ജസ്ന ജീവിച്ചിരിപ്പില്ലെന്ന് പിതാവ് ജെയിംസ്. തിരുവനന്തപുരം സിജിഎം കോടതിക്ക് നൽകിയ സത്യവാങ്മൂലത്തിലാണ് പിതാവ് ഇക്കാര്യം പറയുന്നത്. ആത്മാർത്ഥ സുഹൃത്തിനെ കുറിച്ചുള്ള വിവരങ്ങൾ തന്റെ കൈവശമുണ്ടെന്നും കൂടുതൽ വിവരങ്ങൾ സിബിഐക്ക് കൈമാറാൻ തയ്യാറാണെന്നും പിതാവ് ഹർജിയിലൂടെ അറിയിച്ചു. എല്ലാ വ്യാഴാഴ്ചയും ജസ്ന പ്രാർത്ഥിക്കാൻ പോകാറുണ്ടായിരുന്നു. മകൾ കാണാമറയത്ത് മറഞ്ഞതും ഒരു വ്യാഴാഴ്ച തന്നെ. മകളുടെ തിരോധാനത്തിൽ സംശയമുള്ള സുഹൃത്തിനെ കുറിച്ച് വിവരങ്ങൾ നൽകിയിട്ടും അന്വേഷിക്കാൻ സിബിഐ തയ്യാറായില്ല. അന്വേഷിച്ചിരുന്നതും സംശയിച്ചതും ജെസ്നയുടെ സഹപാഠിയെ കുറിച്ച് മാത്രമാണ്. എന്നാൽ ഇയാളെ പോളിഗ്രാഫ് ടെസ്റ്റിന് വിധേയനാക്കിയിട്ട് പോലും ഒന്നും ലഭിച്ചില്ല. കൃത്യമായി അന്വേഷണം നടത്താൻ തയ്യാറാണെങ്കിൽ അജ്ഞാത സുഹൃത്തിനെ കുറിച്ചുള്ള വിവരങ്ങൾ നൽകാൻ താൻ തയ്യാറാണ്. കാണാതാകുന്ന തലേദിവസം ജസ്നയ്ക്ക് അമിത രക്തസ്രാവം ഉണ്ടായതിന്റെ കാരണമെന്തെന്നും സിബിഐയുടെ അന്വേഷണ പരിധിയിൽ വന്നില്ല. പിതാവ് പറയുന്നു.
എല്ലാ വ്യാഴാഴ്ചയും ജസ്ന വീട്ടുകാരെ അറിയിക്കാതെ ഒരു രഹസ്യ കേന്ദ്രത്തിൽ പ്രാർത്ഥിക്കാൻ പോകാറുണ്ടായിരുന്നു. അവിടെവച്ചാണ് ആ അജ്ഞാത സുഹൃത്തിനെ പരിചയപ്പെട്ടത്. ജെസ്നയെ കാണാതായതും ഒരു വ്യാഴാഴ്ചയാണ്. ജെസ്ന പോയത് ആ അജ്ഞാത സുഹൃത്തിനൊപ്പം ആണോ എന്ന് ന്യായമായും സംശയിക്കാം. ജസ്ന പോകാനുള്ള പ്രാർത്ഥന കേന്ദ്രം ഏതാണെന്ന് താൻ കണ്ടെത്തി. സുഹൃത്തിനെ കുറിച്ചും നിർണായകമായ വിവരങ്ങൾ അറിയാം. ജെസ്നയുടെ സുഹൃത്ത് എന്ന നിലയിൽ ആദ്യം മുതൽ സിബിഐ അന്വേഷിച്ചത് ഒരു സഹപാഠിയെയാണ്. എന്നാൽ അജ്ഞത സുഹൃത്ത് അയാൾ അല്ല. ജസ്‌നയുടെ പിതാവ് പറയുന്നു. പിതാവ് സമർപ്പിച്ച ഹർജിയിൽ അന്വേഷണ ഉദ്യോഗസ്ഥനോട് 19ന് ഹാജരാകാൻ കോടതി നിർദേശിച്ചിട്ടുണ്ട്.
