ഗോവയിലേക്ക് പോകുന്നവരുടെ ശ്രദ്ധയ്ക്ക്; അനുമതിയില്ലാതെ ടൂറിസ്റ്റുകളുടെ ഫോട്ടോയോ വീഡിയോയോ പകർത്തരുത്;  പൊലീസ് നിർദേശം ഇങ്ങനെ

ഗോവയിലേക്ക് പോകുന്നവരുടെ ശ്രദ്ധയ്ക്ക്; അനുമതിയില്ലാതെ ടൂറിസ്റ്റുകളുടെ ഫോട്ടോയോ വീഡിയോയോ പകർത്തരുത്;  പൊലീസ് നിർദേശം ഇങ്ങനെ

പനാജി: ഗോവയിൽ ടൂറിസ്റ്റുകളുടെ സ്വകാര്യത ലംഘിച്ചുകൊണ്ട് അനുമതിയില്ലാതെ ഫോട്ടോയും വീഡിയോയും പകർത്തുന്ന സംഭവങ്ങൾ വർധിക്കുന്ന സാഹചര്യത്തിൽ കർശന നടപടി സ്വീകരിക്കുമെന്ന് ഗോവ പൊലീസ് അറിയിച്ചു. 

വിദേശികളും ആഭ്യന്തര ടൂറിസ്റ്റുകളുമടക്കം നിരവധി പേർ ഇത്തരം അതിക്രമങ്ങൾക്ക് ഇരയാകുന്നുവെന്ന പരാതികൾ ഉയർന്നതോടെയാണ് പൊലീസ് മുന്നറിയിപ്പുമായി രംഗത്തെത്തിയത്.

അടുത്തിടെ നടന്ന ചില സംഭവങ്ങളുടെ പശ്ചാത്തലത്തിലാണ് പൊലീസ് നടപടി ശക്തമാക്കുന്നത്. 

ഒരു വിദേശ വനിത നീന്തുന്ന ദൃശ്യങ്ങൾ അനുമതിയില്ലാതെ പകർത്തി സാമൂഹിക മാധ്യമങ്ങളിൽ പ്രചരിപ്പിച്ച കേസിൽ അലിസ്റ്റോ ലോബോ എന്നയാളെ പൊലീസ് അറസ്റ്റ് ചെയ്തിരുന്നു.

ഇതിന് പിന്നാലെ, വടക്കൻ ഗോവയിലെ ബാഗാ ബീച്ചിൽ ടൂറിസ്റ്റുകളെ ശല്യ ചെയ്യുകയും അനുമതിയില്ലാതെ ഫോട്ടോ എടുക്കുകയും ചെയ്ത സംഭവത്തിൽ തമിഴ്നാട് സ്വദേശികളായ രണ്ട് പേരെയും ഭാരതീയ ന്യായസംഹിത (BNS) 170-ാം വകുപ്പ് പ്രകാരം വാറന്റ് കൂടാതെയാണ് അറസ്റ്റ് ചെയ്തത്.

അതേസമയം, ഒരു റഷ്യൻ വനിതയെ ശല്യം ചെയ്ത കേസിൽ ഒഡീഷ സ്വദേശികളായ രണ്ട് യുവാക്കളെയും പൊലീസ് കസ്റ്റഡിയിലെടുത്തിട്ടുണ്ട്.

ഇത്തരം സംഭവങ്ങൾ ഗോവയുടെ ടൂറിസം ഇമേജിനെ ഗുരുതരമായി ബാധിക്കുന്നതാണെന്ന് പൊലീസ് വ്യക്തമാക്കി. 

പ്രത്യേകിച്ച് വിദേശ വനിതകളെ നിർബന്ധിച്ച് ഫോട്ടോ എടുക്കാൻ ശ്രമിക്കുന്ന പ്രവണത വർധിച്ചുവരുന്നതായും അന്വേഷണത്തിൽ കണ്ടെത്തിയിട്ടുണ്ട്.

ടൂറിസ്റ്റുകളുടെ വ്യക്തിഗത സ്വകാര്യതയെ ലംഘിച്ച് അനുമതിയില്ലാതെ ഫോട്ടോയോ വീഡിയോയോ പകർത്തുന്നവരെ അറസ്റ്റ് ചെയ്ത് 24 മണിക്കൂർ വരെ കസ്റ്റഡിയിൽ വയ്ക്കുമെന്ന് ഗോവ പൊലീസ് അറിയിച്ചു.

ഇതോടൊപ്പം, സംസ്ഥാനത്തെ പ്രധാന ടൂറിസ്റ്റ് കേന്ദ്രങ്ങളിലെയും ബീച്ചുകളിലെയും പൊലീസ് പട്രോളിംഗ് ശക്തമാക്കിയതായും ഇത്തരം നിയമലംഘനങ്ങൾ ഒരു സാഹചര്യത്തിലും അനുവദിക്കില്ലെന്നും അധികൃതർ വ്യക്തമാക്കി.

English Summary

Goa Police have warned of strict action against people who take photos or videos of tourists without their consent, following a rise in privacy violation complaints. Several recent incidents, including harassment and unauthorized recording of foreign women tourists, have led to arrests. Police said offenders may be arrested and kept in custody for up to 24 hours, and patrolling at beaches and tourist spots has been intensified.

goa-police-warning-against-unauthorised-photography-of-tourists

Goa, Goa police, tourist privacy, unauthorised photography, Baga beach, foreign tourists, harassment case, tourism safety, India news