സിഗരറ്റ് നൽകാൻ വൈകിയതിൽ ക്രൂരമർദനം; കൊച്ചിയിൽ ജീവനക്കാരനെ ആക്രമിച്ച മൂന്ന് പേർ
സിഗരറ്റ് നൽകാൻ വൈകിയെന്ന കാരണത്താൽ കടയിലെ ജീവനക്കാരനായ യുവാവിനെ മൂന്നംഗ സംഘം ക്രൂരമായി മർദിച്ചു. വൈറ്റിലയ്ക്ക് സമീപമുള്ള കടയിൽ നടന്ന ആക്രമണത്തിന്റെ സിസിടിവി ദൃശ്യങ്ങൾ പുറത്തുവന്നു.
പാലക്കാട് സ്വദേശിയായ യുവാവാണ് മർദനമേറ്റത്. ആക്രമണത്തിന്റെ സിസിടിവി ദൃശ്യങ്ങൾ പുറത്തുവന്നതോടെ സംഭവം വലിയ വിവാദമായി.
ഇന്നലെ വൈകിട്ട് കടയിലെത്തിയ സംഘം സിഗരറ്റ് ആവശ്യപ്പെട്ടെങ്കിലും എടുത്ത് നൽകാൻ വൈകിയതാണ് പ്രകോപനമായത്. തുടർന്ന് കടയ്ക്കുള്ളിൽ കയറിയ അക്രമികൾ യുവാവിനെ നിലത്തിട്ടു ചവിട്ടിയും ഇടിച്ചും ആക്രമിച്ചു.
യുവാവിനെ രക്ഷിക്കാൻ ശ്രമിച്ച മറ്റു ജീവനക്കാരെയും അക്രമികൾ പിടിച്ചുതള്ളുന്നതും ദൃശ്യങ്ങളിൽ കാണാം. തെറിവിളിച്ചുകൊണ്ടായിരുന്നു ആക്രമണം.
നീണ്ടുനിന്ന ആക്രമണം
കടയ്ക്കുള്ളിൽ നടന്ന ആക്രമണം കുറച്ച് നേരം നീണ്ടുനിന്നിട്ടും ചുറ്റുമുണ്ടായിരുന്നവർ ആരും തടയാൻ ശ്രമിച്ചില്ല.
മർദനത്തിനിടെ അക്രമികൾ “പാലക്കാട് സ്വദേശി കൊച്ചിയിൽ വന്ന് അധികം കളിക്കണ്ട, ഞങ്ങൾ നാട്ടുകാരാണ്” തുടങ്ങിയ വാക്കുകൾ വിളിച്ചു പറഞ്ഞതായും റിപ്പോർട്ടുണ്ട്.
സിഗരറ്റ് വാങ്ങിച്ചശേഷം മടങ്ങി
അവസാനം മർദനമേറ്റ യുവാവിനോട് സിഗരറ്റ് എടുത്ത് കൊടുക്കാൻ നിർബന്ധിച്ച് അത് കത്തിച്ചു വലിച്ച ശേഷമാണ് മൂന്നംഗ സംഘം സ്ഥലത്ത് നിന്ന് മടങ്ങിയത്. പോകുന്നതിനിടെ ഭീഷണിയും മുഴക്കിയതായി ദൃശ്യങ്ങളിൽ കാണാം.
സംഭവത്തിൽ കടവന്ത്ര പൊലീസ് കേസ് രജിസ്റ്റർ ചെയ്ത് പ്രതികളെ കണ്ടെത്താൻ അന്വേഷണം ആരംഭിച്ചു.
English Summary
A shop employee from Palakkad was brutally assaulted by a three-member gang in Kochi for allegedly delaying the delivery of a cigarette. The incident occurred at a shop near Vyttila and was captured on CCTV. The attackers beat and kicked the employee inside the shop and also pushed away others who tried to intervene. After forcing the victim to hand over cigarettes, the group left the scene. Kadavanthra police have registered a case and launched an investigation.
