കണ്ണൂര്: വീട്ടിലെ വോട്ടിൽ പരാതി നൽകി എൽഡിഎഫ്. വീട്ടിൽ വെച്ച് വോട്ടവകാശം വിനിയോഗിക്കുന്നതിനിടെ യുഡിഎഫ് സ്ഥാനാര്ത്ഥിയുടെ നേതൃത്വത്തില് ആസൂത്രിതമായി വ്യാജവോട്ടുകള് ചെയ്തുവെന്നാണ് പരാതി. 70-ാം ബൂത്തിലെ 1420-ാം നമ്പർ പേരുകാരിയായ 86 വയസ്സുള്ള കമലാക്ഷിയുടെ വോട്ട് ഇതേ ബൂത്തിലെ 1148-ാം നമ്പർ വോട്ടറായ വി കമലാക്ഷി എന്നയാള് രേഖപ്പെടുത്തിയെന്നാണ് ആരോപണം.
യുഡിഎഫ് പ്രവര്ത്തക കൂടിയായ ബൂത്ത് ലെവല് ഓഫീസര് ഗീത രാഷ്ട്രീയതാല്പ്പര്യം വെച്ച് ആള്മാറാട്ടത്തിലൂടെ വ്യാജ വോട്ടറായ വി കമലാക്ഷിയെക്കൊണ്ട് വ്യാജവോട്ട് ചെയ്യിപ്പിച്ചുവെന്നും എല്ഡിഎഫ് ആരോപിച്ചു. യുഡിഎഫ് അനുഭാവികളായ ബിഎല്ഒമാരെ ഉപയോഗപ്പെടുത്തി ആള്മാറാട്ടം ഉള്പ്പെടെയുള്ള കുത്സിത മാര്ഗ്ഗത്തിലൂടെ കള്ളവോട്ട് ചെയ്യാനുള്ള യുഡിഎഫ് നീക്കം തിരഞ്ഞെടുപ്പ് അട്ടിമറിയാണെന്നും എല്ഡിഎഫ് മുഖ്യതിരഞ്ഞെടുപ്പ് ഓഫീസര്ക്ക് നല്കിയ പരാതിയില് പറഞ്ഞു.
വീട്ടിൽ വോട്ട് രേഖപ്പെടുത്തൽ സംവിധാനത്തിൽ കല്ല്യാശ്ശേരിക്ക് പിന്നാലെയാണ് കണ്ണൂരിലും കള്ളവോട്ട് ആരോപണം ഉയര്ന്നിരിക്കുന്നത്. ജില്ലയില് 92 കാരിയുടെ വോട്ട് സിപിഐഎം നേതാവ് രേഖപ്പെടുത്തിയെന്നായിരുന്നു പരാതി. കല്ല്യാശ്ശേരി സിപിഐഎം മുന് ബ്രാഞ്ച് സെക്രട്ടറിയും ബൂത്ത് ഏജന്റുമായ ഗണേശനെതിരെയാണ് പരാതി. സംഭവത്തിന്റെ സിസിടിവി ദൃശ്യങ്ങളും പുറത്ത് വന്നിരുന്നു. സംഭവത്തിൽ വരണാധികാരി കൂടിയായ കളക്ടര് ഇടപെട്ട് സ്പെഷ്യല് പോളിങ് ഓഫീസര്, പോളിങ് അസിസ്റ്റന്റ് മൈക്രോ ഒബ്സര്വര്, സ്പെഷ്യല് പൊലീസ് ഓഫീസര്, വീഡിയോഗ്രാഫര് എന്നിവരെ സസ്പെന്ഡ് ചെയ്തു.
