ന്യൂഡൽഹി: അതിവേഗ ട്രെയിനുകൾ, ടിക്കറ്റ് നിരക്ക് കുറഞ്ഞ വിമാനങ്ങൾ, മെട്രോ റെയിലുകൾ എന്നിങ്ങനെ നിരവധി സൗകര്യങ്ങൾ രാജ്യത്തുണ്ട്. സൗകര്യങ്ങൾ അതിവേഗം മാറിക്കൊണ്ടിരിക്കുകയുമാണ്. ഇപ്പോഴിതാ ഗതാഗത സൗകര്യങ്ങളുടെ കൂട്ടത്തിലേക്ക് ഒരു പുതുമുഖം കൂടി അവതരിച്ചിരിക്കുകയാണ്. എയർലൈൻ കമ്പനിയായ ഇൻഡിഗോയുടെ കീഴിലുള്ള ഇന്റർഗ്ലോബ് എന്റർപ്രൈസസ്, യുഎസ് കമ്പനിയായ ആർച്ചർ ഏവിയേഷൻ എന്നിവർ 2026ൽ ഇലക്ട്രിക് എയർ ടാക്സി സർവീസ് ഇന്ത്യയിൽ കൊണ്ടുവരുമെന്ന് റിപ്പോർട്ട്. ഇതോടെ ഡൽഹിയിലെ കൊണാട്ട് പ്ലേസിൽ നിന്നു ഹരിയാനയിലെ ഗുരുഗ്രാമിലേക്ക് 7 മിനിറ്റിൽ യാത്ര ഇതോടെ സാധ്യമാകും. 2000 മുതൽ 3000 രൂപവരെയായിരിക്കും നിരക്ക്. 27 കിലോമീറ്റർ വരുന്ന ഈ ദൂരം കാറിൽ പോകാൻ തിരക്കുള്ള സാഹചര്യത്തിൽ ഒന്നര മണിക്കൂർ വേണ്ടിവരും. ഇത് ഏഴ് മിനിറ്റുകൊണ്ട് താണ്ടാനാകും. ഡൽഹി കൂടാതെ മുംബൈയിലും ബെംഗളൂരുവിലും ആദ്യഘട്ടത്തിൽ എയർ ടാക്സി സർവീസ് വരും. വെർട്ടിക്കൽ ടേക്ക്ഓഫ്, ലാൻഡിങ് ശേഷികളുള്ള 200 ഇലക്ട്രിക് വിമാനങ്ങൾ ആർച്ചർ ഏവിയേഷൻ നൽകും. പൈലറ്റ് കൂടാതെ 4 പേർക്ക് യാത്ര ചെയ്യാം. പ്ലെയിൻ ചാർജ് ചെയ്യാൻ 30 മുതൽ 40 മിനിറ്റാണ് വേണ്ടത്.
Read Also: തെക്കോട്ടില്ല, വടക്കോട്ട് ബുധനാഴ്ച വരെ ശക്തമായ മഴ; ഒപ്പം മിന്നലും; ജാഗ്രത പാലിക്കണം
