കൊച്ചി: നിര്മ്മാതാവ് ആന്റണി പെരുമ്പാവൂരിനും നോട്ടീസ് നൽകി ആദായനികുതി വകുപ്പ്. മുന്പ് നടത്തിയ റെയ്ഡിന്റെ തുടര്നടപടിയുടെ ഭാഗമായാണ് നോട്ടീസ് എന്നാണ് വിശദീകരണം. ലൂസിഫര്, മരയ്ക്കാര് അറബിക്കടലിന്റെ സിംഹം എന്നി സിനിമകളുടെ സാമ്പത്തിക ഇടപാടുകളില് വ്യക്തത വരുത്തണമെന്നാണ് നോട്ടീസിൽ ആവശ്യപ്പെട്ടിരിക്കുന്നത്.
അതേസമയം നോട്ടീസിന് എംപുരാന് സിനിമാ വിവാദവുമായി നടപടികള്ക്ക് ബന്ധമില്ലെന്നും അധികൃതര് വ്യക്തമാക്കി. 2022ല് ആന്റണി പെരുമ്പാവൂരിന്റെ ഉടമസ്ഥതയിലുള്ള ആശീര്വാദ് ഫിലിംസ് അടക്കമുള്ള അഞ്ച് നിര്മ്മാണ കമ്പനികളിൽ റെയ്ഡ് നടന്നിരുന്നു.
2019 മുതല് 2022 വരെയുള്ള ഈ കമ്പനികളുടെ സാമ്പത്തിക ഇടപാടുകളാണ് അന്ന് പ്രധാനമായി പരിശോധിച്ചത്. തുടര്നടപടികളുടെ ഭാഗമായാണ് ആന്റണി പെരുമ്പാവൂരിന് ഇപ്പോള് നോട്ടീസ് നൽകിയിരിക്കുന്നത്. എംപുരാന് സിനിമയുടെ സംവിധായകനും നടനുമായ പൃഥ്വിരാജിന് നോട്ടീസ് നല്കിയ അതേസമയത്ത് തന്നെയാണ് ആന്റണി പെരുമ്പാവൂരിനും നോട്ടീസ് നല്കിയത്.
2022ല് ദുബായില് വച്ച് ആന്റണി പെരുമ്പാവൂര് രണ്ടര കോടി രൂപ മോഹന്ലാലിന് കൈമാറിയിരുന്നു അതില് വ്യക്തത വരുത്തണമെന്നാണ് ആദായനികുതി വകുപ്പ് ആവശ്യപ്പെട്ടിരിക്കുന്നത്. ഈ മാസം അവസാനത്തോടെ ആന്റണി പെരുമ്പാവൂര് ഇതില് വ്യക്തത വരുത്തണമെന്നാണ് നോട്ടീസിലെ ആവശ്യം.
