ശക്തി കുറഞ്ഞിരുന്നെങ്കിൽ കോൺഗ്രസ് ക്ഷണിക്കില്ലായിരുന്നു; ആ സീറ്റ് ഉൾപ്പെടെ 13 സീറ്റുകൾ ആവശ്യപ്പെടും; സീറ്റുകൾ വച്ചുമാറുന്നില്ല; മനസു തുറന്ന് ജോസ് കെ. മാണി 

ശക്തി കുറഞ്ഞിരുന്നെങ്കിൽ കോൺഗ്രസ് ക്ഷണിക്കില്ലായിരുന്നു; ആ സീറ്റ് ഉൾപ്പെടെ 13 സീറ്റുകൾ ആവശ്യപ്പെടും; സീറ്റുകൾ വച്ചുമാറുന്നില്ല; മനസു തുറന്ന് ജോസ് കെ. മാണി

കോട്ടയം: നിയമസഭാ തിരഞ്ഞെടുപ്പിൽ കേരള കോൺഗ്രസ് (എം) പതിമൂന്നു സീറ്റുകളിൽ മത്സരിക്കുമെന്ന് പാർട്ടി ചെയർമാൻ ജോസ് കെ. മാണി എം.പി വ്യക്തമാക്കി.

കഴിഞ്ഞ നിയമസഭാ തിരഞ്ഞെടുപ്പിൽ പാർട്ടി 12 സീറ്റുകളിലായിരുന്നു മത്സരിച്ചത്. അന്ന് കുറ്റ്യാടി സീറ്റ് ലഭിച്ചെങ്കിലും, സിപിഎം സംസ്ഥാന സെക്രട്ടറിയായിരുന്ന കോടിയേരി ബാലകൃഷ്ണന്റെ നിർദേശപ്രകാരം അവസാന നിമിഷം സീറ്റ് വിട്ടുനൽകേണ്ടിവന്നതായും അദ്ദേഹം പറഞ്ഞു.

 പ്രത്യേക സാഹചര്യത്തിലാണ് കുറ്റ്യാടി ഏറ്റെടുത്തതെന്നും, അടുത്ത തിരഞ്ഞെടുപ്പിൽ തിരിച്ചുനൽകാമെന്ന് കോടിയേരി ഉറപ്പുനൽകിയതിന്റെ അടിസ്ഥാനത്തിലാണ് ഇത്തവണ ആ സീറ്റ് ഉൾപ്പെടെ 13 സീറ്റുകൾ ആവശ്യപ്പെടുന്നതെന്നും ജോസ് കെ. മാണി വ്യക്തമാക്കി.

എൽഡിഎഫ് നിയമസഭാ തിരഞ്ഞെടുപ്പ് ചർച്ചകൾ ഇതുവരെ ആരംഭിച്ചിട്ടില്ല. കഴിഞ്ഞ തവണ ലഭിച്ച ചില സീറ്റുകൾ വച്ചുമാറുമെന്ന് തരത്തിലുള്ള ചാനൽ വാർത്തകൾ അടിസ്ഥാനരഹിതമാണെന്നും അദ്ദേഹം പറഞ്ഞു. 

നിലവിൽ മുന്നണി പ്രചാരണ ജാഥകളുടെ തിരക്കിലാണ്. അടുത്തമാസം നടക്കുന്ന മധ്യമേഖലാ ജാഥയ്ക്ക് നേതൃത്വം നൽകുക താനായിരിക്കുമെന്നും ജോസ് കെ. മാണി അറിയിച്ചു.

നിയമസഭാ തിരഞ്ഞെടുപ്പിൽ തദ്ദേശ തിരഞ്ഞെടുപ്പിലെ പ്രാദേശിക വിഷയങ്ങളല്ല ചർച്ചയാകുക. അതുകൊണ്ടുതന്നെ എൽഡിഎഫ് വീണ്ടും അധികാരത്തിലെത്തുമെന്ന ആത്മവിശ്വാസമുണ്ടെന്നും അദ്ദേഹം പറഞ്ഞു.

യുഡിഎഫിലേക്ക് ക്ഷണം ലഭിക്കുന്നതിനെക്കുറിച്ച് പ്രതികരിച്ച ജോസ് കെ. മാണി, ശക്തിയുള്ളതിനാലാണ് കോൺഗ്രസ് നേതാക്കൾ ഇപ്പോഴും ക്ഷണിക്കുന്നതെന്ന് വ്യക്തമാക്കി. 

ശക്തി കുറഞ്ഞിരുന്നെങ്കിൽ ആരും ക്ഷണിക്കില്ലായിരുന്നുവെന്നും അദ്ദേഹം കൂട്ടിച്ചേർത്തു. ഇടതുമുന്നണി വിട്ട് യുഡിഎഫിലേക്ക് പോകേണ്ട രാഷ്ട്രീയ സാഹചര്യം നിലവിലില്ലെന്നും ജോസ് കെ. മാണി പറഞ്ഞു.

പാലാ നഗരസഭയിൽ കേരള കോൺഗ്രസ് (എം) ഏറ്റവും വലിയ ഒറ്റകക്ഷിയാണെന്നും, അവിശുദ്ധ കൂട്ടുകെട്ടിലൂടെയാണ് യുഡിഎഫ് അവിടെ ഭരണം പിടിച്ചതെന്നും അദ്ദേഹം ആരോപിച്ചു. 

പാലാ നിയമസഭാ മണ്ഡലത്തിൽ 2,198 വോട്ടുകളുടെ ഭൂരിപക്ഷം എൽഡിഎഫിന് ലഭിച്ചതായും, തൊടുപുഴ മുനിസിപ്പാലിറ്റിയിൽ ജോസഫ് വിഭാഗം മത്സരിച്ച എട്ട് വാർഡുകളിൽ രണ്ട് വാർഡുകളിൽ മാത്രമാണ് ജയിച്ചതെന്നും ജോസ് കെ. മാണി പറഞ്ഞു.

English Summary

Kerala Congress (M) chairman Jose K. Mani MP has announced that the party will contest 13 seats in the upcoming Kerala Assembly elections. He clarified that reports about seat adjustments within the LDF are false and expressed confidence that the LDF will return to power. Jose K. Mani also dismissed speculation about joining the UDF, stating that there is no political situation warranting such a move.

kerala-congress-m-to-contest-13-seats-jose-k-mani

Kerala Congress M, Jose K Mani, Kerala Assembly Election, LDF, Seat Sharing, Kerala Politics, Kottayam