ചാരവൃത്തിക്കായി കുട്ടികളെ റിക്രൂട്ട് ചെയ്ത് ഐഎസ്ഐ; ചാരശൃംഖല പുറത്തു വന്നത് 15കാരൻ അറസ്റ്റിലായതോടെ
പത്താൻകോട്ട്: ഇന്ത്യൻ കൗമാരക്കാരെ ചാരവൃത്തിക്കായി പാകിസ്ഥാൻ ചാരസംഘടനയായ ഐഎസ്ഐ ഉപയോഗിക്കുന്നതായി ഞെട്ടിക്കുന്ന വിവരങ്ങൾ പുറത്ത്.
പഞ്ചാബിലെ പത്താൻകോട്ടിൽ 15 വയസ്സുള്ള ആൺകുട്ടിയെ പോലീസ് അറസ്റ്റ് ചെയ്തതോടെയാണ് ഗുരുതരമായ ഈ ചാരശൃംഖല പുറത്തായത്.
സംഭവത്തിന്റെ പശ്ചാത്തലത്തിൽ സമാനമായി ഐഎസ്ഐയുടെ വലയിലായ മറ്റ് കുട്ടികളെ കണ്ടെത്താൻ പഞ്ചാബ് പോലീസ് സംസ്ഥാനവ്യാപകമായി അന്വേഷണം ശക്തമാക്കി.
ജമ്മുവിലെ സാംബ ജില്ല സ്വദേശിയായ ഈ കൗമാരക്കാരൻ കഴിഞ്ഞ ഏകദേശം ഒരു വർഷമായി പാകിസ്ഥാനിലെ ഉദ്യോഗസ്ഥരുമായി നിരന്തരം ബന്ധപ്പെട്ടിരുന്നുവെന്നാണ് പോലീസ് കണ്ടെത്തൽ.
മൊബൈൽ ഫോൺ ഉപയോഗിച്ച് ഇന്ത്യയുടെ തന്ത്രപ്രധാനമായ സൈനിക വിവരങ്ങളും സുരക്ഷാ രേഖകളും പാകിസ്ഥാനിലേക്ക് കൈമാറിയതായാണ് പ്രാഥമിക അന്വേഷണത്തിൽ വ്യക്തമായത്.
ടെക്നിക്കൽ അനാലിസിസ് വഴിയാണ് കുട്ടിക്ക് പാകിസ്ഥാൻ ബന്ധമുണ്ടെന്ന് പോലീസ് സ്ഥിരീകരിച്ചത്.
ചോദ്യം ചെയ്യലിൽ നിന്ന്, ഈ കുട്ടി മാത്രമല്ല പഞ്ചാബിലെ വിവിധ ജില്ലകളിലായി കൂടുതൽ പ്രായപൂർത്തിയാകാത്ത കുട്ടികൾ പാക് ചാരന്മാരുമായി ബന്ധത്തിലുണ്ടെന്ന വിവരം ലഭിച്ചിട്ടുണ്ട്.
പത്താൻകോട്ട് സീനിയർ സൂപ്രണ്ട് ഓഫ് പോലീസ് ദൽജിന്ദർ സിംഗ് ധില്ലൺ വാർത്താസമ്മേളനത്തിൽ, കേസ് അതീവ ഗൗരവമുള്ളതാണെന്ന് വ്യക്തമാക്കി.
കുട്ടികളെ ലക്ഷ്യമാക്കി പ്രവർത്തിക്കുന്ന ഈ ചാരശൃംഖല തകർക്കാൻ എല്ലാ പോലീസ് സ്റ്റേഷനുകൾക്കും കർശന നിർദ്ദേശങ്ങൾ നൽകിയിട്ടുണ്ടെന്നും അദ്ദേഹം പറഞ്ഞു.
അതിർത്തി മേഖലകളിലെ ഡിജിറ്റൽ ഇടപാടുകളും സോഷ്യൽ മീഡിയ ഉപയോഗവും കർശന നിരീക്ഷണത്തിലാണ്.
പ്രായപൂർത്തിയാകാത്തവർ ഡിജിറ്റൽ ലോകത്തെ അപകടങ്ങളെക്കുറിച്ച് ബോധവാന്മാരല്ലെന്നതും, അവർക്ക് എളുപ്പത്തിൽ സംശയം ഉയരാറില്ലെന്നതും മുതലെടുത്താണ് ഐഎസ്ഐ ഇത്തരം തന്ത്രങ്ങൾ നടപ്പാക്കുന്നതെന്നാണ് സുരക്ഷാ ഏജൻസികളുടെ വിലയിരുത്തൽ.
ഓൺലൈൻ പ്ലാറ്റ്ഫോമുകളും ഗെയിമുകളും വഴിയാണ് കുട്ടികളുമായി സൗഹൃദം സ്ഥാപിച്ച് സ്വാധീനിക്കുന്നത്.
ദേശീയ സുരക്ഷയ്ക്ക് ഗുരുതര ഭീഷണിയായ ഈ കേസിൽ കൂടുതൽ അറസ്റ്റുകൾ ഉണ്ടാകാൻ സാധ്യതയുണ്ടെന്നാണ് അന്വേഷണ സംഘത്തിന്റെ സൂചന.
കുട്ടികളുടെ ഇന്റർനെറ്റ് ഉപയോഗത്തിൽ മാതാപിതാക്കൾ കൂടുതൽ ജാഗ്രത പുലർത്തണമെന്ന് സുരക്ഷാ ഏജൻസികൾ മുന്നറിയിപ്പ് നൽകുന്നു.
English Summary
In a shocking revelation, Pakistani intelligence agency ISI has been found using Indian teenagers for espionage activities. Punjab Police arrested a 15-year-old boy in Pathankot, following which a statewide investigation was launched to identify other minors trapped in similar networks.
isi-using-indian-teenagers-espionage-pathankot-minor-arrested
ISI espionage, Indian teenagers, Pathankot arrest, Punjab police, national security, Pakistan spying, minors used for espionage, border security, social media surveillance
