ഉദ്യോഗസ്ഥർക്ക് ഇഷ്ടമുള്ള രീതിയിൽ പ്രോട്ടോക്കോൾ മാറ്റാൻ കഴിയില്ല; എംആർ അജിത് കുമാറിനെ തള്ളി മന്ത്രി വി ശിവൻകുട്ടി
തിരുവനന്തപുരം: എക്സൈസ് കമ്മീഷണർ എം.ആർ. അജിത് കുമാർ നൽകിയ വിവാദ നിർദേശം വിദ്യാഭ്യാസ മന്ത്രി വി. ശിവൻകുട്ടി തള്ളി.
മുഖ്യമന്ത്രിയുടെയും മന്ത്രിമാരുടെയും പ്രോട്ടോക്കോൾ തീരുമാനിക്കേണ്ടത് സർക്കാർ തന്നെയാണെന്നും, ഏതെങ്കിലും ഒരു ഉദ്യോഗസ്ഥന് അതിൽ ഇടപെടാൻ അധികാരമില്ലെന്നും മന്ത്രി വ്യക്തമാക്കി.
മുഖ്യമന്ത്രിക്കും മന്ത്രിമാർക്കും സുരക്ഷാ–പ്രോട്ടോക്കോൾ നിലവിലുണ്ടെന്നും, അതനുസരിച്ചാണ് എല്ലാ കാര്യങ്ങളും നടക്കുന്നതെന്നും ശിവൻകുട്ടി പറഞ്ഞു. ഉദ്യോഗസ്ഥർക്ക് ഇഷ്ടമുള്ള രീതിയിൽ പ്രോട്ടോക്കോൾ മാറ്റാൻ കഴിയില്ലെന്നും അദ്ദേഹം കൂട്ടിച്ചേർത്തു.
സംസ്ഥാനത്ത് തെരഞ്ഞെടുപ്പിന് മുമ്പ് ചില മാധ്യമങ്ങൾ യുഡിഎഫിനെ അധികാരത്തിലേറ്റുമെന്ന് പ്രവചിക്കാറുണ്ടെന്നും, എന്നാൽ തെരഞ്ഞെടുപ്പിന് ശേഷം ജനങ്ങൾ എൽഡിഎഫിനെ തന്നെ ഭരണത്തിലേറ്റുന്നതാണ് കേരളത്തിൽ സ്ഥിരമായി സംഭവിക്കുന്നതെന്നും മന്ത്രി പറഞ്ഞു.
കഴിഞ്ഞ തെരഞ്ഞെടുപ്പിന് മുമ്പും യുഡിഎഫിന്റെ മുഖ്യമന്ത്രിയെയും കാബിനറ്റിനെയും വരെ ചിലർ പ്രഖ്യാപിച്ചിരുന്നുവെന്നും, എന്നാൽ തെരഞ്ഞെടുപ്പ് ഫലം വന്നപ്പോൾ എൽഡിഎഫിന് തുടർഭരണം ലഭിച്ചുവെന്നും അദ്ദേഹം ഓർമിപ്പിച്ചു.
ജനങ്ങൾ എന്തുകൊണ്ടാണ് ഇടതുമുന്നണിയെ തള്ളിപ്പറയേണ്ടതെന്നും, ഏതെങ്കിലും ഒരു മന്ത്രിക്കെതിരെയെങ്കിലും ഒരു രൂപയുടെ അഴിമതി ആരോപണമെങ്കിലും ഉണ്ടോയെന്നും വി. ശിവൻകുട്ടി ചോദിച്ചു.
എം.ആർ. അജിത് കുമാറിന്റെ വിവാദ നിർദേശം
എക്സൈസ് മന്ത്രിക്ക് എക്സൈസ് ഉദ്യോഗസ്ഥർ തന്നെ എസ്കോർട്ട് നൽകണമെന്നതാണ് എക്സൈസ് കമ്മീഷണർ എം.ആർ. അജിത് കുമാർ മുന്നോട്ടുവച്ച വിവാദ നിർദേശം.
ഇന്നലെ വിളിച്ചുചേർത്ത ഉന്നത ഉദ്യോഗസ്ഥരുടെ യോഗത്തിലാണ് ഈ നിർദേശം നൽകിയത്. മന്ത്രി ഹോട്ടലിലോ ഗസ്റ്റ് ഹൗസിലോ താമസിച്ചാലും ഉദ്യോഗസ്ഥരും വാഹനവും നിർബന്ധമായും ഉണ്ടായിരിക്കണമെന്നാണ് നിർദേശത്തിലുള്ളത്.
എന്നാൽ, എൻഫോഴ്സ്മെന്റിന് ഉപയോഗിക്കുന്ന വാഹനങ്ങൾ എങ്ങനെ പൈലറ്റ് വാഹനമായി ഉപയോഗിക്കുമെന്ന ആശങ്ക ഉദ്യോഗസ്ഥർക്കിടയിൽ ഉയർന്നിട്ടുണ്ട്.
ഇതിന് പുറമെ, ഓഫീസുകൾ വൃത്തിയായി സൂക്ഷിക്കുന്നതിനായി സ്വന്തമായി ഫണ്ട് കണ്ടെത്തണമെന്നും യോഗത്തിൽ നിർദേശം നൽകിയതായാണ് വിവരം.
English Summary
Kerala Education Minister V. Sivankutty has rejected the controversial directive issued by Excise Commissioner M. R. Ajith Kumar regarding ministerial protocol. Sivankutty stated that protocols for the Chief Minister and ministers are decided solely by the government, not by individual officials. The Excise Commissioner had suggested that excise officials should escort the Excise Minister at all times, including during stays at hotels or guest houses. The directive has sparked concerns among officials and triggered a political response from the minister, who also defended the LDF government’s record ahead of elections.
excise-commissioner-protocol-row-sivankutty-response
V Sivankutty, MR Ajith Kumar, Excise Department, Kerala Government, Minister Protocol, LDF, Kerala Politics
