‘യുഎസ് എണ്ണക്കപ്പൽ ആക്രമിച്ചു’; പേർഷ്യൻ ഗൾഫിൽ തീപിടിത്തമുണ്ടായതായി ഇറാൻ
പശ്ചിമേഷ്യയിലെ സംഘർഷം കൂടുതൽ രൂക്ഷമാകുന്നതിനിടെ യുഎസ് എണ്ണക്കപ്പലിന് നേരെ ആക്രമണം നടത്തിയതായി ഇറാൻ അവകാശപ്പെട്ടു.
വടക്കൻ പേർഷ്യൻ ഗൾഫിൽ വ്യാഴാഴ്ച രാവിലെയായിരുന്നു ആക്രമണമെന്നാണ് ഇറാന്റെ സായുധസേനയായ ഐആർജിസി വ്യക്തമാക്കുന്നത്.
പേർഷ്യൻ ഗൾഫിൽ യുഎസ് എണ്ണക്കപ്പലിനെ ലക്ഷ്യമാക്കി ആക്രമണം നടത്തിയതായി ഇറാന്റെ എലൈറ്റ് സായുധസേനയായ ഇസ്ലാമിക് റവല്യൂഷണറി ഗാർഡ് കോർപ്സ് (IRGC) അവകാശപ്പെട്ടു.
വ്യാഴാഴ്ച രാവിലെ വടക്കൻ പേർഷ്യൻ ഗൾഫിൽ തങ്ങളുടെ വ്യോമസേന നടത്തിയ ആക്രമണത്തിലാണ് യുഎസ് കപ്പൽ ലക്ഷ്യമാക്കിയതെന്ന് ഐആർജിസി അറിയിച്ചു.
ആക്രമണത്തിന് പിന്നാലെ കപ്പലിൽ തീപിടിത്തമുണ്ടായതായും ഇറാൻ അവകാശപ്പെടുന്നു. എന്നാൽ സംഭവത്തെക്കുറിച്ച് യുഎസ് ഔദ്യോഗിക സ്ഥിരീകരണം ഇതുവരെ പുറത്തുവന്നിട്ടില്ല.
ഇതോടൊപ്പം യുഎസ്, ഇസ്രയേൽ, യൂറോപ്യൻ രാജ്യങ്ങളുടെ പതാകയുള്ള സൈനികവും വാണിജ്യവുമായ കപ്പലുകൾക്ക് പ്രദേശം വഴി സഞ്ചരിക്കാൻ അനുവദിക്കില്ല എന്നും ഐആർജിസി മുന്നറിയിപ്പ് നൽകി.
ഇത്തരം കപ്പലുകൾ നിരീക്ഷണത്തിലാണെന്നും ആവശ്യമെങ്കിൽ ആക്രമണം നടത്തുമെന്നും ഇറാൻ വ്യക്തമാക്കി.
അന്താരാഷ്ട്ര നിയമങ്ങൾ പ്രകാരം യുദ്ധസാഹചര്യങ്ങളിൽ ഹോർമുസ് കടലിടുക്കിലൂടെ നടക്കുന്ന കപ്പൽ ഗതാഗതം നിയന്ത്രിക്കാൻ ഇറാന് അധികാരമുണ്ടെന്ന് മുമ്പ് വ്യക്തമാക്കിയിരുന്നുവെന്നും ഐആർജിസി തസ്നിം ന്യൂസ് ഏജൻസിയോട് പറഞ്ഞു.
ഇതിനിടയിൽ സംഘർഷം കൂടുതൽ കടുപ്പിച്ച മറ്റൊരു സംഭവവും അടുത്തിടെ റിപ്പോർട്ട് ചെയ്തിരുന്നു.
ശ്രീലങ്കയ്ക്ക് സമീപമുള്ള പുറംകടലിൽ ഇറാൻ നാവികസേനയുടെ ‘ഐആർഐഎസ് ദേന’ (IRIS Dena) എന്ന യുദ്ധക്കപ്പൽ യുഎസ് അന്തർവാഹിനി ആക്രമിച്ച് മുങ്ങിച്ചുവെന്നാണ് റിപ്പോർട്ടുകൾ. ആക്രമണത്തിൽ കപ്പലിലുണ്ടായിരുന്ന 87 നാവികർ കൊല്ലപ്പെട്ടതായി പറയപ്പെടുന്നു.
ഈ സംഭവത്തിന് പിന്നാലെയാണ് യുഎസിന്റെ എണ്ണക്കപ്പൽ ആക്രമിച്ചുവെന്ന അവകാശവാദവുമായി ഇറാൻ രംഗത്തെത്തിയത്. ഇറാന്റെ യുദ്ധക്കപ്പൽ മുങ്ങിച്ചതിന് അമേരിക്ക വലിയ വില കൊടുക്കേണ്ടിവരുമെന്ന് ഇറാൻ വിദേശകാര്യമന്ത്രി നേരത്തെ മുന്നറിയിപ്പ് നൽകിയിരുന്നു.
ENGLISH SUMMARY
Iran’s Islamic Revolutionary Guard Corps (IRGC) has claimed that it attacked a US oil tanker in the northern Persian Gulf, causing a fire onboard. The claim comes amid escalating tensions in the region after reports that a US submarine sank an Iranian warship near Sri Lanka. Iran has also warned that ships linked to the US, Israel, and European countries will not be allowed to pass through the region.
