ഏറ്റവും വലിയ ‘തലവേദന’ ക്യാപ്റ്റൻ തന്നെ; സഞ്ജു തുടരുമോ? ടി20 ലോകകപ്പ് ടീമിനെ ഇന്നറിയാം
മുംബൈ: ഐസിസി ടി20 ലോകകപ്പിനുള്ള ഇന്ത്യൻ ക്രിക്കറ്റ് ടീമിനെ ഇന്ന് പ്രഖ്യാപിക്കും. സെലക്ഷൻ കമ്മിറ്റി യോഗത്തിന് പിന്നാലെ നടക്കുന്ന വാർത്താസമ്മേളനത്തിലായിരിക്കും ഔദ്യോഗിക പ്രഖ്യാപനം.
മുഖ്യ സെലക്ഷൻ കമ്മിറ്റി അധ്യക്ഷൻ അജിത് അഗാർക്കറും ഇന്ത്യൻ ടീം ക്യാപ്റ്റൻ സൂര്യകുമാർ യാദവും ചേർന്നായിരിക്കും ടീമിനെ പ്രഖ്യാപിക്കുക.
ദക്ഷിണാഫ്രിക്കയ്ക്കെതിരായ ടി20 പരമ്പര 3–1ന് സ്വന്തമാക്കിയതിന് പിന്നാലെയാണ് ലോകകപ്പ് ടീം പ്രഖ്യാപിക്കുന്നത് എന്നതും ശ്രദ്ധേയമാണ്. ടീമിന്റെ പ്രഖ്യാപനത്തിനായി സൂര്യകുമാർ യാദവ് അഹമ്മദാബാദിൽ നിന്ന് മുംബൈയിലെത്തും.
ലോകകപ്പ് ടീമിനൊപ്പം ജനുവരിയിൽ ന്യൂസിലൻഡിനെതിരായ പരമ്പരയ്ക്കുള്ള ടീമും ഒരേസമയം പ്രഖ്യാപിക്കും. ജനുവരി 11നാണ് പരമ്പര ആരംഭിക്കുക.
മൂന്ന് ഏകദിനങ്ങളും അഞ്ച് ടി20 മത്സരങ്ങളുമാണ് പരമ്പരയിൽ ഉൾപ്പെട്ടിരിക്കുന്നത്. ടി20 ലോകകപ്പിന് മുൻപുള്ള ഇന്ത്യയുടെ അവസാന പരമ്പരയായതിനാൽ ലോകകപ്പ് ടീമിനോട് സാമ്യമുള്ള സ്ക്വാഡായിരിക്കും ടി20 മത്സരങ്ങളിൽ ഇറങ്ങുക.
ഫെബ്രുവരി ഏഴിനാണ് ടി20 ലോകകപ്പിന് തുടക്കമാകുന്നത്. മാർച്ച് എട്ടിനാണ് ഫൈനൽ. ഗ്രൂപ്പ് എയിൽ ഉൾപ്പെട്ട ഇന്ത്യക്ക് പാകിസ്ഥാൻ, യുഎസ്എ, നമീബിയ, നെതർലൻഡ്സ് എന്നിവരാണ് എതിരാളികൾ.
ഫെബ്രുവരി ഏഴിന് യുഎസ്എയ്ക്കെതിരായ മത്സരത്തോടെയാണ് ഇന്ത്യയുടെ ലോകകപ്പ് യാത്ര ആരംഭിക്കുക. വിക്കറ്റ് കീപ്പർമാരായി സഞ്ജു സാംസണും ജിതേഷ് ശർമയും പരിഗണിക്കപ്പെടുമെന്നാണ് സൂചന.
ഋഷഭ് പന്തിനെ ടീമിൽ ഉൾപ്പെടുത്താൻ സാധ്യത കുറവാണെങ്കിലും, മുഷ്താഖ് അലി ട്രോഫിയിൽ മികച്ച പ്രകടനം കാഴ്ചവെച്ച ഇഷാൻ കിഷാൻ അവസാന നിമിഷം ടീമിലെത്തുമോ എന്നതിൽ ആകാംക്ഷയുണ്ട്.
2024 ലോകകപ്പിൽ ടീമിലുണ്ടായിരുന്ന സഞ്ജുവിന് ഒരു മത്സരത്തിലും അവസരം ലഭിച്ചിരുന്നില്ല. ദക്ഷിണാഫ്രിക്ക പരമ്പരയ്ക്ക് മുമ്പ് ടീമിൽ നിന്ന് ഒഴിവാക്കപ്പെട്ട റിങ്കു സിങ് തിരിച്ചെത്തുമോ എന്നതും ചർച്ചയാകുന്നുണ്ട്.
അതേസമയം, ക്യാപ്റ്റൻ സൂര്യകുമാർ യാദവിന്റെ ടി20 ഫോമിലെ ഇടിവ് ടീമിന് തലവേദനയായി മാറുകയാണ്. 2025ൽ ടി20യിൽ ഒരു അർധസെഞ്ച്വറി പോലും നേടാൻ സൂര്യയ്ക്ക് സാധിച്ചിട്ടില്ല.
21 ഇന്നിങ്സുകളിൽ നിന്നായി 218 റൺസ് മാത്രമാണ് നേടിയിട്ടുള്ളത്. ഉയർന്ന സ്കോർ 47. ടി20 ലോകകപ്പോടെ സൂര്യയുടെ ക്യാപ്റ്റൻ സ്ഥാനം നഷ്ടമാകുമെന്ന വിലയിരുത്തലുകളും ശക്തമാണ്.
സാധ്യതാ ഇന്ത്യൻ ടീം:
സൂര്യകുമാർ യാദവ് (ക്യാപ്റ്റൻ), ശുഭ്മാൻ ഗിൽ (വൈസ് ക്യാപ്റ്റൻ), അഭിഷേക് ശർമ, തിലക് വർമ്മ, ജിതേഷ് ശർമ (വിക്കറ്റ് കീപ്പർ), അക്ഷർ പട്ടേൽ, ഹാർദിക് പാണ്ഡ്യ, ശിവം ദുബെ, സഞ്ജു സാംസൺ / ഇഷാൻ കിഷാൻ (വിക്കറ്റ് കീപ്പർ), വാഷിങ്ടൺ സുന്ദർ, കുൽദീപ് യാദവ്, വരുണ് ചക്രവർത്തി, ജസ്പ്രിത് ബുംറ, ഹർഷിത് റാണ, അർഷ്ദീപ് സിങ്.
English Summary
India will announce its squad for the ICC T20 World Cup today in Mumbai after a selection committee meeting. Chief selector Ajit Agarkar and captain Suryakumar Yadav will jointly unveil the team. Along with the World Cup squad, the team for the January series against New Zealand will also be announced. India will begin its World Cup campaign on February 7 against the USA. Concerns remain over Suryakumar Yadav’s poor T20 form in 2025, while selections of wicketkeepers and possible comebacks have generated significant interest.
india-t20-world-cup-squad-announcement-today-suryakumar-form-concern
India cricket team, T20 World Cup, squad announcement, Suryakumar Yadav, Ajit Agarkar, Sanju Samson, Indian cricket, New Zealand series
