തിരുവനന്തപുരം: സസ്പെൻസ് നിറഞ്ഞ കുറിപ്പുമായി സമൂഹമാധ്യമങ്ങളിൽ എത്തിയിരിക്കുകയാണ് സസ്പെൻഷനിലുള്ള എൻ പ്രശാന്ത് ഐഎഎസ് . ‘ആ തീരുമാനം ഇന്ന് എടുക്കുന്നു’ എന്നാണ് എൻ പ്രശാന്ത് സമൂഹ മാധ്യമത്തിൽ ഇട്ട പോസ്റ്റ്.
കൊഴിഞ്ഞ റോസാ ദളങ്ങളുടെ ഫോട്ടോയും ഒപ്പം ‘സംതിങ് ന്യൂ ലോഡിങ്’ എന്ന ഹാഷ് ടാഗും ചേർത്താണ് സമൂഹ മാധ്യമത്തിൽ പോസ്റ്റ് ചെയ്തിരിക്കുന്നത്.
ഇതോടെ പോസ്റ്റിന് താഴെ സജീവ ചർച്ചകൾ നടന്നുകൊണ്ടിരിക്കുകയാണ്. ‘കടുത്ത തീരുമാനങ്ങൾ ഒന്നും വേണ്ട’, ‘തീരുമാനങ്ങൾ എല്ലാം നന്നായി ആലോചിച്ചു മാത്രം എടുക്കൂ’ എന്നെല്ലാം ചിലർ ഉപദേശിച്ചപ്പോൾ ഏപ്രിൽ ഫൂൾ പ്രാങ്കാണെന്നോയെന്ന സംശയവും ചിലർ ഉന്നയിക്കുന്നു.
ഉന്നത ഉദ്യോഗസ്ഥനെയും സഹപ്രവർത്തകനെയും നവമാധ്യമങ്ങൾ വഴി അധിക്ഷേപിച്ചെന്ന ആക്ഷേപം ഉയർന്നതോടെ സസ്പെൻഷനിലാണ് എൻ പ്രശാന്ത്. നവംബർ 11 നായിരുന്നു പ്രശാന്തിനെ സസ്പെൻഡ് ചെയ്തത്.
ഗുരുതര അച്ചടക്ക ലംഘനം നടത്തിയെന്നും അഡ്മിനിസ്ട്രേറ്റീവ് സർവീസിന് അവമതിപ്പുണ്ടാക്കും വിധം പ്രവർത്തിച്ചെന്നും സസ്പെൻഡ് ചെയ്ത ശേഷം പുറത്തിറക്കിയ ഉത്തരവിൽ പറയുന്നു.
കുറ്റാരോപണ മെമ്മോക്ക് പ്രശാന്ത് മറുപടി നൽകിയിരുന്നില്ല. മറുപടിക്ക് പകരം പ്രശാന്ത് ചീഫ് സെക്രട്ടറിയോട് ചോദ്യങ്ങൾ ചോദിച്ചതും വിവാദമായിരുന്നു ഇതിന് രണ്ട് മറുപടി ചീഫ് സെക്രട്ടറി നൽകുകയും ചെയ്തു.
ആദ്യം നൽകേണ്ടത് മറുപടിയാണെന്നും തെളിവുകൾ ആവശ്യപ്പെടേണ്ടത് അന്വേഷണ സമിതിക്ക് മുന്നിലാണെന്നുമായിരുന്നു ചീഫ് സെക്രട്ടറി പറഞ്ഞത്.
