മലപ്പുറത്ത് കുടിവെള്ളം എടുക്കുന്നത് സംബന്ധിച്ച തർക്കത്തിനിടെ രണ്ടുപേർക്ക് വെട്ടേറ്റു. മലപ്പുറം കുറ്റിപ്പുറത്താണ് സംഭവം. പള്ളിയാൽ വാടക കോർട്ടേഴ്സിൽ താമസിക്കുന്ന സഹോദരങ്ങൾ തമ്മിലാണ് സംഘർഷം ഉണ്ടായത്. പൈപ്പിൽ നിന്നും വെള്ളമെടുക്കുന്നതുമായി ബന്ധപ്പെട്ട സ്ത്രീകൾ തമ്മിൽ ഉണ്ടായ തർക്കമാണ് പിന്നീട് വലിയ സംഘർഷമായി മാറിയത്. സഹോദരങ്ങളായ അറുമുഖൻ, മണിയൻ എന്നിവർ അടുത്തടുത്തുള്ള ക്വാർട്ടേഴ്സുകളിൽ ആണ് താമസം. രാവിലെ വെള്ളമെടുക്കുന്നതുമായി ബന്ധപ്പെട്ട് സ്ത്രീകൾ തമ്മിൽ തർക്കമുണ്ടായിരുന്നു. ഇത് പിന്നീട് കുടുംബാംഗങ്ങൾ എല്ലാവരും ഏറ്റെടുക്കുകയായിരുന്നു. ഇറച്ചി വെട്ടുന്ന കത്തികൊണ്ട് സഹോദരങ്ങൾ പരസ്പരം ആക്രമിക്കുകയായിരുന്നു. ഒരാളുടെ കൈയ്ക്കും മറ്റൊരാളുടെ തോളിനുമാണ് പരിക്കേറ്റത്. പരിക്കേറ്റ ഒരാളെ വളാഞ്ചേരിയിലെ ആശുപത്രിയിലും മറ്റുള്ള മറ്റൊരാളെ കുറ്റിപ്പുറത്തെ സ്വകാര്യ ആശുപത്രിയിലും പ്രവേശിപ്പിച്ചു. സംഭവത്തിൽ കുറ്റിപ്പുറം പോലീസ് കേസെടുത്തു ഇവരുടെ മൊഴിയടക്കം രേഖപ്പെടുത്തി അന്വേഷണം ആരംഭിച്ചിട്ടുണ്ട്.
