ഇൻക്യുബേറ്ററിലെ ചൂടിൽ കുഞ്ഞ് വെന്തുമരിച്ചു
കാൺപൂർ: ഉത്തർപ്രദേശിലെ കാൺപൂരിലെ സ്വകാര്യ ആശുപത്രിയിൽ ജീവനക്കാരുടെ ഗുരുതര അനാസ്ഥയെ തുടർന്ന് മണിക്കൂറുകൾ മാത്രം പ്രായമുള്ള നവജാത പെൺകുഞ്ഞ് ദാരുണമായി മരണപ്പെട്ടു.
ബിത്തൂരിലെ ‘രാജാ നഴ്സിംഗ് ഹോം’ ആശുപത്രിയിലാണ് ഞായറാഴ്ച വൈകുന്നേരം ഹൃദയഭേദകമായ സംഭവം ഉണ്ടായത്.
ശ്വാസതടസ്സമുണ്ടെന്ന കാരണം പറഞ്ഞ് ഐസിയുവിലേക്ക് മാറ്റിയ കുഞ്ഞിനെ ഇൻക്യുബേറ്റർ (വോർമർ മെഷീൻ) കിടത്തിയ ശേഷം ജീവനക്കാർ ശ്രദ്ധിക്കാതെ വിട്ടതാണ് ദുരന്തത്തിന് ഇടയായതെന്ന് ബന്ധുക്കൾ ആരോപിച്ചു.
മെഷീൻ അമിതമായി ചൂടാവുകയും തീപിടിച്ച നിലയിലാകുകയും ചെയ്തതോടെ കുഞ്ഞിന്റെ മുഖം, നെഞ്ച്, വയർ എന്നിവിടങ്ങളിൽ ഗുരുതര പൊള്ളലേറ്റു. കുഞ്ഞിന്റെ ശരീരം കറുത്തിരുണ്ട നിലയിലായിരുന്നുവെന്ന് ബന്ധുക്കൾ പറഞ്ഞു.
കുഞ്ഞ് മരിച്ച വിവരം ഏകദേശം അഞ്ച് മണിക്കൂർ കഴിഞ്ഞാണ് ആശുപത്രി അധികൃതർ മാതാപിതാക്കളെ അറിയിച്ചതെന്നും, ഈ സമയത്ത് കുട്ടിയെ കാണാൻ പോലും അനുവദിക്കാതെ അഡ്മിഷൻ നടപടികളുടെ പേരിൽ ബന്ധുക്കളെ തെറ്റിദ്ധരിപ്പിച്ചുവെന്നും കുടുംബം ആരോപിക്കുന്നു.
ബക്കർഗഞ്ച് സ്വദേശികളായ അരുൺ നിഷാദിന്റെയും ഭാര്യ ബിട്ടുവിന്റെയും ആദ്യ കുഞ്ഞായിരുന്നു മരിച്ച പെൺകുഞ്ഞ്. സിസേറിയൻ ശസ്ത്രക്രിയയിലൂടെ ജനിച്ച കുഞ്ഞിനെ ഒരു നോക്ക് കാണാൻ പോലും അമ്മയ്ക്ക് അവസരം ലഭിച്ചിരുന്നില്ല.
സംഭവത്തിൽ പ്രതിഷേധം ശക്തമായതോടെ കേസ് ഒതുക്കിത്തീർക്കാനായി ആശുപത്രി അധികൃതർ രണ്ട് ലക്ഷം രൂപ വാഗ്ദാനം ചെയ്തുവെന്ന ആരോപണവും കുടുംബം ഉന്നയിച്ചു.
“ഭൂമിയിലെ ദൈവങ്ങളെന്നു വിശ്വസിച്ചവരാണ് എന്റെ കുഞ്ഞിനെ കൊന്നത്. എന്റെ മകൾ എങ്ങനെ മരിച്ചതെന്ന് ഭാര്യയോട് പറയാൻ പോലും എനിക്ക് ധൈര്യമില്ല,” – പിതാവായ അരുൺ നിഷാദ് പറഞ്ഞു.
ബന്ധുക്കളുടെ പരാതിയുടെ അടിസ്ഥാനത്തിൽ ബിത്തൂർ പൊലീസ് കേസെടുത്ത് അന്വേഷണം ആരംഭിച്ചു.
സംഭവത്തിൽ അന്വേഷണം നടത്താൻ മൂന്നംഗ സമിതിയെ നിയോഗിച്ചതായും 24 മണിക്കൂറിനകം റിപ്പോർട്ട് സമർപ്പിക്കാൻ നിർദേശം നൽകിയതായും അഡീഷണൽ മെഡിക്കൽ ഓഫീസർ റമിത് റസ്തോഗി അറിയിച്ചു. നിലവിൽ ആശുപത്രിയിലെ എൻഐസിയു വിഭാഗം അടച്ചുപൂട്ടിയിരിക്കുകയാണ്.
English Summary
A newborn baby girl died in a private hospital in Kanpur, Uttar Pradesh, allegedly due to staff negligence after being left unattended in an overheated incubator. The infant suffered severe burns and the family claims the hospital delayed informing them and tried to suppress the case. Police have registered a case and a three-member inquiry committee has been formed.
kanpur-private-hospital-negligence-newborn-burnt-to-death
Kanpur, Uttar Pradesh, private hospital, newborn death, medical negligence, incubator overheating, NICU, hospital negligence, police investigation, India news
