യുഎസിൽ നിന്നുള്ള എണ്ണ ഇറക്കുമതിയില് കുതിപ്പ്; മുന്നില് ഇപ്പോഴും റഷ്യ തന്നെ
ന്യൂഡൽഹി: നടപ്പ് സാമ്പത്തിക വർഷത്തിലെ ആദ്യ എട്ട് മാസങ്ങളിൽ അമേരിക്കയിൽ നിന്നുള്ള അസംസ്കൃത എണ്ണ ഇറക്കുമതി ഇന്ത്യ ഗണ്യമായി വർധിപ്പിച്ചതായി റിപ്പോർട്ട്.
അതേസമയം, ഇന്ത്യയുടെ ഏറ്റവും വലിയ എണ്ണ വിതരണക്കാരെന്ന നിലയിൽ റഷ്യ തുടർന്നും മുൻപന്തിയിലാണെന്നും കണക്കുകൾ വ്യക്തമാക്കുന്നു.
വാണിജ്യ–വ്യവസായ മന്ത്രാലയത്തിന്റെ ഔദ്യോഗിക കണക്കുകൾ പ്രകാരം, 2025 ഏപ്രിൽ മുതൽ നവംബർ വരെയുള്ള കാലയളവിൽ ഇന്ത്യ മൊത്തം 17.81 കോടി ടൺ അസംസ്കൃത എണ്ണയാണ് ഇറക്കുമതി ചെയ്തത്.
ഇതിൽ 6 കോടി ടൺ റഷ്യയിൽ നിന്നാണ്. അമേരിക്കയിൽ നിന്ന് ഇറക്കുമതി ചെയ്തത് 1.3 കോടി ടൺ എണ്ണയാണ്.
2024ലെ ഇതേ കാലയളവിൽ ഇന്ത്യയുടെ മൊത്തം എണ്ണ ഇറക്കുമതി 16.5 കോടി ടൺ ആയിരുന്നു. അന്നത്തെ കണക്കുകൾ പ്രകാരം റഷ്യയിൽ നിന്ന് 6.24 കോടി ടണ്ണും, അമേരിക്കയിൽ നിന്ന് 71 ലക്ഷം ടണ്ണുമാണ് ഇന്ത്യ വാങ്ങിയത്.
ഇക്കൊല്ലം അമേരിക്കയിൽ നിന്നുള്ള അസംസ്കൃത എണ്ണ ഇറക്കുമതിയിൽ 92 ശതമാനത്തിലധികം വാർഷിക വർധനയാണ് രേഖപ്പെടുത്തിയിരിക്കുന്നത്.
ഇന്ത്യയുടെ മൊത്തം എണ്ണ ഇറക്കുമതിയിൽ അമേരിക്കയുടെ പങ്ക് 4.3 ശതമാനത്തിൽ നിന്ന് 7.6 ശതമാനമായി ഉയർന്നു.
അതേസമയം, റഷ്യയുടെ വിഹിതം മുൻ സാമ്പത്തിക വർഷത്തെ 37.9 ശതമാനത്തിൽ നിന്ന് 33.7 ശതമാനമായി കുറഞ്ഞതായും കണക്കുകൾ സൂചിപ്പിക്കുന്നു.
2025 നവംബറിൽ മാത്രം ഇന്ത്യ റഷ്യയിൽ നിന്ന് 77 ലക്ഷം ടൺ ക്രൂഡ് ഓയിൽ ഇറക്കുമതി ചെയ്തു. 2024 നവംബറിൽ ഇത് 72 ലക്ഷം ടണ്ണായിരുന്നു.
അതേസമയം, അമേരിക്കയിൽ നിന്നുള്ള ഇറക്കുമതി വലിയ ചാട്ടമാണ് കാണിച്ചത്. കഴിഞ്ഞ വർഷം നവംബറിലെ 11 ലക്ഷം ടണ്ണിൽ നിന്ന് 2025 നവംബറിൽ 28 ലക്ഷം ടണ്ണായി ഉയർന്നു — 144 ശതമാനം വർധന.
റഷ്യൻ എണ്ണയിൽ നിന്നുള്ള ആശ്രയം കുറയ്ക്കണമെന്ന ആവശ്യം ഉന്നയിച്ച് മാസങ്ങൾക്ക് മുൻപ് അമേരിക്ക ഇന്ത്യയുടെ കയറ്റുമതികൾക്ക് മേൽ അധിക തീരുവ ചുമത്തിയിരുന്നു.
അമേരിക്കയിൽ നിന്നുള്ള ഇറക്കുമതി വർധിപ്പിച്ചിട്ടുണ്ടെങ്കിലും, റഷ്യൻ എണ്ണയിൽ നിന്നുള്ള ഇന്ത്യയുടെ ആശ്രയം പൂർണമായി അവസാനിച്ചിട്ടില്ലെന്നതും ഈ കണക്കുകൾ വ്യക്തമാക്കുന്നു.
English Summary
India significantly increased crude oil imports from the United States during the first eight months of the current financial year, recording over 92% annual growth. However, Russia continues to remain India’s largest crude oil supplier, despite a marginal decline in its overall share.
india-us-crude-oil-imports-rise-russia-remains-top-supplier
India Oil Imports, Crude Oil, Russia India Trade, US India Energy, Indian Economy, Global Energy Market
