TOP NEWS
അഹമ്മദാബാദ്: ഉത്തരക്കടലാസില്‍ ശരിയായ ഉത്തരം എഴുതിച്ചേര്‍ക്കാമെന്ന് വാഗ്ദാനം ചെയ്ത് വിദ്യാര്‍ഥികളില്‍നിന്ന് പണംതട്ടിയ കേസിൽ മൂന്നു പേർ പിടിയിൽ.
നീറ്റ് യു.ജി. പരീക്ഷാകേന്ദ്രത്തിലെ ഡെപ്യൂട്ടി സൂപ്രണ്ടും ഫിസിക്‌സ് അധ്യാപകനുമായ തുഷാര്‍ ഭട്ട്, പരശുറാം റോയ്, ആരിഫ് വോറ എന്നിവര്‍ക്കെതിരേയാണ് ക്രിമനല്‍ കേസ്. തുഷാറിന്റെ വാഹനത്തില്‍നിന്ന് തൊണ്ടിമുതലായി ഏഴുലക്ഷം രൂപ കണ്ടെടുത്തിട്ടുണ്ട്. ഒരു വിദ്യാര്‍ഥിയെ സഹായിക്കാന്‍ ആരിഫ്, തുഷാറിന് നല്‍കിയ തുകയാണ് ഇതെന്ന് പോലീസ് പറഞ്ഞു. ഉത്തരങ്ങള്‍ അറിയാത്ത ചോദ്യങ്ങള്‍ എഴുതാതെ വിടുക. പരീക്ഷക്ക് ശേഷം ഉത്തരക്കടലാസ് ശേഖരിച്ചതിന് പിന്നാലെ ഈ ചോദ്യങ്ങള്‍ക്ക് ശരിയായ ഉത്തരം എഴുതി ചേർക്കും. ഇതായിരുന്നു ചില വിദ്യാര്‍ഥികളും തട്ടിപ്പുസംഘവും തമ്മിലുള്ള കരാർ.
അഡീഷണല്‍ കളക്ടറും ഡി.ഇ.ഒയും ഉള്‍പ്പെടെയുള്ള സംഘം സ്‌കൂളിലെത്തി തുഷാറിനെ ചോദ്യം ചെയ്തു. തുടര്‍ന്ന് ഇയാളുടെ മൊബൈൽ ഫോണും പരിശോധിച്ചു. 16 വിദ്യാര്‍ഥികളുടെ പേര്, രജിസ്റ്റര്‍ നമ്പര്‍, പരീക്ഷാകേന്ദ്രങ്ങള്‍ എന്നീ വിവരങ്ങള്‍ പരശുറാം റോയ്, തുഷാറിന് വാട്ട്‌സ് ആപ്പ് സന്ദേശമായി അയച്ചു നല്‍കിയതായി കണ്ടെത്തി. തന്റെ പരീക്ഷാകേന്ദ്രത്തില്‍ പരീക്ഷ എഴുതാനെത്തിയ വിദ്യാര്‍ഥികളാണ് ഇവരെന്ന് തുഷാര്‍ സമ്മതിച്ചതായി എഫ്.ഐ.ആറില്‍ പറയുന്നു.
