ഹുർമുസ് കടലിടുക്കിൽ കപ്പലുകൾക്ക് ‘ടോൾ’ ഏർപ്പെടുത്താൻ ഇറാൻ
ഹുർമുസ് കടലിടുക്കിലൂടെ സഞ്ചരിക്കുന്ന ചരക്ക് കപ്പലുകളിൽ നിന്നും ടാങ്കറുകളിൽ നിന്നും പ്രത്യേക ഫീസ് ഈടാക്കാനുള്ള വിവാദപരമായ നീക്കവുമായി ഇറാൻ പാർലമെന്റ് മുന്നോട്ട് പോകുന്നു.
ലോകത്തിലെ ഏറ്റവും പ്രധാനപ്പെട്ട സമുദ്രപാതകളിലൊന്നായ ഹുർമുസ് കടലിടുക്കിന്റെ സുരക്ഷ ഉറപ്പാക്കുന്നതിനായി രാജ്യം വലിയ തുക ചെലവഴിക്കുന്നുണ്ടെന്നും അത് നികത്താൻ കപ്പലുകൾ തീരുവ നൽകണമെന്നുമാണ് ഇറാന്റെ വാദം.
ഇറാനിയൻ വാർത്താ ഏജൻസികളായ ഫാർസ്, തസ്നീം എന്നിവയെ ഉദ്ധരിച്ച് അൽ ജസീറയാണ് ഈ നിർണായക വിവരം പുറത്തുവിട്ടത്.
അന്താരാഷ്ട്ര തലത്തിൽ മറ്റ് പ്രധാന ജലപാതകൾ ഉപയോഗിക്കുമ്പോൾ ടോൾ നൽകുന്നതിന് സമാനമായ രീതിയിൽ ഇവിടെയും ഫീസ് ഈടാക്കുന്നത് സ്വാഭാവികമാണെന്ന് ഇറാൻ പാർലമെന്ററി സമിതി അധ്യക്ഷൻ വ്യക്തമാക്കി.
ആഗോള ഊർജ്ജ വിപണിയെ സംബന്ധിച്ചിടത്തോളം ഹുർമുസ് കടലിടുക്ക് ഒരു ജീവനാഡിയാണ്. ലോകത്തെ മൊത്തം പെട്രോളിയം, ദ്രവീകൃത പ്രകൃതിവാതക (LNG) കയറ്റുമതിയുടെ അഞ്ചിലൊന്ന് ഭാഗവും കടന്നുപോകുന്നത് ഈ ഇടുങ്ങിയ പാതയിലൂടെയാണ്.
നിലവിലെ പശ്ചിമേഷ്യൻ സംഘർഷങ്ങൾക്കിടയിൽ ഇറാന്റെ ഈ പുതിയ നീക്കം ആഗോള സമ്പദ്വ്യവസ്ഥയെ കൂടുതൽ പ്രതിസന്ധിയിലാക്കും.
ഇതിനോടകം തന്നെ ഏഷ്യൻ രാജ്യങ്ങളിൽ ഉൾപ്പെടെ ഇന്ധന വിതരണത്തെയും എൽ.പി.ജി ലഭ്യതയെയും സംഘർഷം ബാധിച്ചു തുടങ്ങിയിട്ടുണ്ട്. ഗതാഗത ചെലവ് വർദ്ധിക്കുന്നത് വിമാനക്കമ്പനികൾ മുതൽ സാധാരണ സൂപ്പർമാർക്കറ്റുകളെ വരെ പ്രതികൂലമായി ബാധിച്ചിരിക്കുകയാണ്.
കർഷകരെയും സാധാരണക്കാരെയും ഒരുപോലെ ബാധിക്കുന്ന തലത്തിലേക്ക് ഈ പ്രതിസന്ധി വളരുകയാണ്. ട്രാക്ടറുകൾക്ക് ആവശ്യമായ ഡീസൽ ലഭിക്കാത്തത് കാർഷിക മേഖലയെ തളർത്തുന്നു.
നിലവിലെ സംഘർഷാവസ്ഥ ജൂൺ മാസം വരെ നീണ്ടുനിൽക്കുകയാണെങ്കിൽ ലോകമെമ്പാടുമുള്ള കോടിക്കണക്കിന് ആളുകൾ പട്ടിണിയിലാകാൻ സാധ്യതയുണ്ടെന്ന് ലോക ഭക്ഷ്യ പ്രോഗ്രാം (WFP) ഇതിനോടകം മുന്നറിയിപ്പ് നൽകിക്കഴിഞ്ഞു.
വിതരണ ശൃംഖലയിലുണ്ടാകുന്ന തടസ്സങ്ങൾ ഭക്ഷ്യവസ്തുക്കളുടെ വില കുത്തനെ ഉയരാൻ കാരണമാകുമെന്നാണ് വിലയിരുത്തപ്പെടുന്നത്.
അതിനിടെ, ഇറാനും അമേരിക്കയും തമ്മിലുള്ള രാഷ്ട്രീയ പോര് കൂടുതൽ സങ്കീർണ്ണമായി തുടരുകയാണ്. ഇറാൻ സമാധാന ചർച്ചകൾക്ക് ആഗ്രഹിക്കുന്നുണ്ടെന്നും എന്നാൽ അത് വെളിപ്പെടുത്താൻ അവർക്ക് ഭയമാണെന്നുമാണ് യു.എസ് പ്രസിഡന്റ് ഡൊണാൾഡ് ട്രംപിന്റെ പരിഹാസം.
എന്നാൽ അമേരിക്കയുമായി നേരിട്ടുള്ള ചർച്ചകൾക്ക് ഇറാൻ തയ്യാറായിട്ടില്ലെന്ന് വിദേശകാര്യമന്ത്രി അബ്ബാസ് അരാഗ്ചി വ്യക്തമാക്കി.
അതേസമയം, ഇറാന്റെ ആണവ പദ്ധതികളും മിസൈൽ പരീക്ഷണങ്ങളും നിയന്ത്രിക്കുന്നതിനായി 15 ഇന കർശന നിർദ്ദേശങ്ങൾ അമേരിക്ക മുന്നോട്ടുവെച്ചിട്ടുണ്ട്. ഇത് അംഗീകരിക്കാൻ ഇറാൻ തയ്യാറാകാത്തത് മേഖലയിലെ അസ്ഥിരത വർദ്ധിപ്പിക്കുന്നു.
സൈനിക തലത്തിലും ഇരുരാജ്യങ്ങളും തമ്മിൽ കൊമ്പുകോർക്കൽ തുടരുകയാണ്. ഇറാന്റെ നാവിക ശേഷിയുടെ ബഹുഭൂരിഭാഗവും തകർത്തതായും അവരുടെ ഡ്രോൺ ആക്രമണങ്ങളെ പ്രതിരോധിച്ചതായും യു.എസ് സെൻട്രൽ കമാൻഡ് അവകാശപ്പെടുന്നു.
എന്നാൽ ഇതിനെ പ്രതിരോധിക്കാൻ കൂടുതൽ വ്യോമസേനയെ ഗൾഫ് മേഖലയിൽ വിന്യസിക്കാനുള്ള തയ്യാറെടുപ്പിലാണ് പെന്റഗൺ.
ഹുർമുസ് കടലിടുക്കിൽ ഫീസ് ഏർപ്പെടുത്താനുള്ള ഇറാന്റെ തീരുമാനം നടപ്പിലായാൽ അത് അന്താരാഷ്ട്ര നാവിക നിയമങ്ങളുടെ ലംഘനമാകുമെന്നും കൂടുതൽ സൈനിക ഏറ്റുമുട്ടലുകൾക്ക് വഴിമരുന്നിടുമെന്നും നിരീക്ഷകർ ഭയപ്പെടുന്നു.
