പത്തനംതിട്ട: പത്തനംതിട്ടയിൽ സി.പി.എമ്മിൽ ചേർന്ന യുവാവിനെ കഞ്ചാവുമായി എക്സൈസ് സംഘം പിടികൂടി. മയിലാടുംപാറ സ്വദേശി യദുകൃഷ്ണനാണ് പിടിയിലായത്. കാപ്പ കേസ് പ്രതിയായ ശരൺ ചന്ദ്രനൊപ്പം സിപിഎമ്മിൽ ചേർന്നയാളാണ് ഇയാൾ. ഇയാളിൽ നിന്നും രണ്ടുഗ്രാം കഞ്ചാവ് എക്സൈസ് കണ്ടെടുത്തിരുന്നു.In Pathanamthitta, a youth who joined CPM was caught with ganja
തിങ്കളാഴ്ചയാണ് കോളജ് ജങ്ഷനിൽ നിന്നും കഞ്ചാവുമായി ഇയാളെ എക്സൈസ് പിടികൂടിയത്. പിന്നീട് ഇയാളെ സ്റ്റേഷൻ ജാമ്യത്തിൽ വിട്ടയച്ചു. കഴിഞ്ഞ വെള്ളിയാഴ്ചയാണ് കാപ്പ കേസ് പ്രതി ശരൺചന്ദ്രനൊപ്പം യദുകൃഷ്ണനും മറ്റുള്ളവരും സിപിഎമ്മിൽ ചേർന്നത്.
സിപിഎം ജില്ലാ സെക്രട്ടറി കെപി ഉദയഭാനു, ആരോഗ്യമന്ത്രി വീണാ ജോർജ്, കെ യു ജനീഷ്‌കുമാർ എംഎൽഎ തുടങ്ങിയവർ ഇവരെ സ്വീകരിക്കുന്ന ചടങ്ങിൽ പങ്കെടുത്തിരുന്നു. മുമ്പ് തെറ്റായ രാഷ്ട്രീയവും രീതികളും പിന്തുടർന്നവർ അത് ഉപേക്ഷിച്ചാണ് ശരിയുടെ പക്ഷത്തു നിൽക്കാനായി സിപിഎമ്മിലേക്ക് വന്നതെന്നാണ് മന്ത്രി വീണാ ജോർജ് വിമർശനങ്ങൾക്ക് മറുപടിയായി പറഞ്ഞത്.
