എൻഡോസൾഫാൻ ദുരിതബാധിതർക്കായി സർക്കാരിന്റെ കരുതൽ; ഭവനമില്ലാത്തവർക്ക് ഫ്ലാറ്റുകൾ, ജീവനക്കാർക്ക് ശമ്പള പരിഷ്കരണം — മന്ത്രിസഭാ തീരുമാനങ്ങൾ
തിരുവനന്തപുരം: കാസർഗോഡ് ജില്ലയിലെ എൻഡോസൾഫാൻ ദുരിതബാധിതർക്ക് ധനസഹായം അനുവദിക്കാൻ മന്ത്രിസഭായോഗത്തിൽ തീരുമാനം. ആശ്വാസം നൽകുന്ന പ്രധാന തീരുമാനങ്ങളാണ് ബുധനാഴ്ച ചേർന്ന മന്ത്രിസഭാ യോഗം അംഗീകരിച്ചത്.
2017-ൽ നടന്ന മെഡിക്കൽ പരിശോധനയും ഫീൽഡ് പരിശോധനയും അടിസ്ഥാനമാക്കി പ്രാഥമിക പട്ടികയിൽ ഉൾപ്പെട്ടെങ്കിലും പിന്നീട് ഒഴിവാക്കപ്പെട്ട 1031 പേരിൽ അർഹരായവർക്കാണ് സഹായം ലഭിക്കുക. ഇതിനായി ജില്ലാ കലക്ടർമാർക്ക് പ്രത്യേക അനുമതി നൽകിയതായി അറിയിക്കുന്നു.
അതേസമയം, ആലപ്പുഴയിലെ അതിദാരിദ്ര്യ നിർമാർജ്ജന പദ്ധതിയുടെ ഭാഗമായി ഭൂരഹിതരും ഭവനരഹിതരുമായ 50 കുടുംബങ്ങൾക്ക് ഫ്ലാറ്റുകൾ നൽകും.
ഫിഷറീസ് വകുപ്പിന്റെ ‘പുനർഗേഹം’ പദ്ധതിയുടെ ഭാഗമായ മണ്ണുംപുറം ഫ്ലാറ്റ് സമുച്ചയത്തിലാണ് ഇവരെ പുനരധിവസിപ്പിക്കുക. പദ്ധതിയിൽ നിർമിച്ച അധിക ഫ്ലാറ്റുകളാണ് ഈ വിഭാഗത്തിന് നൽകുന്നത്.
സർക്കാർ സ്ഥാപനങ്ങളിലെ ജീവനക്കാരുടെ ശമ്പള പരിഷ്കരണം സംബന്ധിച്ചും നിർണായക തീരുമാനം എടുത്തു.
കോർപ്പറേഷൻ ജീവനക്കാർക്ക് പതിനൊന്നാം ശമ്പള പരിഷ്കരണം
കേരള സംസ്ഥാന പട്ടികജാതി–പട്ടികവർഗ്ഗ വികസന കോർപ്പറേഷൻ ജീവനക്കാർക്ക് പതിനൊന്നാം ശമ്പള പരിഷ്കരണം 01.07.2019 മുതൽ പ്രാബല്യത്തിൽ വരും.
പത്താം ശമ്പള പരിഷ്കരണത്തിൽ ഉണ്ടായ വ്യത്യാസങ്ങൾ പരിഹരിച്ചും റേഷ്യോ പ്രൊമോഷൻ അനുവദിച്ചും തീരുമാനം നടപ്പാക്കും.
അതോടൊപ്പം, എൽ.ബി.എസ് സെൻറർ ഫോർ സയൻസ് ആൻഡ് ടെക്നോളജിയിലെയും അതിന്റെ കീഴിലുള്ള സ്ഥാപനങ്ങളിലെയും ജീവനക്കാർക്കും ശമ്പള പരിഷ്കരണം വ്യവസ്ഥകളോടെ അനുവദിക്കും.
EPF എംപ്ലോയർ വിഹിതം സംബന്ധിച്ച അന്തിമ തീരുമാനമെടുക്കുന്നതുവരെ നിലവിലെ സംവിധാനം തുടരും.
തൃശൂർ ജില്ലയിൽ കനത്തമഴ; പീച്ചി ഡാം നാളെ തുറക്കുമെന്ന് സൂചന; തീരപ്രദേശങ്ങളിൽ ജാഗ്രതാ നിർദേശം
കെ.ആർ. നാരായണൻ ഇൻസ്റ്റിറ്റ്യൂട്ടിന് കിഫ്ബി ഫണ്ടിംഗ്
സാമ്പത്തികവികസനത്തിന്റെ ഭാഗമായി, കെ.ആർ. നാരായണൻ നാഷണൽ ഇൻസ്റ്റിറ്റ്യൂട്ട് ഓഫ് വിഷ്വൽ സയൻസ് ആൻഡ് ആർട്സ് ഇൻസ്റ്റിറ്റ്യൂട്ടിന്റെ അടിസ്ഥാന സൗകര്യ വികസനത്തിനായി 26.58 കോടി രൂപയുടെ പ്രൊപ്പോസൽ കിഫ്ബി ഫണ്ടിംഗിന് പരിഗണിക്കാൻ അനുമതി നൽകി.
ഹൈക്കോടതി ജഡ്ജിമാരുടെ ക്യാമ്പ് ഓഫീസുകൾക്ക് ആവശ്യമായ പുതുക്കൽ പ്രവർത്തനങ്ങൾക്കായി 01.09.2024-ലെ പൊതുഭരണ വകുപ്പ് ഉത്തരവിൽ ഭേദഗതി വരുത്തും.
മന്ത്രിസഭാ യോഗത്തിൽ എടുത്ത ഈ തീരുമാനങ്ങൾ സംസ്ഥാനത്തിന്റെ സാമൂഹിക-സാമ്പത്തിക മേഖലകളിൽ പുതുജീവൻ പകരുന്നവയാണെന്ന് സർക്കാർ വ്യക്തമാക്കി.
ദുരിതബാധിതർക്കും അതിദരിദ്രർക്കും നൽകുന്ന കരുതലും ജീവനക്കാരുടെ ശമ്പള പരിഷ്കരണവും സർക്കാരിന്റെ സാമൂഹ്യ പ്രതിബദ്ധതയുടെ തെളിവാണെന്ന് മന്ത്രിസഭാ വൃത്തങ്ങൾ അറിയിച്ചു.
