ബെംഗളൂരു: കർണാടകത്തിലെ ആദ്യ എലഫൻ്റ് ഓവർപാസ് തുറന്നു. ബന്നേർഗട്ട ദേശീയോദ്യാനത്തിൽനിന്ന് സാവൻദുർഗ വനമേഖലയിലേക്ക് കാട്ടാനകൾക്ക് ഇനി സുഖമായി കടക്കാം.കർണാടകത്തിലെ ആദ്യ എലഫൻ്റ് ഓവർപാസ് ആണ് ബന്നേർഗട്ട ദേശീയോദ്യാനത്തിൽനിന്ന് സാവൻദുർഗ വനമേഖലയിലേക്ക് കാട്ടാനകൾക്ക് കടക്കാനായി തുറന്നിരിക്കുന്നത്. Elephant flyover opened
40 മീറ്റർ വീതിയും 45 മീറ്റർ നീളവുമുള്ള ഓവർപാസിന് മുകളിലൂടെ ആനകൾക്ക് സ്വൈര്യവിഹാരം നടത്താം. ഇതിനു താഴെ വാഹന ഗതാഗതവും നടത്താനുള്ള സൗകര്യമാണ് ദേശീയപാതാ അധികൃതർ ഒരുക്കിയത്. ദേശീയപാത 209ൽ കനകപുര റോഡിൽ റോറിച്ച്, ദേവികറാണി റോറിച്ച് എസ്റ്റേറ്റുകൾക്ക് സമീപമാണ് എലഫൻ്റ് ഓവർപാസ് നിർമിച്ചത്. ഓവർപാസിന് താഴ്ഭാഗത്തുകൂടി വാഹന ഗതാഗതവും നടത്താനുള്ള സൗകര്യമാണ് ദേശീയപാതാ അധികൃതർ ഒരുക്കിയത്.
ബെംഗളൂരു – കനകപുര റോഡ് നാലുവരിപ്പാതയായി മാറ്റുന്നതിനോടനുബന്ധിച്ച് വനം വകുപ്പ് 2017ലാണ് എലഫൻ്റ് ഓവർപാസ് നിർമിക്കണമെന്ന ആവശ്യം മുന്നോട്ടുവെച്ചത്. കാട്ടാനകൾ ബന്നേർഗട്ടയിൽനിന്ന് ബിഎം കാവലിലേക്കും അവിടെനിന്ന് സാവൻദുർഗ വനമേഖലയിലേക്കും കടക്കാൻ ഉപയോഗിച്ചിരുന്ന പാതയായിരുന്നു ഇത്. ദേശീയപാതാ വികസനം ആരംഭിച്ചതോടെ ആനകളുടെ സഞ്ചാരപാതയ്ക്ക് തടസ്സമുണ്ടാകുകയായിരുന്നു. രണ്ടു വർഷം മുൻപ് ബിഎംടിസി ബസ് ഇടിച്ച് കാട്ടാന ചരിഞ്ഞതോടെ എലഫൻ്റ് ഓവർപാസ് വേണെന്ന ആവശ്യം വനം വകുപ്പ് ശക്തമാക്കുകയായിരുന്നു.
ഓവർപാസ് തുറന്നതോടെ ആനകൾക്ക് ഇനി റോഡ് മുറിച്ചുകടക്കാതെ മറുവശത്ത് എത്താനാകും. കാട്ടാനകളുടം സഞ്ചാരം മൂലം വാഹന ഗതാഗതം തടസ്സപ്പെടുകയുമില്ല. ഓവർപാസിനെ ഹരിതാഭമാക്കാനായി മരത്തൈകളും വനം വകുപ്പ് നട്ടുപിടിപ്പിച്ചിട്ടുണ്ട്. അതേസമയം ഓവർപാസിന് മുകളിലൂടെ കടന്നുപോകുന്ന കാട്ടാനകളുടെ കണക്കെടുക്കാൻ നിലവിൽ വനം വകുപ്പിന് ആലോചനയില്ല. പതിവായി മൂന്നു ആനകളുടെ കൂട്ടം ഇതുവഴി സൈര്യവിഹാരം നടത്താറുണ്ടെന്ന് വനം വകുപ്പ് പറഞ്ഞു.
