കുപ്വാര: ജമ്മു കശ്മീരിലെ കുപ്വാര ജില്ലയിൽ ഉണ്ടായ മിന്നൽ പ്രളയത്തിൽ അഞ്ച് പേർ മരിച്ചു. ദോഡ, റിയാസി, കിഷ്ത്വാർ, റംബാൻ, ബാരാമുള്ള തുടങ്ങി മലയോര ജില്ലകളിലാണ് കനത്ത മഴയും മണ്ണിടിച്ചിലുമുണ്ടായത്. ജമ്മു കശ്മീരിൻ്റെ പല ഭാഗങ്ങളിലും തുടർച്ചയായി മഴ പെയ്യുന്നതിനാൽ മുൻകരുതൽ നടപടിയായി കശ്മീർ താഴ്വരയിലുടനീളമുള്ള സ്കൂളുകളും റിയാസി ജില്ലയും അടച്ചിടാനാണ് തീരുമാനം.
മണ്ണിടിച്ചിലിനെ തുടർന്ന് റോഡിൽ പലയിടത്തും ഗതാഗതം തടസ്സപ്പെട്ടു. കുപ്വാര- സോപൂർ ദേശീയ പാത അടച്ചിരിക്കുകയാണ്. അടുത്ത 24 മണിക്കൂർ ശക്തമായ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ അറിയിപ്പ്. കഴിഞ്ഞ കുറച്ച് ദിവസങ്ങളായി പെയ്യുന്ന കനത്ത മഴയിൽ വിവിധ പ്രദേശങ്ങളിൽ വൻ നാശമാണ് വിതച്ചിരിക്കുന്നത്.
