വാഹനത്തിന്റെ ഫോട്ടോ മാത്രം അയച്ചാൽ മതി; കേരളത്തിലുള്ള വണ്ടിക്ക് യുപിയിൽ നിന്ന് പുകപരിശോധന സർട്ടിഫിക്കറ്റ്
കോഴിക്കോട്: പുറംസംസ്ഥാനങ്ങളിൽ നിന്നുള്ള വ്യാജ പുകപരിശോധന (എമിഷൻ) സർട്ടിഫിക്കറ്റ് എടുത്തുനൽകാൻ ഏജന്റുമാർ സജീവമായതായി റിപ്പോർട്ട്.
സംസ്ഥാനത്തെ പുകപരിശോധനയിൽ പരാജയപ്പെടുന്ന വാഹനങ്ങൾക്ക് തകരാറുകൾ പരിഹരിച്ചാൽ മാത്രമാണ് ഒ.ടി.പി. സംവിധാനത്തിലൂടെ സർട്ടിഫിക്കറ്റ് നൽകുന്നത്.
എന്നാൽ പ്രശ്നം പരിഹരിക്കാതെ തന്നെ ഏജന്റുമാരെ സമീപിച്ച് 2000 രൂപ വരെ നൽകി പുറംസംസ്ഥാനങ്ങളിൽ നിന്ന് സർട്ടിഫിക്കറ്റ് വാങ്ങുന്ന പ്രവണത വർധിക്കുകയാണ്.
ഏജന്റുമാർ പറയുന്നതുപോലെ, വാഹനം പരിശോധനയ്ക്ക് കൊണ്ടുപോകേണ്ടതില്ല; വാഹനത്തിന്റെ ഫോട്ടോ അയച്ചാൽ മതി. ചില ഏജന്റുമാർ ഇതിനായി 500 രൂപ ഫീസായി ഈടാക്കുന്നുവെന്നാണ് വിവരം.
സംസ്ഥാനത്ത് സർട്ടിഫിക്കറ്റ് ലഭിക്കാൻ ഫോട്ടോ മാത്രം മതിയാകില്ല. പരിശോധനകേന്ദ്രത്തിൽ വാഹനം എത്തിക്കണം, ഒ.ടി.പി. വഴി സ്ഥിരീകരണം നടത്തണം എന്നിവ നിർബന്ധമാണ്. ഇതിലെ കർശനനടപടികൾ ഒഴിവാക്കാനാണ് പലരും ഏജന്റുമാരെ ആശ്രയിക്കുന്നതെന്നാണ് സൂചന.
ജനുവരി 30-ന് കോഴിക്കോട് ജില്ലയിലെ ഒരു പുകപരിശോധന കേന്ദ്രത്തിലെത്തിയ വാഹനത്തിന് തകരാറുകൾ കാരണം സർട്ടിഫിക്കറ്റ് ലഭിക്കാതെ വന്നതിനു പിന്നാലെ, ഉടൻ തന്നെ ഫോട്ടോ ആവശ്യപ്പെട്ട് ഒരാൾ ഫോണിൽ ബന്ധപ്പെട്ടു.
ഫോട്ടോ അയച്ചതിനു മിനിറ്റുകൾക്കുള്ളിൽ ഉത്തർപ്രദേശിൽ നിന്ന് സർട്ടിഫിക്കറ്റ് എടുത്തുനൽകിയതായി പരാതിയുണ്ട്. മറ്റൊരു വാഹനത്തിന് ജാർഖണ്ഡിൽ നിന്ന് സർട്ടിഫിക്കറ്റ് നൽകിയ സംഭവവും റിപ്പോർട്ട് ചെയ്തിട്ടുണ്ട്.
ഇത്തരത്തിലുള്ള തട്ടിപ്പ് ശ്രദ്ധയിൽപ്പെട്ടതോടെ വെഹിക്കിൾ എമിഷൻ ടെസ്റ്റിങ് ഓണേഴ്സ് അസോസിയേഷൻ പരാതി നൽകിയിരുന്നു.
ഇതിന്റെ അടിസ്ഥാനത്തിൽ മോട്ടോർ വാഹന വകുപ്പിന്റെ നിർദേശപ്രകാരം നാഷണൽ ഇൻഫർമാറ്റിക് സെന്റർ (NIC) മുഖേന വ്യാജ സർട്ടിഫിക്കറ്റ് നൽകിയ പരിശോധനകേന്ദ്രങ്ങളുടെ ലൈസൻസ് റദ്ദാക്കാൻ ശുപാർശ ചെയ്തിട്ടുണ്ട്.
വ്യാജ സർട്ടിഫിക്കറ്റ് കൈക്കലാക്കുന്ന വാഹനങ്ങൾക്കും സർട്ടിഫിക്കറ്റ് നൽകുന്ന പരിശോധനകേന്ദ്രങ്ങൾക്കും എതിരേ കർശന നടപടി സ്വീകരിക്കുമെന്ന് എൻ.ഐ.സി. കേരള ഡയറക്ടർ പ്രദീപ് സിങ് അറിയിച്ചു.
നിലവിൽ സംസ്ഥാനത്ത് പെട്രോൾ വാഹനങ്ങൾക്ക് 100 രൂപയും ഡീസൽ വാഹനങ്ങൾക്ക് 130 രൂപയുമാണ് പുകപരിശോധന ഫീസ്. എന്നാൽ ഏജന്റുമാർ മുഖേന സർട്ടിഫിക്കറ്റ് വാങ്ങുമ്പോൾ 1000 രൂപ മുതൽ അധിക തുക വരെ നൽകേണ്ടി വരുന്നതായും റിപ്പോർട്ടുണ്ട്.
English Summary
Agents are allegedly helping vehicle owners obtain fake emission test certificates from other states without fixing vehicle defects. Instead of mandatory OTP verification and physical inspection required in Kerala, owners send vehicle photos and pay agents up to Rs 2000 to get certificates issued from states like Uttar Pradesh and Jharkhand within minutes. Following complaints, authorities have recommended cancelling licenses of centres issuing fake certificates and promised strict action against offenders.
fake-emission-certificate-racket-kozhikode
Kozhikode, fake certificate, emission test, pollution certificate, vehicle emission, agents, motor vehicles department, NIC Kerala, OTP verification, transport department, Kerala news
