ഗൂഗിൾ,അദാനി,എയർടെൽ കൈകോർക്കുന്നു;ഇന്ത്യയുടെ ആദ്യ എ.ഐ ഹബ്ബിന് തുടക്കം
ന്യൂഡൽഹി: ഇന്ത്യയുടെ ആർട്ടിഫിഷ്യൽ ഇന്റലിജൻസിലെ ഏറ്റവും മഹത്തായ നിക്ഷേപ പദ്ധതിക്ക് ആന്ധ്രാപ്രദേശിലെ വിശാഖപട്ടണം വേദിയാകുന്നു.
ഗൂഗിള്, അദാനി ഗ്രൂപ്പ്, ഭാരതി എയര്ടെല് എന്നീ മൂന്നു ഭീമൻമാരുടെ കൈകോർക്കലിലൂടെ രാജ്യത്തെ ആദ്യ എ.ഐ ഹബ് രൂപം കൊള്ളുകയാണ്.
1500 കോടി ഡോളർ നിക്ഷേപത്തോടെ എ.ഐ വിപ്ലവത്തിന് തുടക്കം; ആന്ധ്രയിൽ ഗൂഗിളിന്റെ വമ്പൻ പദ്ധതി
പ്രധാനമന്ത്രി നരേന്ദ്രമോദിയുമായുള്ള കൂടിക്കാഴ്ചയിൽ ആൽഫബെറ്റ് സി ഇ ഒ സുന്ദർ പിച്ചൈ വ്യക്തിപരമായി ഈ പദ്ധതിയുടെ വിശദാംശങ്ങൾ പങ്കുവെച്ചതായി കേന്ദ്ര സ്രോതസുകൾ സ്ഥിരീകരിച്ചു.
അടുത്ത അഞ്ച് വർഷത്തിനുള്ളിൽ 1500 കോടി യുഎസ് ഡോളറാണ് ഗൂഗിള് ഇന്ത്യയിലെ എ.ഐ അടിസ്ഥാന സൗകര്യ നിർമ്മാണത്തിനായി നിക്ഷേപിക്കുന്നത്.
ഡാറ്റാസെന്റർ, എ.ഐ ബേസ്, ക്ലൗഡ് കംപ്യൂട്ടിംഗ് സംവിധാനം എന്നിവ ഉൾക്കൊള്ളുന്ന ഇത് ഗൂഗിളിന്റെ ഇന്ത്യയിലെ ഏറ്റവും വലിയ സാമ്പത്തിക ഇടപെടലായിരിക്കും.
ഇന്ത്യ-യുഎസ് ടെക് പങ്കാളിത്തത്തിന് പുതിയ അരങ്ങ്
വികസിത ഭാരത് 2047 ദൗത്യത്തിന്റെ ഭാഗമായാണ് പദ്ധതി മുന്നോട്ടു പോകുന്നത്. ഇന്ത്യയുടെയും അമേരിക്കയുടെയും തമ്മിലുള്ള സാമ്പത്തിക, സാങ്കേതിക കൂട്ടുകെട്ടിനും പദ്ധതി പുതുവഴികൾ തെളിക്കും.
വിശാഖപട്ടണത്തെ എ.ഐ ഡാറ്റാസെന്റർ കാമ്പസ് രാജ്യത്തിന്റെ ഏറ്റവും ശക്തമായ ഡിജിറ്റൽ അടിസ്ഥാന സംവിധാനമായി മാറുമെന്ന വിശ്വാസം അദാനി ഗ്രൂപ്പ് ചെയർമാൻ ഗൗതം അദാനി എക്സിൽ രേഖപ്പെടുത്തി.
ഡീപ് ലേർണിംഗ്, ന്യൂറൽ നെറ്റ്വർക്ക് പരിശീലനം, ലാർജ് മോഡൽ ഇൻഫറൻസ് തുടങ്ങിയ മുൻനിര സാങ്കേതിക മേഖലകളെ ശക്തിപ്പെടുത്തും.
ഇന്ത്യയിലെ എ.ഐ വർക്ക്ലോഡുകൾക്ക് വേഗം കൂട്ടും പദ്ധതി
ആരോഗ്യരംഗം, കാർഷികം, ലോജിസ്റ്റിക്സ്, ഫിനാൻസ് തുടങ്ങി ഇന്ത്യയുടെ നിർണായക മേഖലകളിലേക്ക് എ.ഐ പ്രയോഗം വേഗത്തിലാക്കാൻ കഴിയുന്ന വിധത്തിൽ തന്നെ അടിസ്ഥാന സൗകര്യങ്ങൾ വികസിപ്പിക്കുമെന്നും അദാനി വ്യക്തമാക്കി.
“ഇന്ത്യയുടെ എ.ഐ വിപ്ലവത്തെ മുന്നോട്ടു നയിക്കുന്ന എഞ്ചിനാണ് ഇത്” എന്നാണ് അദ്ദേഹത്തിന്റെ വിലയിരുത്തൽ.
ഭാരതി എയർടെൽ വൈസ് ചെയർമാനും മാനേജിംഗ് ഡയറക്ടറുമായ ഗോപാൽ വിത്തൽ ഈ കൂട്ടുകെട്ടിനെ ഇന്ത്യയുടെ ഡിജിറ്റൽ ഭാവിക്ക് നിർണായക നാഴിക്കല്ലായി വിശേഷിപ്പിച്ചു.
ആന്ധ്രയിലെ ഈ മഹാപദ്ധതി ദേശീയ തലത്തിൽ എ.ഐ വർക്ക്ലോഡുകൾ കൈകാര്യം ചെയ്യാനുള്ള ഇന്ത്യയുടെ കഴിവിനെ അടുത്ത തലത്തിലേക്ക് ഉയർത്താനാണ് സാധ്യത.
ഡിജിറ്റലൈസേഷനും സാമ്പത്തിക വളർച്ചയും ഒരുമിച്ച് കൈമാറുന്ന പദ്ധതിയെന്ന നിലയ്ക്കാണ് ഇതിനെ വിലയിരുത്തപ്പെടുന്നത്.
