കൈയിൽ അഞ്ചു തുന്നിക്കെട്ടുകളോടെ വേദന കടിച്ചുപിടിച്ച് മത്സരത്തിനിറങ്ങി; 17 വയസ്സിനിടെ കളരിയിൽ അഞ്ചു ദേശീയ സ്വർണം
കളരി പഠിക്കാനായി ആദ്യദിനം തുള്ളിച്ചാടി പുറപ്പെട്ട ഗോപികയ്ക്ക് യാത്രക്കിടയിൽ തന്നെ പരീക്ഷണം. ഓടുന്നതിനിടെ ചെറുവിരൽ കല്ലിൽ ഇടിച്ച് ചോര പൊടിഞ്ഞു. വേദനയും വിഷമവും കാരണം കണ്ണുകൾ നിറഞ്ഞ് കരഞ്ഞുകൊണ്ടാണ് അവൾ കളരിയിലെത്തിയത്.
മൂന്നു വർഷങ്ങൾക്ക് ശേഷം അതേ ഗോപിക, കളരി സംസ്ഥാന ചാംപ്യൻഷിപ് വേദിയിൽ. പയറ്റിനിടെ പരിക്കേറ്റ കൈയിൽ അഞ്ചു തുന്നിക്കെട്ടുകളോടെ മത്സരത്തിനിറങ്ങുകയായിരുന്നു അവൾ.
ഇടയ്ക്കിടെ മുറിവിൽ കെട്ടിയ തുണിയിൽ ചുവന്ന ചോര പടരുകയും കൈയിലൂടെ ഒഴുകുകയും ചെയ്തു. തുന്നൽ പൊട്ടുമെന്ന തോന്നൽ നൽകുന്ന വേദനയിലും മത്സരം പൂർത്തിയാക്കാതെ വേദി വിടില്ലെന്ന ദൃഢനിശ്ചയത്തിലായിരുന്നു ഗോപിക.
അടുത്തിടെയാണ് ഗോപിക എസ്. മോഹൻ കളരിയിലെ ചരിത്രനേട്ടവുമായി വാർത്തകളിൽ ഇടം പിടിച്ചത്. സംസ്ഥാന സ്കൂൾ ഗെയിംസിൽ കളരിയിൽ ആദ്യമായി സ്വർണം നേടുന്ന താരമായാണ് അവൾ ചരിത്രം കുറിച്ചത്.
തിരുവനന്തപുരത്തെ കളരിയിൽ ദേശീയ മത്സരത്തിനായുള്ള പരിശീലനത്തിനിടെ, കളരി തന്ന ഏറ്റവും വലിയ മെഡൽ ധൈര്യമാണെന്ന് പറഞ്ഞാണ് ഗോപിക തന്റെ അനുഭവങ്ങൾ പങ്കുവച്ചത്.
എൽകെജി മുതൽ തന്നെ സ്കൂളിലെ എല്ലാ പരിപാടികളിലും മത്സരിക്കാനുള്ള വലിയ ഉത്സാഹം ഉണ്ടായിരുന്നുവെന്ന് ഗോപിക പറയുന്നു.
നേമം യു.പി. സ്കൂളിൽ അഞ്ചാം ക്ലാസിൽ പഠിക്കുമ്പോഴാണ് സ്കൂളിലെ എക്സ്ട്രാ കരിക്കുലർ പ്രവർത്തനങ്ങളുടെ ഭാഗമായി കളരി പരിശീലന ക്യാമ്പിൽ ചേർന്നത്.
കളരിയെ കുറിച്ച് വലിയ അറിവില്ലായ്മയാൽ പ്രത്യേക താത്പര്യമില്ലാതെയാണ് തുടക്കം. എന്നാൽ 50 പേരിൽ നിന്ന് 15 പേരെ വിദഗ്ധ പരിശീലനത്തിനായി തെരഞ്ഞെടുത്തപ്പോൾ അതിൽ താനും ഉൾപ്പെട്ടത് ആത്മവിശ്വാസം നൽകി.
രാഹുൽ ആശാനാണ് കളരിയിൽ സംസ്ഥാന-ദേശീയ തല മത്സരങ്ങളുണ്ടെന്നും വിജയികൾക്ക് സ്കോളർഷിപ്പുകൾ ലഭിക്കുമെന്നും ആദ്യമായി പറഞ്ഞുതന്നത്.
വീട്ടിലെ സാമ്പത്തിക സാഹചര്യം കൂടി കണക്കിലെടുത്തപ്പോൾ, എത്ര കഷ്ടപ്പെട്ടാലും മെഡൽ നേടണം എന്ന വാശി മനസ്സിൽ ഉറപ്പിച്ചതായി ഗോപിക പറയുന്നു.
ആദ്യ മത്സരത്തിനുള്ള തയ്യാറെടുപ്പിനിടെ മുഴുവൻ പരിശീലനത്തിലും പങ്കെടുക്കാൻ സാധിക്കാതിരുന്നതോടെ സെലക്ഷൻ ട്രയൽസിൽ ഏറ്റവും കുറവ് മാർക്ക് നേടിയതും അവളുടെ യാത്രയിലെ മറ്റൊരു കടുത്ത അനുഭവമായിരുന്നു.
English Summary
Gopika S. Mohan’s journey in Kalaripayattu is a story of grit and determination. From injuring her finger on the very first day of training to competing in the state championship with stitched wounds, she never gave up. Recently, Gopika made history by winning the first-ever gold medal in Kalaripayattu at the State School Games. She credits Kalaripayattu for teaching her courage and resilience and is now preparing for national-level competitions.
gopika-s-mohan-kalaripayattu-state-school-games-gold-story
Gopika S Mohan, Kalaripayattu, State School Games, Kerala sports, girl achievers, inspirational story, martial arts, school sports
