മലപ്പുറം: തെരുവുനായയുടെ കടിയേറ്റതിന് പ്രതിരോധ വാക്സിൻ എടുത്ത ശേഷവും അഞ്ചര വയസുകാരിക്ക് പേവിഷബാധ സ്ഥിരീകരിച്ചു. മലപ്പുറം പെരുവള്ളൂർ കാക്കത്തടം സ്വദേശി സ്വദേശിയുടെ മകൾക്കാണ് തെരുവുനായയുടെ ആക്രമണത്തിൽ ഗുരുതരമായി പരിക്കേറ്റത്.
നിലവിൽ കുട്ടി കോഴിക്കോട് മെഡിക്കൽ കോളേജിൽ ചികിത്സയിലാണ്. മാർച്ച് 29 നാണ് കുട്ടിയെ നായ ആക്രമിച്ചത്. കുട്ടിയുടെ തലയ്ക്കും കാലിനും ഗുരുതരമായി പരിക്കേറ്റിരുന്നു.
മിഠായി വാങ്ങാൻ പുറത്ത് പോയപ്പോഴാണ് കുട്ടിയെ നായ ആക്രമിച്ചത്. അന്നേ ദിവസം തന്നെ 7 പേർക്ക് നായയുടെ കടിയേറ്റിരുന്നു. കോഴിക്കോട് മെഡിക്കൽ കോളേജ് ആശുപത്രിയിൽ നിന്ന് കുട്ടിക്ക് ഐഡിആർബി വാക്സിൻ നൽകിയിരുന്നു.
എന്നാൽ തലക്ക് കടിയേറ്റാൽ വാക്സിൻ എടുത്താലും പേവിഷബാധ ഉണ്ടാകാമെന്ന് ഡോക്ടർമാർ പറയുന്നു. നിലവിൽ ഐസിയുവിലാണ് കുട്ടിയുള്ളത്.
