സംസ്ഥാനത്ത് യുവി സൂചിക ഉയരുന്നു; മൂന്ന് ജില്ലകളിൽ അതീവ ജാഗ്രത
തിരുവനന്തപുരം: സംസ്ഥാനത്തെ വിവിധ ജില്ലകളിൽ അൾട്രാവയലറ്റ് (UV) സൂചിക ഉയർന്ന നിലയിൽ രേഖപ്പെടുത്തിയ സാഹചര്യത്തിൽ പൊതുജനങ്ങൾക്ക് ജാഗ്രത നിർദേശവുമായി സംസ്ഥാന ദുരന്തനിവാരണ അതോറിറ്റി രംഗത്ത്.
കോട്ടയം, മലപ്പുറം, പത്തനംതിട്ട ജില്ലകളിലാണ് യുവി സൂചിക അപകടകരമായ നിലയിലെത്തിയത്.
പത്തനംതിട്ടയിലെ കോന്നി, കോട്ടയം ജില്ലയിലെ ചങ്ങനാശ്ശേരി, മലപ്പുറം ജില്ലയിലെ പൊന്നാനി എന്നിവിടങ്ങളിൽ യുവി ഇൻഡക്സ് 7 ആയി രേഖപ്പെടുത്തി. ആരോഗ്യപരമായ അപകടസാധ്യത ഉയർന്ന നിലയാണിത്.
അതേസമയം, കൊല്ലം ജില്ലയിലെ കൊട്ടാരക്കര, എറണാകുളം ജില്ലയിലെ കളമശ്ശേരി, പാലക്കാട് തൃത്താല, കോഴിക്കോട് ബേപ്പൂർ, വയനാട് മാനന്തവാടി എന്നിവിടങ്ങളിൽ സൂചിക 6 ആയി രേഖപ്പെടുത്തിയിട്ടുണ്ട്. ഈ പ്രദേശങ്ങളിൽ ‘മഞ്ഞ അലർട്ട്’ പ്രഖ്യാപിച്ചിരിക്കുകയാണ്.
തിരുവനന്തപുരം വിളപ്പിൽശാല, ആലപ്പുഴ ചെങ്ങന്നൂർ, ഇടുക്കി മൂന്നാർ, തൃശൂർ ഒല്ലൂർ, കണ്ണൂർ ധർമ്മടം, കാസർകോട് ഉദുമ എന്നിവിടങ്ങളിൽ യുവി സൂചിക 4 മുതൽ 5 വരെയാണ്. ഇവിടങ്ങളിലുമുള്ളവർ ആവശ്യമായ മുൻകരുതലുകൾ സ്വീകരിക്കണമെന്ന് അധികൃതർ നിർദേശിച്ചു.
ദീർഘനേരം നേരിട്ടുള്ള സൂര്യപ്രകാശം ഒഴിവാക്കുക, പുറത്തുപോകുമ്പോൾ കുട, തലക്കെട്ട്, സൺസ്ക്രീൻ എന്നിവ ഉപയോഗിക്കുക, കുട്ടികളെയും വയോധികരെയും പ്രത്യേക ശ്രദ്ധയിൽവെക്കുക തുടങ്ങിയ നിർദേശങ്ങളാണ് നൽകിയിരിക്കുന്നത്.
അമിതമായ സൂര്യാതപം ചർമരോഗങ്ങൾക്കും മറ്റ് ആരോഗ്യപ്രശ്നങ്ങൾക്കും കാരണമാകാമെന്നും മുന്നറിയിപ്പുണ്ട്.
English Summary
The Kerala State Disaster Management Authority has issued a warning after high ultraviolet (UV) index levels were recorded in several districts. Kottayam, Malappuram, and Pathanamthitta reported dangerous levels, with a UV index of 7 in areas such as Konni, Changanassery, and Ponnani. Several other locations recorded a UV index of 6 and are under a yellow alert. Authorities have advised residents to avoid prolonged sun exposure and take precautions to prevent sunburn and skin-related health issues.
