യുവതിയെ രക്ഷിക്കാൻ വെടിയുതിർത്ത മലയാളി; തോക്ക് ഗുജറാത്തിൽ നിന്നെന്ന് മൊഴി
മുംബൈയിൽ യുവതിയെ പിന്തുടർന്ന് ലൈംഗികാതിക്രമത്തിന് ശ്രമിച്ച യുവാക്കൾക്കെതിരെ വെടിയുതിർക്കപ്പെട്ട സംഭവത്തിൽ മലയാളിയായ ജയൻ ശിവാനന്ദൻ നായർ (51) പൊലീസിനോട് നിർണായക മൊഴി നൽകി. തനിക്ക് ഉപയോഗിച്ച തോക്ക് ഗുജറാത്തിൽ ജോലി ചെയ്തിരുന്ന സമയത്ത് വഴിയരികിൽ ഉപേക്ഷിച്ച ബാഗിൽ നിന്ന് ലഭിച്ചതാണെന്ന് അദ്ദേഹം വ്യക്തമാക്കി.
ട്രക്ക് ഡ്രൈവറായി ഗുജറാത്തിൽ ജോലി ചെയ്തിരുന്ന സമയത്താണ് ഈ തോക്ക് കണ്ടെത്തിയതെന്ന് സീനിയർ പൊലീസ് ഇൻസ്പെക്ടർ അനിൽ ഷിൻഡെ അറിയിച്ചു. ജയൻ താമസിച്ചിരുന്ന വീട്ടിലെ യുവതിയാണ് അതിക്രമത്തിന് ഇരയായത്. ബാല്യത്തിൽ മാതാപിതാക്കളെ നഷ്ടപ്പെട്ട ജയനെ വളർത്തിയത് ഈ യുവതിയുടെ കുടുംബമായതിനാൽ കുടുംബത്തോട് അടുത്ത ബന്ധം പുലർത്തിയിരുന്നുവെന്നാണ് വിവരം.
സ്കൂളിലെ താൽക്കാലിക ജീവനക്കാരിയായ യുവതി സ്കൂൾ വളപ്പിൽനിന്ന് വാഴപ്പഴം പറിക്കുന്നതിനെ ചോദ്യം ചെയ്തതാണ് തർക്കത്തിന് തുടക്കമായത്. തുടർന്ന് യുവാക്കളിൽ നിന്ന് അധിക്ഷേപവും മർദനവും നേരിട്ടതായി പൊലീസ് പറയുന്നു. മുംബ്രയിലെ ബിസ്മില്ലാ ചാളിൽ യുവതിയെ തടഞ്ഞുവെച്ച് ശല്യം ചെയ്തപ്പോൾ, സഹായത്തിനായി ജയനെ വിളിക്കുകയായിരുന്നു.
തോക്കുമായി സ്ഥലത്തെത്തിയ ജയൻ വെടിയുതിർക്കുകയായിരുന്നു. സംഭവത്തിൽ ഒരാൾ മരിച്ചു; രണ്ടുപേർക്ക് പരുക്കേറ്റു. സംഭവസ്ഥലത്തുനിന്ന് നാല് കിലോമീറ്റർ അകലത്തിൽ നിന്നാണ് ജയനെ പൊലീസ് പിടികൂടിയത്. പിന്നീട് റിമാൻഡ് ചെയ്തു. യുവതിക്കെതിരെയും കേസെടുത്തിട്ടുണ്ട്.
കൊല്ലം സ്വദേശിയായ ജയൻ മുൻ സൈനികനാണെന്നാണ് പൊലീസ് കണ്ടെത്തൽ. പരിശീലനം ലഭിച്ചയാളായതിനാൽ കൃത്യമായി വെടിവച്ചതാകാമെന്ന് പൊലീസ് വിലയിരുത്തുന്നു. അക്ബർ അബ്ദുൽ ഷെയ്ഖ് ആണ് മരിച്ചത്. അക്ബർ ഹസൻ ഷെയ്ഖ്, സമീർ അഹമ്മദ് എന്നിവർക്ക് പരുക്കേറ്റിട്ടുണ്ട്. സഹോദരിയായി കാണുന്ന യുവതിയെ രക്ഷിക്കാനാണ് വെടിയുതിർന്നതെന്നാണ് ജയന്റെ മൊഴി.
English Summary
Malayali man Jayan Sivanandan Nair (51), who opened fire at youths allegedly attempting to assault a woman in Mumbai, told police that he obtained the gun from an abandoned bag while working as a truck driver in Gujarat.
The woman, who had close family ties with Jayan, called him for help after being harassed and assaulted. Jayan reached the spot with the gun and fired, killing one person and injuring two others. Police arrested him 4 km from the scene and remanded him.
Jayan, a native of Kollam and a former serviceman, claimed he fired to protect the woman, whom he considers like a sister.
