കോഴിക്കോട്: പൊലീസ് കസ്റ്റഡിയിലെടുത്ത യുവാവിന്റെ വീട് കത്തിനശിച്ച നിലയിൽ. കോഴിക്കോട് വെള്ളയിലാണ് സംഭവം. വെള്ളയിൽ സ്വദേശിയായ ഫൈജാസിന്റെ വീടാണ് കത്തി നശിച്ചത്.
അടിപിടി കേസുമായി ബന്ധപ്പെട്ട് ഇയാളെ ഇന്നലെ പോലീസ് കസ്റ്റഡിയിൽ എടുത്തിരുന്നു. കഴിഞ്ഞ ഞായറാഴ്ച ഫൈജാസും നാട്ടുകാരും തമ്മിൽ സംഘർഷം നടന്നിരുന്നു. ഈ കേസിലാണ് ഫൈജാസിനെകസ്റ്റഡിയിലെടുത്തത്.
പിന്നാലെ ഇന്ന് പുലർച്ചെയാണ് ഫൈജാസിൻ്റെ വീട് കത്തി നശിച്ച നിലയിൽ കണ്ടെത്തിയത്. കടുത്ത മദ്യപാനിയായ ഇയാൾ ലഹരി വസ്തുക്കളും ഉപയോഗിക്കാറുണ്ടെന്ന് സ്ഥലം കൗൺസിലർ ആരോപിച്ചു. മദ്യപിച്ചാൽ അയൽവീടുകളുടെ വാതിലിൽ മുട്ടി ബഹളം വെക്കുന്ന പതിവുണ്ടെന്നും കൗൺസിലർ പറയുന്നു.
നാട്ടിലേക്ക് പുറത്തുനിന്ന് ആര് വന്നാലും ഫൈജാസ് ചോദ്യം ചെയ്യുന്ന പ്രകൃതമാണെന്നും ആരോപണമുണ്ട്. ഇത്തരത്തിൽ ഒരു വിദ്യാർത്ഥിയെ ഇയാൾ കുത്തി പരുക്കേൽപ്പിച്ചിട്ടുണ്ട്. ഫൈജാസ് ഒറ്റയ്ക്കാണ് വീട്ടിൽ താമസിച്ചിരുന്നതെന്നും ഇവിടെ സുഹൃത്തുക്കൾക്കൊപ്പം മദ്യപിക്കുന്നത് പതിവാണെന്നും കൗൺസിലർ കൂട്ടിച്ചേർത്തു.
