ഗ്യാസ് ബുക്ക് ചെയ്യാൻ വിളിച്ചാൽ ഫോൺ ബിസി; സംസ്ഥാനത്ത് പാചകവാതക ബുക്കിങിൽ വലിയ പ്രതിസന്ധി

ഗ്യാസ് ബുക്ക് ചെയ്യാൻ വിളിച്ചാൽ ഫോൺ ബിസി; സംസ്ഥാനത്ത് പാചകവാതക ബുക്കിങിൽ വലിയ പ്രതിസന്ധി

കൊച്ചി: അടുക്കളയിൽ ഗ്യാസ് തീരാനിരിക്കെ പുതിയ സിലിണ്ടർ ബുക്ക് ചെയ്യാൻ ശ്രമിക്കുന്ന പലർക്കും ഒരേ അനുഭവം— ഗ്യാസ് ഏജൻസിയിലേക്ക് വിളിച്ചാൽ ഫോൺ എപ്പോഴും ബിസി, റിങ് ചെയ്താലും ആരും എടുക്കുന്നില്ല. കഴിഞ്ഞ കുറച്ച് ദിവസങ്ങളായി സംസ്ഥാനത്തെ ഒട്ടുമിക്ക വീടുകളിലും അനുഭവപ്പെടുന്ന വലിയ പ്രതിസന്ധിയാണിത്.

പാചകവാതകം ബുക്ക് ചെയ്യാൻ കഴിയാതെയും ഏജൻസികളുമായി ബന്ധപ്പെടാൻ സാധിക്കാതെയും സാധാരണക്കാർ വലയുകയാണ്. ഇന്ധനക്ഷാമം ഉണ്ടാകുമെന്ന അഭ്യൂഹങ്ങൾക്കിടയിൽ സിലിണ്ടർ ലഭിക്കാതാകുമോ എന്ന ആശങ്ക ജനങ്ങളിൽ വ്യാപകമായി ഉയർന്നിട്ടുണ്ട്.

ഇതിനിടെ ഇറാൻ–ഇസ്രയേൽ സംഘർഷത്തിന്റെ പശ്ചാത്തലത്തിൽ വാണിജ്യ സിലിണ്ടറുകളുടെ വിതരണം തടസ്സപ്പെട്ടതും അടുത്തിടെയുണ്ടായ വില വർധനയും ജനങ്ങളിൽ ആശങ്ക കൂട്ടിയിട്ടുണ്ട്. വീട്ടുപയോഗ ഗ്യാസിനും ഉടൻ ക്ഷാമം നേരിടുമെന്ന ഭയത്തിൽ പലരും സിലിണ്ടർ തീരുന്നതിന് മുൻപേ ബുക്ക് ചെയ്യാൻ ശ്രമിക്കുകയാണ്. ഇതോടെ ഗ്യാസ് ഏജൻസികളിലേക്കുള്ള ഫോൺ കോളുകൾ കുത്തനെ വർധിച്ചു.

25 ദിവസം മുമ്പ് ബുക്കിങ് അനുവദിക്കില്ല

ആശങ്കയുടെ പശ്ചാത്തലത്തിൽ ആളുകൾ അനാവശ്യമായി സിലിണ്ടറുകൾ ശേഖരിച്ച് വയ്ക്കുന്നത് തടയാൻ എണ്ണക്കമ്പനികൾ പുതിയ നിയന്ത്രണം കർശനമാക്കി. ഒരു സിലിണ്ടർ വിതരണം ചെയ്തതിന് ശേഷം 25 ദിവസം പൂർത്തിയാകാതെ അടുത്ത ബുക്കിങ് അനുവദിക്കില്ല. ഈ നിബന്ധന അറിയാതെയാണ് പലരും നിരന്തരം ഏജൻസികളിലേക്ക് വിളിക്കുന്നതെന്ന് അധികൃതർ പറയുന്നു.

സർവർ തകരാറുകൾ ഏജൻസികളെ പ്രതിസന്ധിയിലാക്കുന്നു

ജനങ്ങൾ ബുക്കിങ് നടത്താൻ കഴിയാതെ വലയുമ്പോൾ, ഗ്യാസ് ഏജൻസികളെ കുഴക്കുന്നത് സാങ്കേതിക പ്രശ്നങ്ങളാണ്. എണ്ണക്കമ്പനികളുടെ സോഫ്റ്റ്‌വെയറുകളിൽ ഉണ്ടാകുന്ന നിരന്തരമായ സർവർ തകരാറുകൾ കാരണം ഏജൻസികളുടെ പ്രവർത്തനം പലപ്പോഴും സ്തംഭിക്കുകയാണ്.

ബില്ലിംഗ്, സ്റ്റോക്ക് അപ്‌ഡേറ്റ്, ഓയിൽ കമ്പനികൾക്ക് റിപ്പോർട്ട് നൽകൽ എന്നിവ എല്ലാം ഈ സോഫ്റ്റ്‌വെയർ വഴിയാണ് നടക്കുന്നത്. എന്നാൽ പകൽ സമയങ്ങളിൽ സർവർ പലപ്പോഴും പ്രവർത്തിക്കാത്തതിനാൽ ബുക്കിങ് ഉൾപ്പെടെയുള്ള കാര്യങ്ങൾ ചെയ്യാൻ സാധിക്കാത്ത അവസ്ഥയാണ് എന്ന് കോതമംഗലത്തെ മാത്സൺ ഗ്യാസ് ഏജൻസി ഉടമ ജോർജ് മാത്യു വ്യക്തമാക്കി. ചില ദിവസങ്ങളിൽ രാത്രിയിലാണ് ഈ ജോലികൾ പൂർത്തിയാക്കേണ്ടിവരുന്നതെന്നും അദ്ദേഹം പറയുന്നു.

സ്റ്റോക്ക് കുറവ്, വിതരണം വൈകുന്നു

കേന്ദ്ര സർക്കാർ ഗാർഹിക ആവശ്യങ്ങൾക്ക് ഗ്യാസിന് ക്ഷാമമില്ലെന്ന് പറയുമ്പോഴും പല ഏജൻസികൾക്കും ആവശ്യത്തിന് സ്റ്റോക്ക് ലഭിക്കുന്നില്ല എന്നാണ് ആരോപണം. ദിവസങ്ങൾക്ക് മുമ്പ് ബുക്ക് ചെയ്തവർക്കുപോലും സിലിണ്ടർ വിതരണം ചെയ്യാൻ കഴിയാത്ത അവസ്ഥ പല സ്ഥലങ്ങളിലും ഉണ്ടായി.

ഇതോടെ ഗ്യാസ് സിലിണ്ടറുകളുമായി വരുന്ന ലോറികളും വിതരണ വാഹനങ്ങളും വഴിയിൽ തടഞ്ഞ് സിലിണ്ടർ വാങ്ങാൻ ആളുകൾ ഓടിയെത്തുന്ന സംഭവങ്ങളും റിപ്പോർട്ട് ചെയ്യപ്പെടുന്നു. ചിലയിടങ്ങളിൽ വിതരണക്കാരും നാട്ടുകാരും തമ്മിൽ വാക്കേറ്റങ്ങളും ഉണ്ടാകുന്നുണ്ട്.

ഗ്യാസ് ബുക്ക് ചെയ്യാനുള്ള മറ്റ് മാർഗങ്ങൾ

ഏജൻസികളുടെ ലാൻഡ്‌ലൈൻ നമ്പറുകളെ ആശ്രയിക്കാതെ ഉപഭോക്താക്കൾക്ക് ഡിജിറ്റൽ മാർഗങ്ങൾ വഴി എളുപ്പത്തിൽ ബുക്കിങ് നടത്താം. പഴയ സിലിണ്ടർ ലഭിച്ച് 25 ദിവസം കഴിഞ്ഞിട്ടുണ്ടെന്ന് ഉറപ്പാക്കിയ ശേഷം:

• ഗ്യാസ് കമ്പനികളുടെ വാട്സ്ആപ്പ് നമ്പർ വഴി
• ഔദ്യോഗിക മൊബൈൽ ആപ്പുകൾ വഴി
• Google Pay, PhonePe, Paytm പോലുള്ള ആപ്പുകളിൽ ഉള്ള ‘Book a Cylinder’ ഓപ്ഷൻ വഴി

സിലിണ്ടർ ബുക്ക് ചെയ്യാൻ കഴിയും.

English Summary

Many households in Kerala are facing difficulties booking LPG cylinders as gas agency phone lines remain busy or unanswered. Panic among consumers has increased amid rumors of fuel shortages linked to global tensions, including the Iran–Israel conflict. Oil companies have enforced a rule that customers cannot book a new cylinder within 25 days of the previous delivery to prevent hoarding. Meanwhile, technical server issues in oil company software systems are affecting gas agencies’ operations, delaying bookings and deliveries. Authorities say domestic LPG supply is adequate, but agencies report stock shortages in some areas. Consumers are advised to use digital booking options such as WhatsApp, official apps, or payment apps like Google Pay and PhonePe.