കുട്ടികളുടെ സോഷ്യൽ മീഡിയ ഉപയോഗത്തിന് ‘പൂട്ടുവീഴുന്നു’; നിയന്ത്രണത്തിനൊരുങ്ങി കേന്ദ്ര സർക്കാർ
ന്യൂഡൽഹി:
16 വയസ്സിൽ താഴെയുള്ള കുട്ടികളുടെ സമൂഹമാദ്ധ്യമ ഉപയോഗം നിയന്ത്രിക്കുന്നതിന് കേന്ദ്ര സർക്കാർ നടപടികൾ ആരംഭിക്കുന്നു.
ഡീപ്ഫേക്ക് വീഡിയോകളും കുറ്റകൃത്യങ്ങൾ പ്രോത്സാഹിപ്പിക്കുന്ന ഉള്ളടക്കങ്ങളും കുട്ടികളെ ഗുരുതരമായി സ്വാധീനിക്കുന്ന പശ്ചാത്തലത്തിലാണ് നടപടി. ഇതിന്റെ ഭാഗമായി 2021ലെ ഐ.ടി. ചട്ടങ്ങളിൽ ഭേദഗതി കൊണ്ടുവരും.
ഇത് സമ്പൂർണ വിലക്കല്ല. ക്ലാസ്റൂം ആപ്പുകൾ ഉൾപ്പെടെ ചില വിദ്യാഭ്യാസ സേവനങ്ങളെ ഒഴിവാക്കി ഘട്ടംഘട്ടമായ ഭാഗിക നിയന്ത്രണമാണ് ആദ്യം നടപ്പാക്കുക.
ചില അക്കൗണ്ടുകളിലേക്കുള്ള പ്രവേശനം അനുവദിക്കുമെന്നും അനുമതിയില്ലാത്ത പ്ലാറ്റ്ഫോമുകളുടെ ഉപയോഗം കർശനമായി നിയന്ത്രിക്കുമെന്നും അധികൃതർ അറിയിച്ചു.
16 വയസ്സിൽ താഴെയുള്ളവരുടെ സാമൂഹ്യമാധ്യമ ഉപയോഗം നിയന്ത്രിക്കുന്നതിനെക്കുറിച്ച് വിവിധ കമ്പനികളുമായി ചർച്ചകൾ നടക്കുന്നുണ്ടെന്ന് കേന്ദ്ര ഐ.ടി–റെയിൽവേ മന്ത്രി അശ്വിനി വൈഷ്ണവ് അറിയിച്ചു.
ഡൽഹിയിൽ നടന്ന എ.ഐ ഉച്ചകോടിക്കിടെയാണ് മന്ത്രിയുടെ പ്രതികരണം. പ്രായാധിഷ്ഠിത നിയന്ത്രണ മാതൃക പല രാജ്യങ്ങളും ഇതിനകം സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി.
ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ (DPDP) നിയമപ്രകാരം 18 വയസ്സിൽ താഴെയുള്ള കുട്ടികളുടെ ഡാറ്റയ്ക്ക് രക്ഷിതാക്കളുടെ ഉത്തരവാദിത്തം ബാധകമാണ്.
കുട്ടികളുടെ അക്കൗണ്ടുകൾ പരിശോധിക്കാനും രക്ഷിതാക്കളുടെ അനുമതി നിർബന്ധമാണ്.
പാർലമെന്റിന്റെ ബജറ്റ് സമ്മേളനത്തിൽ അവതരിപ്പിച്ച സാമ്പത്തിക സർവേയും ഡിജിറ്റൽ പ്ലാറ്റ്ഫോമുകളിൽ പ്രായപരിധി അടിസ്ഥാനമാക്കിയ നിയന്ത്രണം ശുപാർശ ചെയ്യുന്നു.
ഓസ്ട്രേലിയൻ മാതൃക
16 വയസ്സിൽ താഴെയുള്ളവർക്ക് സമൂഹമാദ്ധ്യമ നിരോധനം നടപ്പാക്കിയ ആദ്യ രാജ്യം ഓസ്ട്രേലിയ ആണ്.
TikTok, Instagram, Facebook, X, Snapchat, Reddit, YouTube, Kick, Twitch, Threads തുടങ്ങിയ പ്ലാറ്റ്ഫോമുകൾക്ക് കഴിഞ്ഞ ഡിസംബറിൽ വിലക്ക് നിലവിൽ വന്നു.
ഓസ്ട്രേലിയയെ മാതൃകയാക്കി ഫ്രാൻസ് 15 വയസ്സിൽ താഴെയുള്ളവർക്ക് നിയന്ത്രണം ഏർപ്പെടുത്തി. ഡെൻമാർക്ക്, നോർവെ, മലേഷ്യ, സ്പെയിൻ, യുണൈറ്റഡ് കിംഗ്ഡം എന്നീ രാജ്യങ്ങളും സമാന നിയന്ത്രണങ്ങൾ പരിഗണിക്കുന്നു.
ഇന്ത്യയിൽ ഗോവ, ആന്ധ്രപ്രദേശം, കർണാടക തുടങ്ങിയ സംസ്ഥാനങ്ങളിലും നിയന്ത്രണം സംബന്ധിച്ച ചർച്ചകൾ പുരോഗമിക്കുകയാണ്. ഓസ്ട്രേലിയൻ മാതൃകയിലുള്ള നിയമം പരിഗണിക്കണമെന്ന് മദ്രാസ് ഹൈക്കോടതി കേന്ദ്ര സർക്കാരിനോട് ആവശ്യപ്പെട്ടിരുന്നു.
എ.ഐ ഉപയോഗിച്ചുള്ള ഡീപ്ഫേക്ക് വീഡിയോകൾ ഉയർത്തുന്ന ഭീഷണി കണക്കിലെടുത്ത് കുട്ടികളെയും സമൂഹത്തെയും സംരക്ഷിക്കാൻ ശക്തമായ നിയന്ത്രണം അനിവാര്യമാണെന്ന് കേന്ദ്ര സർക്കാർ വ്യക്തമാക്കി.
English Summary
The Union government plans to introduce age-based restrictions on social media use for children below 16 by amending the 2021 IT rules. The move aims to protect minors from deepfake videos and harmful online content. The restrictions will initially be partial, excluding educational platforms and allowing limited access. Union Minister Ashwini Vaishnaw said discussions are underway with social media companies. The proposal draws inspiration from Australia’s under-16 ban and similar regulations in several other countries.
india-plans-under-16-social-media-restrictions-it-rules
India, social media regulation, under 16 ban, IT rules amendment, Ashwini Vaishnaw, DPDP Act, deepfake videos, child online safety, Australia model, digital platforms
