ദുബായ്: ടി20 റാങ്കിംഗിൽ വമ്പൻ കുതിപ്പുമായി ദക്ഷിണാഫ്രിക്കൻ പേസർ ആൻറിച്ച് നോർക്യ. ശ്രീലങ്കക്കെതിരെ ഏഴ് റൺസ് മാത്രം വിട്ടുകൊടുത്ത് നാലു വിക്കറ്റ് വീഴ്ത്തിയതിൻറെ പിൻബലത്തിൽ നോർക്യ ബൗളിംഗ് റാങ്കിംഗിൽ ഒമ്പത് സ്ഥാനം മെച്ചെപ്പെടുത്തി. പുതിയ റാങ്കിംഗിൽ എട്ടാം സ്ഥാനത്താണ് നോർക്യ.

ബാറ്റിംഗ് റാങ്കിംഗിൽ 861 റേറ്റിംഗ് പോയൻറുമായി ഇന്ത്യയുടെ സൂര്യകുമാർ യാദവ് തന്നെയാണ് ഒന്നാം സ്ഥാനത്ത്. പാകിസ്ഥാൻറെ മുഹമ്മദ് റിസ്‌വാൻ(766), പാക് ക്യാപ്റ്റൻ ബാബർ അസം(765) എന്നിവരാണ് ആദ്യ മൂന്ന് സ്ഥാനങ്ങളിൽ. ഇന്ത്യൻ ഓപ്പണർ യശസ്വി ജയ്സ്വാളാണ് ആദ്യ പത്തിലുള്ള ഏക ഇന്ത്യൻ ബാറ്റർ. ആറാം സ്ഥാനത്താണ് ജയ്സ്വാൾ.

ആദ്യ പത്തിൽ അഞ്ചാം സ്ഥാനത്തുള്ള ജോഷ് ഹേസൽവുഡിന് പുറമെയുള്ള ഒരേയൊരു പേസറും നോർക്യയയാണ്. ഇംഗ്ലണ്ട് സ്പിന്നർ ആദിൽ റഷീദ് ഒന്നാം സ്ഥാനത്ത് തുടരുമ്പോൾ ഇന്ത്യയുടെ രവി ബിഷ്ണോയ് രണ്ടാമതും അക്സർ പട്ടേൽ മൂന്നാം സ്ഥാനത്തുമുണ്ട്.

അതേസമയം, ബംഗ്ലാദേശ് താരം ഷാക്കിബ് അൽ ഹസൻ ഓൾ റൗണ്ടർമാരുടെ റാങ്കിംഗിൽ വീണ്ടും ഒന്നാം സ്ഥാനത്ത് എത്തിയതാണ് മറ്റൊരു പ്രധാന മാറ്റം. ശ്രീലങ്കൻ ക്യാപ്റ്റൻ വാനിന്ദു ഹസരങ്കയെ മറികടന്നാണ് ഷാക്കിബ് ഒന്നാം സ്ഥാനം തിരിച്ചുപിടിച്ചത്.

ദക്ഷിണാഫ്രിക്കക്കെതിരായ മത്സരത്തിൽ ഹസരങ്ക പൂജ്യത്തിന് പുറത്തായതാണ് തിരിച്ചടിയായത്.
എട്ടിന് ശ്രീലങ്കക്കെതിരായ മത്സരത്തിൽ തിളങ്ങിയാൽ ഷാക്കിബിന് ഒന്നാം സ്ഥാനത്ത് തുടരാനാവും.