ഒളിവിലാണെങ്കിലും ജനം കൈവിട്ടില്ല; ഫ്രഷ് കട്ട് കേസ് പ്രതി ജയിച്ചു
കോഴിക്കോട്: കട്ടിപ്പാറയിലെ വിവാദമായ ഫ്രഷ്കട്ട് കോഴിയറവ് മാലിന്യ സംസ്കരണ പ്ലാന്റിനെതിരെ നടന്ന സമരവുമായി ബന്ധപ്പെട്ട കേസുകളിൽ പ്രതിയായി ഒളിവിലായിരിക്കെ തെരഞ്ഞെടുപ്പിൽ മത്സരിച്ച സൈനുല് അബിദീന് (ബാബു കുടുക്കിൽ) വിജയിച്ചു.
ഒരു ദിവസം പോലും നേരിട്ട് പ്രചാരണത്തിനിറങ്ങാതെയാണ് 225 വോട്ടുകളുടെ ഭൂരിപക്ഷത്തിൽ ബാബു കുടുക്കിൽ വിജയം സ്വന്തമാക്കിയത്.
താമരശ്ശേരി പഞ്ചായത്തിലെ 11-ാം വാർഡായ കരിങ്ങമണ്ണയിലാണ് ബാബു ഐയുഎംഎല് സ്ഥാനാർഥിയായി മത്സരിച്ചത്.
ഈ വാർഡിൽ താമരശ്ശേരി ബ്ലോക്ക് കോൺഗ്രസ് കമ്മിറ്റി വൈസ് പ്രസിഡന്റ് ബാലകൃഷ്ണൻ പുല്ലങ്ങോട് സ്വതന്ത്ര സ്ഥാനാർഥിയായാണ് ജനവിധി തേടിയത്.
ഫ്രഷ്കട്ട് പ്ലാന്റിലേക്ക് അതിക്രമിച്ചുകയറി ആക്രമണം നടത്തിയെന്നാരോപിച്ച് സെപ്റ്റംബർ 21-ന് താമരശ്ശേരി പൊലീസ് രജിസ്റ്റർ ചെയ്ത കേസിലും,
ഒക്ടോബർ 21-ന് നടന്ന സംഘർഷത്തിനിടെ പ്ലാന്റിൽ അതിക്രമിച്ച് കയറി തൊഴിലാളികളെ ആക്രമിക്കാൻ ഗൂഢാലോചന നടത്തിയെന്ന കേസിലും ബാബു കുടുക്കിൽ പ്രതിയാണ്.
ഈ കേസുകളിൽ പൊലീസ് ലുക്ക് ഔട്ട് നോട്ടീസും സർകുലറും പുറപ്പെടുവിച്ചിരുന്നു.
ജാമ്യമില്ലാ വകുപ്പ് പ്രകാരം രജിസ്റ്റർ ചെയ്ത ആദ്യ കേസിനെ തുടർന്ന് നാട്ടിൽ നിന്ന് മാറിനിൽക്കുന്നതിനിടെയാണ് ഫ്രഷ്കട്ട് സംഘർഷമുണ്ടായത്.
തുടർന്ന് സമരസമിതി ചെയർമാനായിരുന്ന ബാബുവിനെ രണ്ടാമത്തെ കേസിലും പ്രതിചേർത്തു.
നാട്ടിലിറങ്ങിയാൽ സ്ഥാനാർഥിയെ പിടികൂടി കോടതിയിൽ ഹാജരാക്കാനായിരുന്നു പൊലീസിന്റെ നീക്കം. ബാബു വോട്ട് ചെയ്യാൻ എത്തുമെന്ന സംശയത്തെ തുടർന്ന് പോളിങ് ബൂത്തിലേക്കും പൊലീസ് എത്തിയിരുന്നു.
എന്നിരുന്നാലും, എല്ലാ അനിശ്ചിതത്വങ്ങളെയും മറികടന്നാണ് ബാബു കുടുക്കിലിന്റെ വിജയം.
English Summary
Sainul Abideen, popularly known as Babu Kudukkil, won the local body election from Thamarassery panchayat’s Karinkamanna ward while remaining absconding in connection with cases related to the controversial Fresh Cut chicken waste treatment plant protest in Kattippara. Contesting as an IUML candidate, he secured victory by a margin of 225 votes without campaigning in person even for a single day. Police had issued lookout notices against him, and attempts were made to arrest him if he appeared in public, including at the polling booth.
freshcut-protest-case-accused-babu-kudukkil-wins-thamarassery-election
Kozhikode news, Thamarassery panchayat, Fresh Cut protest, local body elections Kerala, Babu Kudukkil, IUML, election controversy, Kerala politics
