പൊതുശൗചാലയങ്ങളിൽ മാത്രമല്ല വിമാനത്തിലും എഴുതി; മാർക്കർ വെച്ചല്ല മൂർച്ച വെച്ച്
ദില്ലി: വിമാനയാത്രകൾ പലർക്കും ആവേശകരമായ അനുഭവമായിരിക്കുമ്പോൾ, ചിലപ്പോൾ അശ്രദ്ധയും അനിയന്ത്രിത പെരുമാറ്റങ്ങളും വിവാദങ്ങൾക്ക് വഴിവെക്കാറുണ്ട്. അത്തരത്തിലൊരു അസാധാരണ സംഭവമാണ് ഇപ്പോൾ സമൂഹമാധ്യമങ്ങളിൽ ചർച്ചയാകുന്നത്.
ഇൻഡിഗോ വിമാനത്തിനുള്ളിൽ നിന്ന് എടുത്ത ചിത്രമാണ് റെഡ്ഡിറ്റിൽ പങ്കുവെച്ചത്. ചിത്രത്തിൽ വിമാനത്തിന്റെ വിൻഡോ ഗ്ലാസിൽ ‘മാൻവിക്’ അല്ലെങ്കിൽ ‘മാൻവി കെ’ എന്ന പേര് വ്യക്തമായി കൊത്തിവെച്ചിരിക്കുന്നത് കാണാം.
മാർക്കർ ഉപയോഗിച്ച് എഴുതിയതല്ല, മറിച്ച് ഗ്ലാസിന്റെ മേൽപ്പുറത്ത് നേരിട്ട് കൊത്തിവെച്ചതാണ് ഈ പേര് എന്നതാണ് ആളുകളെ കൂടുതൽ ഞെട്ടിച്ചത്.
“ഒരു വിഡ്ഢി വിമാനത്തിന്റെ വിൻഡോ ഗ്ലാസിൽ തന്റെ പേര് കൊത്തിവെച്ചു. പൊതുശൗചാലയങ്ങളിലെ ചുമരുകളിൽ ഇങ്ങനെ പേരുകൾ കൊത്തിവെച്ചിരിക്കുന്നത് കണ്ടിട്ടുണ്ട്, പക്ഷേ ഒരു വിമാനത്തിനുള്ളിൽ ഇതാദ്യമായാണ്,” എന്നായിരുന്നു പോസ്റ്റിനൊപ്പം ചേർത്ത കുറിപ്പ്.
ഇത് ഒരു ഇൻഡിഗോ വിമാനമാണെന്നും, സംഭവം ഇമെയിൽ വഴി അധികൃതരെ അറിയിച്ചതായും പോസ്റ്റ് ചെയ്ത വ്യക്തി കമന്റിലൂടെ വ്യക്തമാക്കി.
പോസ്റ്റ് വളരെ വേഗം വൈറലായി. നിരവധി ഉപയോക്താക്കൾ കടുത്ത വിമർശനവും പരിഹാസവുമാണ് രേഖപ്പെടുത്തിയത്. “ഇത്തരമൊരു സംഭവം കണ്ടാൽ ഉടൻ ക്യാബിൻ ക്രൂവിനെ അറിയിക്കണം” എന്നായിരുന്നു ഒരാളുടെ പ്രതികരണം.
ബോർഡിംഗ് പാസ് പരിശോധിച്ച് കുറ്റക്കാരനെ കണ്ടെത്തണമെന്നും ചിലർ ആവശ്യപ്പെട്ടു.
മുതിർന്നയാളാണ് ഇതിന് പിന്നിലെങ്കിൽ അത് വലിയ നാണക്കേടാണെന്നും, കുട്ടിയാണെങ്കിൽ കൂടെയുണ്ടായിരുന്ന മുതിർന്നവർ ഇത്തരം പ്രവൃത്തികൾ തടയാതിരുന്നതും കുറ്റകരമാണെന്നും അഭിപ്രായങ്ങളുണ്ടായി.
അതേസമയം, മൂർച്ചയുള്ള വസ്തുക്കൾ വിമാനത്തിൽ കയറ്റാൻ നിയന്ത്രണമുള്ള സാഹചര്യത്തിൽ ഇത് എങ്ങനെ സാധ്യമായി എന്ന ചോദ്യവും നിരവധി പേർ ഉന്നയിച്ചു.
English Summary
A Reddit post showing a passenger’s name carved onto the window glass of an IndiGo aircraft has gone viral. The unusual act sparked outrage and ridicule online, with users questioning how such damage was possible despite strict airline security and calling for the offender to be identified.
indigo-flight-window-glass-name-carved-reddit-viral
IndiGo, flight incident, airline news, viral post, Reddit, aviation safety, passenger behaviour
