്രേ ”ഇനി അച്ഛന്‍ വിളിക്കും നമ്മള്‍ എടുക്കരുത്, അത്രേ നമുക്ക് ചെയ്യാന്‍ പറ്റുള്ളൂ.”
അവള്‍ പഠിക്കുന്നത് ചെന്നൈയില്‍ ആണ്. കാവ്യയും മഹാലക്ഷ്മിയും ചെന്നൈയില്‍ ആണ്. അവള്‍ തന്നെ അവളെ വിളിക്കുന്നത് മാമാട്ടി എന്നാണ്. മഹാലക്ഷ്മി എന്ന പേര് പറയാന്‍ പറ്റാത്തതുകൊണ്ട് എന്ത് പേര് വിളിക്കും എന്നൊരു കണ്‍ഫ്യൂഷന്‍ ഉണ്ടായിരുന്നു. മോളുടെ പേരെന്താ എന്നു ചോദിച്ചാല്‍ മഹാലക്ഷ്മി എന്നു പറയണം എന്നൊക്കെ പഠിപ്പിച്ചിരുന്നു. അങ്ങനെ പറഞ്ഞു പറഞ്ഞ് അത് മാമാട്ടിയായി. മൂത്തമകള്‍ മീനൂട്ടിയും മഹാലക്ഷ്മിയും ചെറുപ്പത്തിലേ ഫോട്ടോയില്‍ കാണാന്‍ ഒരേപോലെയാണ്. അവര്‍ രണ്ടും തമ്മില്‍ നല്ല ബോണ്ട് ആണ്.” ദിലീപ് പറയുന്നു.
തെങ്കാശിപ്പട്ടണം, പഞ്ചാബി ഹൗസ്, റിങ്ങ്മാസ്റ്റര്‍, പാണ്ടിപ്പട, ചൈനാടൗണ്‍ തുടങ്ങിയ ഹിറ്റ് ചിത്രങ്ങള്‍ക്ക് ശേഷം സംവിധായകന്‍ റാഫിയും ദിലീപും ഒന്നിക്കുന്ന ചിത്രമാണ് വോയിസ് ഓഫ് സത്യനാഥന്‍. ബാദുഷ സിനിമാസിന്റേയും ഗ്രാന്റ് പ്രൊഡക്ഷന്‍സിന്റേയും ബാനറില്‍ എന്‍.എം ബാദുഷ, ഷിനോയ് മാത്യു, ദിലീപ്, പ്രിജിന്‍ ജെ.പി എന്നിവര്‍ ചേര്‍ന്നാണ് സിനിമ നിര്‍മ്മിക്കുന്നത്. കഥ, തിരക്കഥ, സംഭാഷണം എന്നിവയും നിര്‍വഹിച്ചിരിക്കുന്നത് റാഫി തന്നെയാണ്.
വീണ നന്ദകുമാര്‍ ആണ് ചിത്രത്തിലെ നായിക. ജോജു ജോര്‍ജ്, രമേശ് പിഷാരടി, ജഗപതി ബാബു തുടങ്ങി ഒട്ടേറെ മുന്‍നിര താരങ്ങളും ചിത്രത്തില്‍ അണിനിരക്കുന്നുണ്ട്. ചിത്രം ജൂലൈ 14ന് തിയറ്ററുകളിലെത്തും.
