ന്യൂഡല്ഹി: ഇന്ത്യയിലെ നിരവധി പ്രധാന അന്താരാഷ്ട്ര വിമാനത്താവളങ്ങളുടെ പരിതയിലുണ്ടായ ജിപിഎസ് സ്പൂഫിങ് സംഭവങ്ങള് ഔദ്യോഗികമായി കേന്ദ്ര സര്ക്കാര് സ്ഥിരീകരിച്ചു.
ലോക്സഭയിലെ ചോദ്യത്തിന് മറുപടി നല്കിയ കേന്ദ്ര വ്യോമയാന മന്ത്രി റാം മോഹന് നായിഡു, ഡല്ഹി, മുംബൈ, കൊല്ക്കത്ത, അമൃത്സര് എന്നീ വിമാനത്താവളങ്ങളിലാണ് സ്പൂഫിങ് റിപ്പോര്ട്ട് ചെയ്യപ്പെട്ടതെന്ന് പറഞ്ഞു.
എന്നാല് ഈ ഇടപെടലുകള് ഒന്നും വ്യോമഗതാഗതത്തിന്റെ സുരക്ഷയെയോ പ്രവര്ത്തനങ്ങളെയോ ബാധിച്ചിട്ടില്ലെന്നു മന്ത്രി വ്യക്തമാക്കി.
ഡല്ഹി എയര്പോര്ട്ടിന് സമീപം വിമാനങ്ങള് നേരിട്ട ഇടപെടല്
വൈഎസ്ആര് കോണ്ഗ്രസ് പാര്ട്ടി എംപി എസ് നിരഞ്ജന് റെഡ്ഡിയുടെ ചോദ്യത്തിന് മറുപടി നല്കവെ, ജിപിഎസ് അടിസ്ഥാനത്തിലുള്ള ലാന്ഡിങ് നടപടിക്രമങ്ങള് പിന്തുടരുന്നതിനിടെ ഡല്ഹിയിലെ ഇന്ദിരാഗാന്ധി രാജ്യാന്തര വിമാനത്താവളത്തിന് സമീപം ചില വിമാനങ്ങള് ജിപിഎസ് സ്പൂഫിങ് നേരിട്ടതായും അദ്ദേഹം പറഞ്ഞു.
സ്പൂഫിങ് സംഭവിക്കുമ്പോള് യഥാര്ത്ഥ ലൊക്കേഷന് വിവരങ്ങള് തെറ്റായ രീതിയില് ലഭിക്കാന് സാധ്യതയുണ്ടെങ്കിലും, പൈലറ്റ്മാര്ക്ക് നിര്ദേശിച്ച അടിയന്തര നടപടികള് സ്വീകരിച്ചതോടെ എല്ലാ വിമാനങ്ങളും സുരക്ഷിതമായി ലാന്ഡ് ചെയ്യുവാന് കഴിഞ്ഞതായും ഉറപ്പു നല്കി.
ഡിജിസിഎ നിര്ദ്ദേശത്തിന് പിന്നാലെ റിപ്പോര്ട്ടുകള് വര്ദ്ധിക്കുന്നു
2023 നവംബറില് ഡിജിസിഎ ജിപിഎസ് ജാമിംഗ്/സ്പൂഫിങ് കേസുകള് നിര്ബന്ധമായും റിപ്പോര്ട്ട് ചെയ്യണമെന്ന് നിര്ദ്ദേശിച്ചതിന് ശേഷം രാജ്യത്തെ പ്രധാന വിമാനത്താവളങ്ങളില്നിന്ന് പതിവായി റിപ്പോര്ട്ടുകള് ലഭിക്കുന്നുവെന്ന് മന്ത്രി ചൂണ്ടിക്കാട്ടി.
മുംബൈ, ഹൈദരാബാദ്, ബാംഗ്ലൂര്, ചെന്നൈ തുടങ്ങിയ വിമാനത്താവളങ്ങളില്നിന്നും ജിഎന്എസ്എസ് ഇടപെടലുകള് റിപ്പോര്ട്ട് ചെയ്യപ്പെട്ടിട്ടുണ്ടെന്നാണ് വിവരം.
ജിപിഎസ്, ജിഎന്എസ്എസ് സിഗ്നലുകളിലുണ്ടാകുന്ന ഈ തരത്തിലുള്ള ഇടപെടലുകളുടെ ഉറവിടം കണ്ടെത്താനായി എയര്പോര്ട്ട് അതോറിറ്റി ഓഫ് ഇന്ത്യ (AAI), വയര്ലെസ് മോണിറ്ററിങ് ഓര്ഗനൈസേഷന് (WMO) എന്നിവയെ നിയോഗിച്ചിട്ടുണ്ടെന്നും മന്ത്രി പറഞ്ഞു.
എഎഐ സൈബര് സുരക്ഷാ ശൃംഖല ശക്തിപ്പെടുത്തുന്നു
വ്യോമസുരക്ഷയ്ക്ക് ഭീഷണിയാകാവുന്ന ഇത്തരം സൈബര് ഇടപെടലുകള് തടയുന്നതിനായി എഎഐ ഐടി നെറ്റ്വര്ക്കുകള്ക്കും അടിസ്ഥാന സൗകര്യങ്ങള്ക്കും ശക്തമായ സൈബര് സുരക്ഷാ മാര്ഗ്ഗനിര്ദ്ദേശങ്ങള് നടപ്പിലാക്കിയിട്ടുണ്ടെന്നും അദ്ദേഹം കൂട്ടിച്ചേര്ത്തു.
നാഷണല് ക്രിട്ടിക്കല് ഇന്ഫര്മേഷന് ഇന്ഫ്രാസ്ട്രക്ചര് പ്രൊട്ടക്ഷന് സെന്റര് (NCIIPC), CERT-In എന്നിവയുടെ നിര്ദ്ദേശങ്ങള് അനുസരിച്ചാണ് പുതിയ സുരക്ഷാ സംവിധാനങ്ങള് ഇതോടൊപ്പം ശക്തിപ്പെടുത്തിയിരിക്കുന്നത്.
ജിപിഎസ് സ്പൂഫിങ് എന്ത്? എങ്ങനെ ബാധിക്കുന്നു?
ഫോണ്, കാര്, ഡ്രോണ്, കപ്പല് എന്നിവയുടെ യഥാര്ത്ഥ ലൊക്കേഷന് തെറ്റിദ്ധരിപ്പിക്കുന്ന തരത്തില് വ്യാജ ജിപിഎസ് സിഗ്നലുകള് സൃഷ്ടിക്കുകയോ കൈകാര്യം ചെയ്യുകയോ ചെയ്യുന്ന പ്രവര്ത്തനമാണ് ജിപിഎസ് സ്പൂഫിങ്.
വ്യോമഗതാഗതത്തിനും ദേശീയ പ്രതിരോധത്തിനും ഭീഷണിയായ ഈ പ്രവണത തിരിച്ചറിഞ്ഞുകൊണ്ട് കേന്ദ്രം കൂടുതല് കരുതലുകള് സ്വീകരിക്കുമെന്ന് ഉറപ്പുനല്കി.
English Summary
India has officially confirmed GPS spoofing incidents near major airports including Delhi, Mumbai, Kolkata, and Amritsar. Aviation Minister Ram Mohan Naidu assured Parliament that although spoofing was detected, no flight operations were affected. The government has strengthened cybersecurity measures and tasked authorities with identifying the source of the interference, which has been regularly reported since November 2023.
